200. තිස් අවුරුදු රථ මතක . . . . ! (8)

LandCruiser BJ40

ලෑන්ඩ් කෲසර්යේ චැසියට දුනු මිටි හතර සමග ඇක්සල දෙක අමුනා එන්ජිම හා ගියර්පෙට්ටියද සවිකොට එය මත බොඩිය තබා අවසානයටම තද කලේ කුමන ඇනය දැයි මාහට මතක නැත. බොහෝ විට එය Propeller Shaft ප්‍රොපෙලර් ෂාෆ්ට හෙවත් අවරපෙති කඳන් වීමට බොහො සෙයින් ඉඩ ඇත. 

ප්‍රොපෙලර් ශාෆ්ට සවිකිරීමේදී එක් රෝදයක් ඉහල ඔසවා ගත් විට වැඩේ පහසුය. එසේම එහිදී සිහි නුවණින් යුතුව දෙකෙළවර ඇති යෝක් එකම ඉරක තිබෙන පරිදි සවි කර ගත යුතුවේ. ප්‍රොපෙලර් ෂාෆ්ට එකක් ඒකාකාර වේගයෙන් වෘථාකාරව ගමන් කරණ්නේ නැති වග; මෙය කියවන වැඩි දෙනා දන්නවා ඇතැයි සිතමි. එය භ්‍රමණය වන්නේ අංශක අනූවක් වේගයෙන් ද අනෙක් අංශක අනූව සෙමෙන්ද යලිත් ඉතිරි අංශක අනූව වේගයෙන්ද  අන්තිම අංශක අනූව සෙමෙන් යන ආකාරයටය. 

ඒකාකාර වේගයෙන් භ්‍රමණය වන එන්ජිමක්ද එයට බද්ධ වූ ක්ල්ච් හා ගියර පෙට්ටියේ සියළුම දැති රෝදද; අවසානයේ ගියර පෙට්ටියෙන්  එලියටද ඒකාකාර භ්‍රමණයක් ලබාදෙන්නේ නම් කොහෙවත් නැති අවර පෙති කඳක් හෙවත් ප්‍රොපෙලර් ශාෆ්ටයක් පමණක් හිතු මතේ තමාට ඕනෑවට අතර මග රස්තියාදු වෙන්නේ අහවල් කාරණයකටදැයි මෙය බලන බොහෝ දෙනා හට සිතෙනු ඇත. එය එසේ වන්නේ මන්දැයි; ලියා තබනවාට වඩා පිංතූරයක් සහ රූප රාමු පෙලක් අමුනා තැබීම යෙහෙකි බව ඔබටම තේරුම් යනවා ඇති. 

  උගේ පාඩුවේ ඌට ඕනෑවිදියට කරකැවෙන අවර පෙති කඳ. සිංහලෙන් කියනවානම් ප්‍රොපෙලර් ෂාෆ්ටෙක!

අවරපෙති කඳ හෙවත් ප්‍රොපෙලර් ෂාෆ්ටයේ මෙම සන්ධිය යුනිවර්සල් ජොයින්ට් ලෙස ඉංගිලිසියෙන් දැක්වෙන අතර එකල එය සිංහලට හරවා තිබුනේ සර්ව ලෝක පූට්ටුව නමිනි. එහෙත් 1960 වසරේදී අධ්‍යාපන ප්‍රකාශන දෙපාර්තමේන්තුව මගින් සිංහලට පරිවර්ථනය කරණ්නට යෙදුනා වූ අන්තර්ජාතික කම්කරු කාර්‍යාලය මගින් ප්‍රකාශිත "මෝටර් රිය නඩත්තුව සහ අළුත් වැඩියාව" ග්‍රන්ථයේ මීට නැවුම් වචන ද්විත්වයක් ඇතුලත් කොට තිබුනි. ඒ "දසත මූට්ටුව" යන්නයි.

 ගියර පෙට්ටියෙන් කෙරෙණ ඝූර්ණය; එක් දසත මූට්ටුවක් තුලින් කමන් කරද්දී; මා මුලින් ලියා ඇති පරිදි එය "සෙමෙන් - වේගයෙන් - සෙමෙන් - වේගයෙන්" ලෙසට විකෘථි වුවද නැවත පසු පසින් ඇති දෙවන දසත මූට්ටුව තුලින් ගමන් ගනිද්දී "වේගයෙන් - සෙමෙන් - වෙගයෙන් - සෙමෙන්" චලනයක් සමග ඒකාබද්ධ වූ විට අවසාන එළවුම වන්නේ ඒකාකාර භ්‍රමණයකි! ඝූර්ණයකි!! එම නිසා මේ සර්ව ලෝක පූට්ටුවේ පිස්සු කෙළීම වාහනයට නොදැනේ. මාරයි නේද? 

කෙසේ වෙතත් එය පන ගන්වා ටෙස්ට් ඩ්‍රයිව් එකක් ගිය අයුරු නම් මාහට හොඳ හැටි මතකය. වාහනය නිවසේ සිට සෙමෙන් සෙමෙන් මාර්ගයට ගෙන සෙමෙන් පිකප් කලෙමි. වාහනයේ එන්ජිමේ කන්කළු තේජාන්විත ඩීසල් බර හඬ යටින් ඉතා සියුම්ව ඇතිල්ලෙන හඬක් ඉන් නැගුනි.

වාහන්යේ වේගය වැඩිවෙත්ම ඇතිල්ලෙන හඬ වැඩිවී; පැයට කිලෝමීටර විස්සක තිහක වේගයේදී එය මුළු මහත් රථයම දෙදෙරවන හඬක් තරමට වැඩි වීමත් සමග වාහනය පසෙක නවතා; යට රිංගා බැලුව මුත් හොයාගන්නට වරදක් නොවීය.

වාහනය හරවා නැවත නිවසට ගෙනැවිත්; පසු පස එක් රෝදයක් ඔසවා; රථය පන ගැන්වූවෙමි. ඉතා කුඩා ඇතිල්ලෙන හඬක් නික්මුනි. පසුව සොයා ගත් පරිදි ගියර පෙට්ටියේ කම්පෑනියන් ෆ්ලාන්ජය  Companion Flange (එනම් ගියර පෙට්ටියට  ප්‍රොපෙලර් ශාෆ්ටය ඇන හතරකින් සවිවන ප්ලන්ජරය)  චැසියේ ක්‍රොස් මෙම්බරයේ යාන්තමින් ගෑවේ.

මෙවන් ෆ්ලාන්ජ දෙකක් ප්‍රොපෙලර් ශාෆ්ටයේ දෙකෙළවර ඇත. 

(මේ දක්වා ඇත්තේ පසු පස ෆ්ලාන්ජයය!  කෝ අනික? අනික තමයි මේක! ඔව් දෙකම එක වාගේය)

අහංකාර ක්‍රොස් මෙම්බරය!  

ඕන වැඩකට හෙනහුරෙක් ඇති කියන්නේ නිකමටද?

පෙට්‍රෝල් චැසියෙන් ගලවා ඉවත් කිරීමට නොහැකි වූ එකම කොටස මෙයය. වක්‍රාකාර මෙය; චැසිය දෙපැත්තට වෙල්ඩින් කර තිබුනි. එසේ එය වක්‍රාකාර කොට ඇත්තේ ගියර් පෙට්ටියේ කම්පෑනියන් ෆ්ලාන්ජය එලියට දිගු වන ස්ථානයේය. පෙට්රෝල් එන්ජිමට නිෂ්පාදකයා විසින් සවිකොට එන ගියර පෙට්ටියේ දිග පළල හා උස  අනුව එහි කම්පෑනියන් ෆ්ලාන්ජය  මෙහි නොගැටුනත් ඩීසල් එන්ජිම හා ගියර පෙට්ටිය ඊට නොගැලපී තිබුනි!

කරණ්නට ඇත්තේ විකල්ප දෙකකි. ඉන් එකක චැසියේ ක්‍රොස් මෙම්බරය මාරු කිරීම හෝ එහි වක්‍රය වැඩි කිරීමය. දෙවැන්න ගියර පෙට්ටිය මිලී මීටර දහයක් පමන පහත් කිරීමය.

මෙහිදී ගියර පෙට්ටිය තරමක් පහත් කිරීම වඩාත් පහසු බව මා තේරුම් ගත්තෙමි.

එන්ජිමත් ගියර පෙට්ටියත් එක් ඒකකයක් ලෙස ගත් කල එන්ජිමේ  දිග අනුව හරි මැදට තරමක් ඉදිරියෙන් එන්ජින් මවුන්ට් මගින් එන්ජිම චැසිය මත සවිකොට ඇත. එසේම ගියර පෙට්ටියේද හරි මැදට තරමක් පසුපසින් චැසිය හරහා දිවෙන ක්‍රොස් මෙම්බරයක් මත තබන ලද මවුන්ට් එකක් මගින් ගියර පෙට්ටිය රඳවා ඇත.

මෙම ගියර පෙට්ටිය රඳවා ඇති ක්‍රොස් මෙම්බරය චැසියට සවි කොට ඇත්තේ එල් හැඩයේ බ්‍රැකට් දෙකක්  මගිනි. බ්‍රැකටයේ සිරස් අක්ෂය බෝල්ට් හතරකින් චැසියේ ඇතුල් පැත්තට සවිකොට එහි තිරස් අක්ෂය ඔස්සේ දිවෙන කොටස මත ක්‍රොස් මෙම්බරය තබා සවිකොට තිබුනි.

මෙම බ්‍රැකට් දෙක පහත් කල හොත්ගියර පෙට්ටිය මුළුමණින්ම පහත්වේ. එය සිදු කිරීමට පහසු හා අවම හානි ගෙන දෙන කාර්‍යය වන්නේ බ්‍රැකටයේ ඇන තව් ඕවල් කොට පහතට ගෙන ඒමය!

කොපමණ ප්‍රමානයක් ඇන තව්ව ඕවල් කල යුතුද?

එන්ජින් මවුන් එක නොසෙල්වී ගියර් බොක්ස් මවුන්ට් එක පමණක් පහතට ගෙන ඒමෙන් ඊටත් පසු පසින් ඇති  ෆ්ලාන්ජය සෙන්ටි මීටර 10ක් පහතට ගෙන ආ යුතුය.

දැනට තිබෙන විච්ල්‍ය ලක්ෂ තුන හරහා ඇඳි රේඛාවේ ඉදිරි ලක්ෂය වන එන්ජින් මවුන්ට් එක වෙනස් නොකොට පසු පස පමනක් පහත් කල පසු හැදෙන නව ලක්ෂ දෙක හරහා ඇඳි රේඛාවත් මුල් රේඛාවත් එක් කොට  ත්‍රිකෝණයක් සෑදේ. මෙම ත්‍රිකෝණයේ පසු පස පාදයේ දිග මිලී 10ක් විය යුතු නම් ඊට සමාන්තරව ගියර් පෙට්ටියේ මවුන්ට් එක හරහා ඇඳි රේඛාවේ දිග සොයා ගත යුතුය.

බෝම අමාරුවෙන් ඇන්ද චිත්තරයක්!

මම තරමක වේලාවක් කල්පනා කල පසු පාසලේදී උගෙන ගත් සමකෝණී ත්‍රිකෝණ පාඩම  මතක් උනි. සමකෝණී ත්‍රිකෝණ නීතියට අනුව XZP  හා X‍YO යනු සමකෝණි ත්‍රිකෝණ වේ. 

මෙහිදී XZ පාදයට X‍Y දක්වන අනු පාතයට සමාන අනුපාතයක් ZP ට ‍YO දක්වයි.

XZ / XY = ZP / YO වේ.

 මේ වනවිට ZP එනම් ගියර් පෙට්ටියේ කම්පෑනියන් ෆ්ලාන්ජය පහත් කර ගත යුතු දුර මිලී මීල්ටර 10 ක් පමනකි. XY එනම් එන්ජින් මවුන්ට් එකේ සිට ගියර් පෙට්ටියේ මවුන්ට් එක චැසියට සවිවන බ්‍රැකටයට ඇති දුර මැන ගත හැක. එසේම එන්ජින් මවුන්ටයේ සිට කම්පෑනියන් ෆ්ලාන්ජය තෙක් ඇති දුර XZ ද  මැන ගත හැක ඒනයින් ඉහත සරළ සමීකරණයට අනුව ‍YO හෙවත්; කම්පෑනියන් ෆ්ලන්ජය චැසියේ නොගෑවීමට මිලී මීටර 10 ක් පහත් කර ගැනීම සඳහා ගියර් පෙට්ටියේ මවුන්ට් එක සවි කොට ඇති ක්‍රොස් මෙම්බරය චැසියට සවි කර ඇති බ්‍රැකට් දෙක පහත් කල යුතු දුර පහසුවෙන්ම සොයා ගත හැකි වුනි. 

එය මිලි 6 ක් වැනි ඉතා කුඩා ප්‍රමානයක් විය. කඩවත ඔක්සිජන් හවුසය වෙතර ගොස් රවුම් පීරක් ගෙන ඇවිත්; එක් පසෙකට ඇන තව් හතර බැගින් දෙපස ඇන තව් අටම ඵතට මිලී 6 බැගින් ඕවල් කර ගියර පෙට්ටිය එල්ලා බැලූ පසු කිසිදු ආපදාවක් නොවීය.

මෙම 31 ශ්‍රී 5460 මෙරට කොහේ හෝ මාර්ගයක අදටත් දුවනු ඇත. කිසිවෙකු එය සොයා බැලුවහොත්, පෙට්රෝල් චැසිය, එයට ඇන හා මුරිච්චි වලින් සවිකොට ඇති දුනු හැඟර් හා ශැකල්, පහතට ඕවල් කොට සවිකොට ඇති ගියර පෙට්ටිය සවීවී ඇති ක්‍රොස් මෙම්බරය එලෙසින්ම වනු ඇත.

වාහනය නිමකල පසු යෙදුනු එක් නිවාඩුවක අප නිවැසියන් හා මාගේ මිත්‍ර ෂානක හා ඔහුගේ පිරිස එක්ව දකුණු ලක සංචාරයක යෙදුනෙමු. අප ගියේ කොග්ගල බීච් හෝටලයේ දින දෙකක නිවාඩුවක් ගත කිරීමටය.  එම ගමනේදී ෂානක පැදවූයේ ඔහුගේ; එකල නවීන වාහනයක් වූ නිසාන් FB14 රථයක්ය. ලෑන්ඩ් කෲසරය; නිසාන් මෝටර් රිය සමග කරට කර සටනක් යෙදුනේ අප දෙදෙනටම සිතා ගැනීමට නොහැකි පරිද්දෙනි.

 කැබැලි කර නැවත එකලස් කල චැසිය සීයට සීයක්ම නිවැරදි එකෙල්ලක් රථයට ලබා දී තිබුනි. ගාන්ධි අයියාගේ උපදේශකත්වයෙන් මගේ හයියෙන් සැදූ එන්ජිම Zසී හඬ නැංවීය. පයාගල රේල් ගෙට්ටුව තෙක් සමුදුරට සඟවෙමින් ගමන් කල ගාලු පාර සමුදුර් සිප ගැනීමට තරම් ලං වෙමින් යලිත් දුරස් වෙමින් ගලා ගියාය. මුහුදු සුළඟ කපා ගෙන ඊ ගහක් සේ ලෑන්ඩ් කෲසරය ඇදෙමින් ය. වායු සමනය කර නොතිබුනු රථයේ වාකවුළු සිසාරා සුළඟ පාවී ඒ!  

මුහුදු සුළඟ සමග නැහැයට ගෙන ආ පොල් රා සුවඳ . . . . ආ! මොන තරම් ආශ්වාද ජනකද? 

හදවතත් සමග එකාත්මීය වෙමින් ඒවන් ගමනක් යන්නට ඇත්නම් . . . . !

199. මෝටර් රියෙන් ගංවතුරට මුහුණ දෙන්නේ කෙසේද?

ඊයේ ලියන්න තිබුනු ලිපියක්!

"රාජා හෝ මා හෝ ගංගා හෝ"

ඊයේ වෙන කොට ජයග්‍රාහී සිව් වන දිනයටත් අත්තනගල්ල ගංගා ද්‍රෝණිය හෙවත් ගම්පහ, රාගම, කඩවත, ගනේමුල්ල, ජා ඇල, සීදූව, මිනුවන්ගොඩ වැනි ගම්පහ දිස්ත්‍රික්කයට අයත් ප්‍රදේශ වලට ධාරාණිපාත වර්ෂාව වැටෙමින් විය! අහසට මෙතරම් වතුර කොයින්දැයි සිතෙන තරම් මහත් වතුරක් ගෙන ආ; වැස්ස බී ගත නොහැකිවූ මහ පොලොව මහා ජල කඳ තම දේහය මත ගලා යෑමට සලසා බලා සිටියාය. කොටින්ම තැන තැන එක්වූ ජලයෙන් පලාත් බදව කුඩා ප්‍රමාණයේ ගං වතුරක් මැවෙමින් විය.

ඊයේ හවස් වරුවේ වත්පොත තුල වනගත වන්නා අටියෙන් මොබයිලයේ අගුළු ඇර වත් පොතට පිවිසෙනවාත් සමගම දුටුවේ ලක්මාල් කන්දෙවිදාන හෙවත් අටමා විසින් පලකල තිබූ රූපමය කඳුළු කථාවය. ඒ  රාගම කිට්ටුව පිහිටි ඔහුගේ නිවස තුලට ගංවතුර ගලාගෙන එන වීඩියෝවක් හා නිවසේ බොහෝ කොටස් ගං වතුරෙන් ක්‍රම ක්‍රමයෙන් යටවී යන ආකාරයත්ය. වහාම ඇනෝපිලිස් ඇමතූ මාඔහුත් සමග මහ වැස්සේ මාගේ අභිනව ලොරි රථයෙන් අටමාගේ දුක සැප විමසීමට පිටත් උනෙමු. 

කෙමෙන් රෑ බෝවී තිබූ අතර මහ වැස්සත් විළිබරෙන් මිරිකුණු වැසි වලාවන් නිසාත් ඝන අන්ධකාරයකින් පලාතම වැසී තිබුනි. කොරෝණා නිසා දවල් සිට නින්දේ වූ රාගම නගරයේ වීදී පහන් වල හා වාහන වල ආලෝකයෙන් තරමක් දුරට අඳුර පලවා හැර තිබුනි. කඩවත නගරයේ සිට අප රාගම නගරයට පිවිසෙත්ම බැසිලිකා විදුහල (එහි නම ඒක වියයුතුය!) මහා මාර්ගය ජලයෙන් අඩි දෙකක් පමණ යටවී තිබුනි. 

එතෙර වී අඹු දරුවන් බලනු රිසිවූ මෝටර් රථ වල නිවෙස් බලා යමින් සිටි මහත්වරුන් ගං වතුර දැක බහිංදෝ නොබහිංදෝ කියා සිතමින් වාහන වලට වී ගං වතුරට ඉව අල්ලමින් සිටියෝය. මියෙම්වා රැකෙම්වා කියා සිතන අපේ රුධිර ඝනය ඇඟේ දුවන සමහරුන් ගං වතුර දෙබෑ කරගෙන එතෙර මෙතෙර විය. මෝටර් රථ කිහිපයක් කටවල් ඇරගෙන මාර්ගයේ පසෙක් ගාල්කොට තිබෙනු දක්නා ලදී. ඒවාට එබුනු තතු දත්තෝ ඒවාට විවිධ ප්‍රයෝග, මායම්, පිළිසකර කිරීම්, අළුත්වැඩියාවන් වල නියෙලනු දක්නට ලැබුනි. ටික වේලාවකින් අපද දිය කඳ හරහා ගමන් කොට රාගම නගරයටත් එය සිසාරා අහසින් ගමන් කොට ඉදිරියට යත්ම මහා වාහන පෝලිමකට සෙට මෝල් වෙන්නට සිදු විය. එතැන් සිට පේරලන්ද හංදිය පසු කරණා තුරුත් ඉක්බිත්තේත් දිස් උනේ මහා ජලශයකි. අවම වශයෙන් අඩි  අඩි තුනේ සිට හතර දක්වා ගැඹුරකි යුක්තවූ වැවක් එහි මැවී තිබුනි. එතැන තත්වය වඩාත් අයහපත්වී තිබුනි. මෝටර් රථ සමහරක් වාහන පෝලිම සමග ඉදිරියට ගොස් චිත්ත ධෛර්‍ය බිඳ වැටී පාර අවහිර කරගෙන බල්ලා සහ පිදුරු න්‍යාය අනුගමනය කරමින් ලැගගෙනය.

"රාජා හෝ මා හෝ ගංගාහෝ" සිතා ගත් රජයේ හා හමුදාවේ වාහන කීපයක් `සබ්මැරීන සේ එතෙර යමින්ය .මෙතෙර එමින්ය. ඇස් මනා පිටම මිට්සුබිෂි L300 වැඇන් රථයක් එන්ජිම තුලට වතුර ඇද දුම් දමමින් හැරමිටි ගමනේය. ලියනවානම් කථා ගොඩකි.

මීට පෙර "ඔබේ මෝටර් රිය දියට වැටුනොත්" කියා මා ලිපියක් පලකොට ඇතත් මෙවැනි අවස්ථාවකදී කලයුත්තේ කුමක්දැයි ලියා නොමැත. විශේෂයෙන් කුඩා මෝටර් රථ භාවිතා කරණ මාගේ සහෘදයින් වෙනුවෙන් යමක් ලිවිය යුතු යැයි මාහට ඊයේම සිතුනි. ඇනෝටද මතක් කලෙමි. "දැන් කවුද අනේ බ්ලොග් බලන්නේ?" කියා ඔහු මාව දිරි ගැන්වූ අතර එය ලියා තබන්නට දැන් පටන් ගනිමි. මම මේ අරම්භයක් ගන්නා අතර අපේ දැන උගත් පාඨක පාඨිකාවන් අඩු පාඩු ඉවත් කරණු ඇතැයි උදක්ම බලා පොරොත්තු වෙමි.

ජලයෙන් වැසී ගිය මාර්ගයක් හරහා අප ගමන් කලයුත්තේ කෙසේද?

අප මෙය මේ විදියට පටන් ගනිමු. 

අද පවතින වාහන පෙට්‍රෝල් වාහන, ඩීසල් වාහන, විදුලි  වාහන හා හයිබ්‍රිඩ් වාහන යනුවෙන් වෙන් කර ගැනීමට පුළුවන. පලමුව අප පෙට්‍රෝල් වාහන හා ඩීසල් වාහන ගැන කථා කරමු.

පෙට්‍රෝල් එන්ජිමක් ක්‍රියා කරණ අවස්ථාවේදී  එය තුල ඇති පිස්ටන ඉහල පහල ගම්න්කරණු ලබයි. පිස්ටනය පහලට පැමිනීමේදී  පෙට්‍රෝල් එන්ජිමක් තුලට පෙට්‍රෝල් සහ වායු මිශ්‍රණයක්ද ඩීසල් එන්ජිමක; එය තුලට අවකාශයේ තිබෙන වාතයද ඇතුලට උරා ගනී (Intake Stroke). එන්ජිමේ වට භාගයකදී මෙසේ ඇතුලට උරා ගන්නා ඉන්ධන+වායු මිශ්‍රණය හෝ වාතය සිලින්ඩරය තුල පීඩනයට ලක්වේ (Compression Stroke). මෙය පෙට්‍රෝල් එන්ජිමක 9 ට එකක අනුපාතයට පමණ  තෙරපෙන අතර ඩීසල් එන්ජිමක මෙය 22 ට එකක පමණ දැඩි පීඩනයකට ලක් වේ. (එනම් නිදහස් අවකාශයේ තිබෙන වායු කොටස් ඒකක 22 ක පරිමාව ඒකක 1 ක පරිමාවකට තෙරපීම වේ.)

එන්ජිමක ක්‍රියා කාරීත්වය මෙතැනින් බලා අවබෝධයක් ලබා ගන්න බලන්න.

ඔබ සිතන්න එන්නත් සිරින්ජයක් ගෙන එය ඉදිරිපසින් වසා දමා පසුපස හැන්ඩලයෙන් තෙරපන අවස්ථාව. නො එසේනම් බයිසිකල් හුලං පොම්පයක් එසේ තෙරපන අවස්ථාව. පිස්ටනය ඉවතටම ඇද  ගත් අවස්ථාවේදී සිලින්ඩරය තුලට පිරෙන වාතය පිස්ටනය තදකිරීමේදී  සිලින්ඩරය තුල පීඩනයට ලක්වේ. පිස්ටනය පහතට ගමන් කරත්ම සිලින්ඩරය තුල පරිමාව අඩුවන අතර එයට සාපේක්ෂව එය තුල සිරවී ඇති වාතය සම්පීඩනයට ලක්වේ.

මෙය වායු වල ඇති ගුණයක් සේ පාසලේ 6 වසරේ විද්‍යාව පාඩමේදී උගෙන ගත්තා මතකයි නේද? 

වායුවල භෞතික ගුනාංග:- නියමිත බරක් ඇත! නියමිත  හැඩයක් නැත!! නියමිත පරිමාවක් නැත!!!

ඒ පාඩමේම ඔබට මතකද ද්‍රව වල ගුනාංග ඉගෙන ගත්තා.

ද්‍රව වල භෞතික ගුනාංග:-  නියමිත බරක් ඇත! නියමිත  හැඩයක් නැත!! නියමිත පරිමාවක් ඇත!!!

දැන් අපි නැවත පෙර සඳහන් කල එන්නත් කටුව දෙසට හැරෙමු. එන්නත් කටුව තුලට එන්නත නැතහොත් බෙහෙත් දියරය පුරවා ගත් පසු අපට ඉදිරියෙන් වසා පිස්ටනය හෙවත් හැන්ඩලය තෙරපිය හැකිවේද? නොහැක! මන්ද සිලින්ඩරය තුල ඇති ද්‍රව පරිමාව මගින් පිස්ටනය හිරකොට ඇති නිසාය!

ඔබ සිතන්න පෙට්‍රොල් හෝ ඩීසල් එන්ජිමක් තුලට නො එසේ නම් සිලින්ඩරය තුලට පිස්ටනය මගින් ඇදගන්නා වායුව වෙනුවට ද්‍රවයක් නො එසේ නම් ජලය පැමිණිය හොත් කුමක් සිදුවේදැයි කියා? සිලින්ඩරය පහතට ගමන් කිරීමේදී සිලින්ඩරය තුලට ගලා එන ජලය නැවත පිස්ටනය ඉහලට ගමන් කිරීමේදී තෙරපීමකට හෙවත් සම්පීඩනයට ලක්වේ. එහෙත් වාතය මෙන් ජලයේ (හෝ ද්‍රව වල) පරිමාව වෙනස් නොවේ. එවිට සිදුවන්නේ පිස්ටනය ජලය සමග තෙරපී හිරවීයාමයි.  වේගයෙන් එතෙක් කර කැවෙමින් පවතින එන්ජිමක් මෙසේ හිරවීම (Hydro Lock) සමගම පිස්ටන් අත් කැඩීයාම, ඇදවී යාම, ක්‍රෑන්කය කැඩී යාම, එන්ජින් බ්ලොක් ඒක පුපුරා යාම සිදුවිය හැක! තවත් ලෙසකින් කියනවානම් එන්ජිම ගලවා සම්පූර්ණ අළුත්වැඩියාවකට හෝ අළුතින් එන්ජිමක් සවිකිරීමට උවද සිදුවේ!

මේ සියල්ල සිදුවන්නේ එන්ජිම අභ්‍යන්තරයට හෙවත් සිලින්ඩර තුලට ජලය ගලා ඒමෙන්ය. එසේ ජලය ගලා ඒමට ඇති මාර්ගය වන්නේ එන්ජිම තුලට පිරිසිදු වාතය උරාගන්නා එයා ක්ලීනරය හරහාය. 

මෙයින් තේරුම් ගත යුතු වැදගත්ම කරුණ වන්නේ එයා ක්ලීනරය හෝ එයා ක්ලීනරය තුලට වාතය ඇදගැනීමට වාහනයේ සවිකොට ඇති සොඬ නලය හෙවත් හෝස් පයිප්පය තුලට වතුර ඇතුලු නොවන ගැඹුරක වාහනය පැදවීමෙන් එන්ජිමට කිසිදු අවුලක් නොවන බවය. බොහෝ වාහන වල එයා ක්ලීනරය හා ඉහත කී නල ඇතුළු උපාංග සවි කොට ඇත්තේ එන්ජිම මත හැකි උපරිම උසක් ලබා දෙන පරිදිය. මෙසේ සවිකිරීමට ඇති එකම හේතුව ජලය තරණය කිරීමට අමතර හැකියාවක් ලබා දීමට යැයි වරදවා නොවටහා ගන්න. එයත් එක් හේතුවකි.

එකිනෙකට වෙනස් වර්ග කිහිපයක මෝටර් රථ (කාර්) වල 

එයා ක්ලීනරය නැතහොත් එයා ඉන්ටේක් එක ස්ථානගත කර ඇති ආකාරය!

විශේෂයෙන් මෝටර් රථ වල නැතිනම් කාර් වල මෙම උපාංගය එන්ජිමට ඉහලින් සවි කොට ඇති අතර බොහෝ වෑන් රථවල එයා ක්ලීනරය සවිකොට ඇත්තේ වාහනයේ පසෙකට වන්නට, ඉදිරි පස දොරට පසුපසින් ඉතා පහලින්ය. එවිට එන්ජිම කෙතරම් උසකින් තිබුනත් එයා ක්ලීනරය හරහා ජලය එන්ජිම තුලට ඇදී ඒම නවතාලිය නොහැක.

මෙසේ උවද අන්තර්ජාතික වශයෙන් මෝටර් රථයක් ගමන් කලයුතු උපරිම ගැඹුර ලෙස දක්වා ඇත්තේ සෙන්ටි මීටර 10 ක ගැඹුරක පමණි. එසේම බොහෝ වාහන සෙන්ටි මීටර 30 ක ගැඹුරකදී පාවෙන්නට පටන් ගන්නා බවට අනතුරු හඟවා ඇත.

වාහනයක් ගං වතුර ප්‍රදේශයක් හරහා තල්ලු කරගෙන හෝ වෙනත් වාහනයක් මාර්ගයෙන් ඇදගෙන යාමේදී එන්ජිම තුලට වතුර ගමන් කිරීමේ අවධානම බොහෝ සෙයින් අඩුවේ. මන්ද එන්ජිමේ පිස්ටන් ක්‍රියා කාරීත්වය මගින් ජලය එන්ජිම තුලට ඇද නොගන්නා බැවිනි. එසේ ගං වතුර ස්ථානයෙන් වාහනය ඉවතට ගත් පසු එයා ක්ලීනරය හෝ ඊට සම්බන්ධ සොඬ නලය එනම් එයා හෝස් එක ඉවතට ගලවා එන්ජිම  අසලට ජලය ඇවිත් දැයි සොයා බැලිය හැක.

එවිට සයිලන්සරය තුලින් එන්ජිමට ජලය ගමන් කරණ්නේ නැත්දැයි මෙය කියවන යම් අයෙකුට ප්‍රශ්ණයක් මතුවීමට ඉඩ ඇත. එන්ජින් නිර්මාණය තුලම සයිලන්සරයෙන් එන්ජිම තුලට ගමන් ගන්නා ජලය නැවත පිස්ටනය ඉහලට ගමන් කිරීමේදී ඉවතට ගලා යාම සිදුවේ. 

බොහෝ හයිබ්‍රිඩ් හා විදුලි වාහන වල බැටරිය සවිකොට ඇත්තේ වාහනයේ පතුලේය. එම නිසා ඉතා ඉක්මණින් බැටරිය තුලට ජලය නො එසේ නම් ජල වෂ්ප හෝ පිණි ඇදී යාමෙන් බැටරිය අකර්මණ්‍ය වීමට ඉඩ ඇත. 

SUV රථයක් උවද මිට්සුබිෂි අවුට්ලෑන්ඩර් හයිබ්‍රිඩ් රථයට ගමන් කල හැකි උපරීම ගැඹුර ලෙස නියම කොට ඇත්තේ අඟල්  9 ක ගැඹුරක් තුල පමණි!

නවීන වාහන වල ඇති ඉලෙක්ට්‍රොණික මෙවලම්, හා කොම්පියුටරය ආදී කොටස් වලටද ජලයෙන් හානි විය හැක. 

නවීන ටොයෝටා හයි ඒස් රථයේ එයා ක්ලීනරය පිහිටා ඇති තැන සියැසින් දැක ගන්න.

අප දැන් කථා කල පරිදි වෑන් සහ කුඩා ලොරි රථ වල එයා ක්ලීනරය (එයා ඉන්ටේක් එක) ඉතා පහලින්, පොලොවට ආසන්නව පිහිටි හෙයින් කුඩා වතුරක හෝ යාම කල්පණාවෙන් කල යුතුය. හදිසි අවස්ථාවකදී වෑන් රථයේ එයා ක්ලීනරයේ සිට එන්ජිමට පැමිණෙන සොඬ නලය හෙවත් ඒයා හෝස් එක එන්ජිම අසලින් ගලවා ගතහොත් එයා ක්ලීනරය ජලයේ ගැටුනද ගිලුනද එන්ජිමට සිදුවන හානියෙන් ගැලවී ගත හැක! (මන්ද මෙම වාහන වල  එන්ජිම පවතින්නේ එයා ක්ලීනරය හෝ එයා ඉන්ටේක් එකට ඉහලින් නිසාය.)

සමහර ෆෝ වීල් ඩ්‍රයිව් රථවල එයා ස්නෝකලයක් සවි කොට ඇත. එම නිසා එවන් වාහන වලට ඉතා ගැඹුරු වතුරක හෝ ගමන් කිරීමට හැකියාව පවතී. 

හැකි හැම විටෙකම වාහනය තුල කුඩා නයිලෝන් කඹයක් හෝ වානේ කේබලයක් ලඟ තබා ගන්න. වාහනය ගංවතුර ඔස්සේ පදවාගෙන යනවාට වඩා වෙනත් රථයකින් ඇදගෙන යාම වඩා යහපත් වන බැවිනි.

ගං වතුරක් මැදින් මෝටර් රියක් (කාරයක්) ගමන් කරද්දී; ඉදිරියෙන් ගමන් ගන්නා වඩාත් විශාල ට්‍රක් රථයක්, බස් රථයක් හෝ වෑන් රථයක් පසු පසින් ගමන් ගන්නේ නම් වාසි රාශියක් මෝටර රථයේ රියැදුරුට නොමිලේම ලබා ගත හැක.

මාර්ගය නිශ්චිතව හඳුනා ගත හැක.

මාර්ගයේ කඩතොළු, වලවල් හානිවූ ස්ථාන මග ඇර ගැනීමට අදහසක් ගොඩ නගා ගත හැක. 

මාර්ගයේ සීමාව එනම් කට වහරේ "තාර ගැට්ට" ලෙස හඳුන්වන දාරය හඳුනා ගැනීමටත් තවත් වාහනයක් පසු පසින් ගමන් කිරීම වැදගත්ය.

සුනාමියට සතියකට පෙර රට පුරා මහ වැසි වසිද්දී මා අම්පාරට යමින් විය. පදියතලාව පසුකොට මහඔයට යනවිට මාර්ගය මුළුමනින්ම වැසී තිබුනි. එවිට මා මාර්ගය හඳුනා ගත්තේ මාර්ගය අයිනේ වූ ලයිට් කනු මගිනි.

ඉදිරියෙන් ගමන් ගන්නා වාහනය මගින් ඇති කරවන රැල්ල කරණකොට ගෙන මෝටර් රථයට මුහුණ දීමට ඇති බාධාව අවම කර ගත හැක.

රෝද හා සම්බන්ධ තිරිංග පද්ධතියේ කොටස් තුලට ජලය ගමක් කිරීමෙන් තිරිංග කාර්‍යක්ෂමතාවය අඩුවීමට බොහෝ සෙයින් ඉඩ ඇති බැවින් ප්‍රවේශමෙන් පදවන්න.

හැකි හැම විටම එන්ජිම අඩු වේගයකින් ක්‍රියාත්මක කිරීමට උත්සාහ ගන්න. එවිට යාන්තමින් හෝ ජලය එන්ජිම තුලට උරා ගැනීම තරමකට හෝ මග ඇරෙනු ඇත. වේගයෙන් එන්ජිම රේස් වීමේදී එය තුලට උරා ගැනෙන වායු පරිමාව මෙන්ම තීව්‍රතාවයද ඉහල නැංවේ. එවිට "කොහෙවත් නැති" ජලය උවද ඇද ගැනීමට එන්ජිම පෙළඹේ!

වාහනය තුල මගීන් සියල්ල සිටීම යහපත් ය. මන්ද වාහනය වඩාත් සැහැල්ලුවූ පසු එය පාවීමට පටන් ගැනීම නිසා වහනයේ පාලනය තමා වෙතින් ඉවත් වීමට පුළුවන.

ගං වතුරෙන් ඉවත් වූ පසු වාහනයේ තිරිංග පද්ධතිය තාවකාලිකව අකර්මණ්‍ය වීමට බොහෝ සෙයින් ඉඩ ඇති හෙයින් ඒ සම්බන්ද කොටස් තරමක් රත්වී වියලී යාමට බ්‍රේක් පාදිකය මත යාන්තමින් පය තබා ධාවනය කිරීම හෝ තරමක දුරක් ප්‍රවේශමෙන් ධාවනය කිරීමටද මතක තබා ගන්න.

ගංවතුර ස්ථානයෙන් ඉවතට පැමිණි වහාම එනිජිමේ ලිහිසි තෙල් සමග ජලය කලවම් වී ඇත්දැයි බැලීමද යහපත්ය. ලිහිසි තෙල් හෙවත් එන්ජින් ඔයිල් කලවම් වී ඇත්නම්; ඔයිල් කූර Deep-stick  එක ඇද බැලූ විට ඒවා කිරිපාට වී ඇති බව තහවුරු කර ගත හැක.

කෙසේ වෙතත් වාහනයේ ගියර් ඔයිල් හා ඩිෆරෙන්ශල් ඔයිල් සමග වතුර මිශ්‍රවී ඇත්දැයි පසුව හෝ සොයා බැලීම යහපත්ය.

හදිසියේ වත් ගංවතුර මැදදී එන්ජිම නැවතුන හොත් එන්ජිම පන ගැන්වීමට උත්සාහ නොකරන්න. ජලය එන්ජිම තුලට ගමන් කොට එන්ජිම නැවතුන හොත් නැවත පන ගැන්වීමට යාමේදී එන්ජිම මුළුමණින්ම විනාශ වීමට ඉඩ ඇත!

යම් හෙයකින් වාහනය ගං වතුර මැද දී එන්ජිම නතර වුවහොත් වාහනය තල්ලු කොටගෙන හෝ වෙනත් වාහනයකින් ඇද ඉවතට ගන්න. ඉන් පසු මා පෙර කී පරිදි එයා ක්ලීනරය ගලවා ජලය ඊට ඇතුළුවී ඇත්දැයි සොයා බලන්න. 

පෙට්‍රෝල් වාහනයක නම් පුළිඟු පේනු හෙවත් ස්පාර්කින් ප්ලග් සියල්ල  ගලවාද ඩීසල් වාහනයක් නම් ඉන්ජෙක්ටර සියල්ල හෝ හීටර් ප්ලග් සියල්ල ගලවා හෝ එන්ජිම ස්ටාටර් මෝටරයෙන් කරකැවීමෙන් එන්ජිම තුල ජල ඇත්දැයි කියා නිශ්චය කර ගැනීමටත්; ජලය එන්ජිම තුලට ඇතුළුවී තිබුනේ නම් එය ඉවත කර ගැනීමටත් මෙමගින් හැකියාව ලැබේ.

හයිබ්‍රිඩ් හෝ විදුලි වාහනයක බැටරිය තුලට ජලය යාන්තමින් හෝ ඇතුළුවී ඇත්දැයි පසුව හෝ නියමිත තාක්ෂණික ඥානය ඇති පිලිගත් ආයතනයකදී පරීක්ෂා කර බලන්න.

මෙය කියවන මහත්වරුන් නෝනා මහත්වරුන් මෙහි යම් අඩුපාඩුවක් වෙත් නම්; මෙය නිවැරදි කරණමෙන්ද; අළුතින් යමක් එක් කිරීමට අවශ්‍ය වේනම් එසේ කරන මෙන්ද ඉතාමත් ඕනෑකමින් යුක්තව මෙයින් ඉල්ලා සිටිමි.

198. පැනි බේරෙණ කොම්පැනි කථා 1

ක්‍රියාන්විතයේ මුල් ගමන් කරුවෝ නලීන්-හුස්නි-සෆ්ෆ්‍රාස්

 

කනු කුනු නොගෑ කුණු ප්‍රශ්ණය! 

මා වසර දොලහක් සේවය කල යුනයිටඩ් මෝටර්ස් සමාගමේ සිට අවසන් වතාවට සේවය කල ඔටෝමිරාජ් ආයතනය වෙතට පැමිණීම සිදු උනේ හරිම අනපේක්ෂිත විදියට. ඇත්තටම ඊට මුල් උනේ මගේම හදවත කිව්වොත් මම වඩාත් නිවැරදියි!

වසික කැන්ගරු දේශයට ගිය අලුත එයාගේ තනිය ටික කාලෙකට හරි මකා දමන්නට එහාට යන්න මගේ අදහසක් තිබුනා.

නමුත් ඒ සඳහා වීසා ගැනීමේ සිට වෙනත් වෙනත් කටයුතු වලට කාලය ගතවන විට ඔටෝ මිරාජයට සෙට් වෙන්නට කරුණු කාරණා යෙදුනා.

දෙමටගොඩ ඔටෝමිරාජය යනු ඔටෝමිරාජ් සමූහයේම වැඩිම ආදායම් ලබපු ශාඛාව නැතිනම් ඒකකය.

අපේ ඉලක්කය වූයේ මසකට මිලියන 15 ක්. අපි මිලියන 10 ක 12 ක මට්ටමක් සැමදා පවත්වාගෙන ගියා.

මගේත් එක්ක ලොකු කණ්ඩායමක් වැඩකලා.

එයින් ප්‍රධාන උනේ රුෂාන් මල්ලී.

ඔහු මට සෙවනැල්ල සේ එකටම අදටත් සිටින මිත්‍රයෙක්.

ගැන්සිය - දකුණේ සිට - රුශාන්, ජනක, මලීෂා, ප්‍රියන්ජි, අසේල. සෆ්ෆ්‍රාස්, සුගත්, පොඩි ඉසුරු, ලසන්ත

ඊට අමතරව අසේල, සෆ්‍රාස්, රොක්සි, නලීන්, නන්දික, මනෝජ්, සුදත්, විජේ, සම්පත්, ලසන්ත, ප්‍රියන්ජි වගේ නිළධර කාඩරයකුත් ඔවුන් වෙතින් පාලනයවූ දෙමල, සිංහල, මුස්ලිම් එළ කොල්ලො සෙට් එකකුත් එතන හිටියා.

රුෂාන් ඔපරේෂන් එක; එහෙම නැතිනම් ක්‍රියාන්විතය මුළුමනිනම දිවැව්වා.

එයාට ඒ සඳහා තිබුනේ අනර්ඝ පලපුරුද්දක්.

මම පෞද්ගලිකව රුෂාන්ගේ කළමණාකරණයටත් පොදුවේ අනෙක් අයගේ කටයුතු වලටත් අනවශ්‍ය බලපෑම් කරණ්න ගියේ නෑ.

මට අවශ්‍ය වුනේ ආයතනයේ සේවාවේ ගුණාත්මක බව ඉහල මට්ටමකට ගෙන ඒමයි.

ඒ සඳහා මම කුඩා කුඩා අත් හදා බැලීම් කලා වගේම ඉන් බොහොමයක් සාර්ථක උනා. වාහනයක් සේවාවෙන් පසු ආයතන භූමියෙන් ඉවතට යන අවස්ථාවේ දී කරණු ලබන අවසාන සුපරීක්ෂනයේදී වීල් නට් හෙවත් රෝද වල ඇන පරීක්ෂා කිරීමටත් ප්‍රමිතියට තද කිරීමටත් ටෝක් රින්ච් පාවිච්චිය හඳුන්වාදීම ඉන් එකක්.

හරිනේ! ඇයි වැරදිද? අසේල මුල්ම ටෝක් රින්ච් එකෙන් වැඩ පෙන්වමින්

වමේ සිට - අසේල, හසන්, වික්‍රමසිංහ, කුමාර, ලසන්ත, සම්පත්

අදටත් එය එහි සාර්ථකව කරගෙන යනු ලබනවා.

නමුත් ආයතනයට පැමිණි මුල් දිනයේම මා දුටු; මවිසින් පළමුව විසඳිය යුතු ප්‍රධාන ගැටළුව වූයේ අපද්‍රව්‍ය කළමණාකරණය කියලා මට ඒත්තු ගියා.

දිනපතා එකතුවන විශාල අපද්‍රව්‍ය හෙවත් කුණු බැහැර කිරීම සඳහා සතිපතා ලොකු වියදමක් දැරීමට වාගේම ඒ සඳහා නගර සභාවෙන් වාහනයක් ගෙන්වා ගැනීමට ආයතනයක් ලෙසට අපි සැවොම මුහුණ දුන් අප්‍රසන්න අත්දැකීමක් උනා.

මෙය මට මහත්වූ අභියෝගයක්නේ ආණ්ඩුවටවත් විසඳ ගන්න බැරි!? 

එය මා සතුටින් භාර ගත්තා.

පළමුව ආයතනයේ එක් වන කුණු මොනවා දැයි සොයා බැලුවා. එතනදි මම තේරුම් ගත්තු දෙයක් තිබුනා අනිවාර්‍යයෙන්ම එක්තු වන අපද්‍රව්‍ය හා අපට පාලනය කරගත හැකි ඒවා ලෙස කොටස් දෙකක් ඇති වග.

මොනවද මේ අනිවාර්‍යය කුණු:- ඒවා තමයි වාහන වලින් ඉවත් කරණු ලබන දැවිතෙල් හෙවත් කළු තෙල්. අනෙක ඉවත් කරණ පෙරහන් හෙවත් ෆිල්ටර් ඊළඟට ලිහිසි තෙල් කෑන් හා වෙනත් ඇසුරුම්.

මම ආයතනයට යන විට දැවිතෙල් බැරලයක එනම් ලීටර 200ක මිල වූයේ රුපියල් 7500ක්. මමත් රුශානුත් එකවුන්ටන් ප්‍රියන්ජිත් එකතුව අපි තීරණයක් ගත්තා කළුතෙල් බැරලයක මිල රු: 10,000 කට ඉහල දැමීමට. ඒ පියවර කිහිපයකින්. පලමුව එය රු: 9000 කට ඉහල දැමීමට සමත් උනා.

 ඒ ගැනත් පොඩිත්තක් ලිව්වොත් හොඳයි වගේ. මේ කළු තෙල් විකුණන මුදල බැර උනේ අපේ අර මුලින් කීව මල්ලිලාට උදේ කෑම එක දෙන්න. තෙල් වලට ලැබෙන මුදල මත තමයි අපිට මේ දරුවන්ට දෙන්න පුළුවන් කෑම එකේ ගුණාත්මක බව තීරණය උනේ!

මෙහෙම තෙල් විකිණීමට මෙතෙක් පැවති ඒකාකාර මිල ඉහල දැමිය හැකි වේ දැයි බොහෝ දෙනා හට කුකුසක් තිබුනා.  ඒ පිළිබඳව වගකීම මා භාර ගත්තා. නැවත කළුතෙල් මිළදී ගන්නා අය ආ විට; ඔහුව මා මුණ ගැසීමට තීරණය කලා. දිනක් සවස් වරුවේ තෙල් මුදලාලි ආ විගස ඔහුව මා වෙත ස්ටෝරුවේ මනෝජ් රැගෙන ආවා.

ඔහුගේ නම ලැම්බර්ට්!

"ලැම්බර්ට් ඔයාට එන්න කිව්වේ අපට ඉදිරියේ ඔයාට තෙල් දෙන්න බැරි වෙන බව කියන්න!" මම කීවේ  පොඩි බොරුවක්.

"ඒ මොකද සර්!?"

"නෑ! අපේ ඔටෝමිරාජ් ඔක්කොම ඒවායෙ තෙල් ගන්න එක්කෙනෙක් ටෙන්ඩර් එකක් දාලා තියෙනවා. එයා 9000 ගානේ ගන්නවාලු. ඒ හින්දා අපිට තෙල් පිට දෙන්න එපා කියලා හෙඩ් ඔෆිස් එකෙන් කියලා තියෙනවා. වෙනසක් උනොත් මම ඔයාට දන්වන්නම්."

"හරි සර් මම 9000 ට ගන්න කැමති උනොත්?"

"මට දැන්ම ඒක ගැන කියන්න බෑ! මම හෙඩ් ඔෆිස් එකෙන් අහලා ඔයාට දන්වන්නම්!"

ඒ කෙටි වේලාව අවසන් උනේ අපේ ඉලක්කය සපුරා ගනිමින්.

අපිට ෆිල්ටර විකිණීමත් නියමිත ක්‍රම වේධයකට සකස් කර ගන්න පුළුවන් උනා.

ඒ වගේම හිස් කෑන් සියල්ල ප්ලාස්ටික් කැට හදන තැනකට විකුණා ගන්නටත් පසුව ප්ලාස්ටික් එකතු කරණා අයෙකු අපගෙ ආයතනයටම විත් හිස් කෑන් වතුර බෝතල් කිලෝ ගානට අරං ගියා. ඒ කුණු සේරම මුදල් කර ගැනීමට හැමෝම මට උදව් කලා!

දැන් තමයි සංකීර්ණ ප්‍රශ්නය:

දෙවෙනි අපද්‍රව්‍ය උනේ පාලනය කල හැකි කුණු!

මෙහි ප්‍රධාන වශයෙන් තිබුනේ කෑම ඔතන කඩදාසි, ලන්ච් ශීට්, ඉඳුල්.

ඒ වන විට ආයතනයේ 40 කට අධික සේවක පිරිසක් සේවය කලා.

ඔවුනට උදෑසන සහ දිවා ආහාරය දුන්නේ ආයතනයෙන්මයි, උදෑසන ආහාරය මුළුමණින්ම නොමිලේ වුනු අතර දිවා ආහාරයට අය කලේ අඩක් පමණයි. ඉතිරිය ආයතනයෙන්. මේ ආහාර ගත්තේ සැපයුම් කරුවන් දෙදෙනෙකුගෙන්. ඔවුන් ගෙනා ආහාර වල ගුණාත්මක භාවය කෙසේ වෙතත් ප්‍රමාණාත්මක භාවය ඉහල මට්ටමක තිබුනා. මේ නිසා විශාල ඉඳුල් ප්‍රමාණයක් මෙන්ම කෑම ඔතන කඩදාසි කොල 80ක් ද ලන්ච් ශීට් 80ක් ද අනිවාර්යයෙන්ම දිනකට එකතු උනා.

මම අළුත් අදහසක් ගෙනාවා.

"අපි කෑම ගේන්න කියමු ප්ලාස්ටික් පෙට්ටියක. උදේට ගේන එක්කෙනාට පෙට්ටි 40 කුත් දවල් කෙනාට පෙට්ටි 40 කුත් අරණ් වැඩේ පටන් ගන්න කියමු."

"පෙට්ටි එතකොට අපි අරන් දෙනවා?" ප්‍රියන්ජි ඇහුවා.

"නෑ! නෑ!! නෑ!!! එයාල ගන්න ඕනෙ! එයාලට දැන්ටත් කඩදාසි වලට ලන්ච් ශීට් වලට මුදලක් වැයවෙනවානේ!? ඒක ඉතුරුයි. අපි එයාලගෙන් අනිවාර්‍යයෙන්ම මාස තුනක් කෑම ගන්න පොරොන්දු වෙනවා! එතකොට එයාලගෙ ඉනීශියල් කොස්ට් එක කවර් වෙනවා. ඊළඟට වෙන සප්ලයර් කෙනෙක් ගෙන් අපි කෑම ගන්න පටන් ගත්තොත්; මේ බොක්සස් ටික අළුත් සප්ලයර්ට ගන්න කියනවා මෙයාට සල්ලි දීලා!?

"ඔව් එහෙම නම් එයාලා කැමති වෙයි!" ප්‍රියන්ජි සැනසුම් සුසුමක් හෙළුවා.

"ඔව් එතකොට ඒගොල්ලන්ට පාඩුවක් නෑනෙ . . . !? රුශාන් මල්ලි මගේ පැත්තට කථා කලා - නිකං දී කිරට බලල්ලුත් ඥාව් ඥාව් ගානවා වගේ. (ඌ කොහොමත් මාව බේර ගන්නවා!)

"එතකොට ඉඳුල් . . ? (මට මතක නෑ කවුද ඇහුවේ කියලා නම්!)

"ඉඳුල් එයාලා ගෙනියන්න ඕනෙ!!!!!!" මම ගානක් නැතිව කිව්වා.

"මොන පිස්සුද? ඒකට නම් කවුරුවත් කැමති වෙන එකක් නෑ!" රුශාන්ද මංදා කිව්වේ.

"හරි සප්ලයර්ස්ලා දෙන්නාව අදම හවස මීටින් එකකට එන්න කියන්න!" අපි එයාලත් එක්ක කථා කරමු. මම උන්ට කථා කරණ්නං! උඹලා මට ග්‍රවුන්ඩ් සපොර්ට් එක දෙන්න ඕනෙ! හාද?"

"හරි හරි! හා හා!! ප්‍රියන්ගි අක්කේ!? අපිටත් ගුටි කන සීන් එකක් තමයි සෙට් වෙන්න යන්නේ" කවදත් ඕන එකකට කින්ඩිය දාන රුශාන් කියගෙනම පහලට ගියා.

හවස මීටිම සෙට් උනා. මාත් හිටියේ තරමක චකිතයකින්. ඒත් මගේ හිතේත් චකිතයක් තිබුනාට සාධාරණ තර්කයක් තිබුනා මේ "ඉඳුල් රිටර්න්" වැඩේ ගැන!

සප්ලර්ස්ලට මාව අඳුන්වලා දුන්නේ ප්‍රියන්ජි වගේ මතක.

මම මගේ  කථාව පටන් ගත්තා. ඔවුන්ට වටහා දුන්නා කෑම පෙට්ටි වල කෑම ගේන එකේ තියෙන වටිනාකම. ඒක එයාලට ලාභ දායක වන හැටි. කථාව දිගට යන්න ලැබුනේ නෑ. ඒ අය අකමැති උනා මේ කරදර වලට.

මොනවා කරණ්නද? මට පරාජය භාර ගන්න උනා.

මම එවෙලේම ස්ටෝරුවේ මනෝජ්ට කථා කරලා කිව්වා හෙට දවස ඇතුලත අපිට අළුත් සප්ලයර්ස්ලා දෙන්නෙක් හොයාගෙන එන්න කියලා.

"මනෝජ් මල්ලී උඹ මුකුත් කියන්න යන්න එපා. මං ගාවට එක්කගෙන එන්න. ඔය කෑම පෙට්ටි හුට පට ගැන උඹ කථා කලොත් වැඩේ අල වෙනවා!"

"හරි සර්! මම මුකුත් කියන්නෙ නැතිව කෑම සප්ලයි කරණ්න පුළුවංනං සර්ව ඇවිත් හම්බෙන්න කියන්නම්!"

"එළ!'

පසුදා  වන විට අපට අවස්ථා දෙකකදී  සැපයුම් කරුවන් දෙදෙනෙකු මුණ ගැසීමට හැකිවිය. දෙදෙනාම පෙට්ටි කථාවට දෙදෙනාම පහසුවෙන් එකඟ කර ගැනීමට අපහට පුළුවන් විය. මා ඔවුන්ව අපේ අවශ්‍යථාවයට පොළඹවා ගැනීමට කථා කරණ විට එයට ප්‍රියන්ජිත් රුශානුත් ම ග්‍රවුන්ඩ් සපෝර්ට් එක දුන්නෝය.

පහසුවෙන්ම  සැපයුම් කරු අපගේ පෙට්ටි සීන් එකට නවා ගත්තෙමු.

ඊළඟට "ඉඳුල් රිටර්න්" සීන් එක.

"දැං ඔයා හොඳ කෑම එකක් දුන්නොත් අපේ කොල්ලෝ පෙට්ටිය වත් ඉතුරු කරණ්නේ නෑ! කෑම අවුල්නම් ඉඳුල් ඉතුරු වෙනවා! පිළිගන්නවාද? ඔව්! (උං "ඔව්!" කියන්නටත් කලිං මම ම "ඔව්!" කියාගෙනම කථාව ඇද්දෙය!) දැන් ඔයාලා හැම පෙට්ටියටම කෑම පුරෝලා දාන්න යන්න එපා. සයිස් දෙකකට හරි තුනකට හරි කෑම එවන්න. එතකොට අඩුවෙන් කන කෙනාට පොඩි කෑම එකක්. ගොඩක් කන කෙනාට ලොකු එකකුත් ගන්න පුළුවන්. හරිනේ? ඒක ඔයාලටත් ලාභයි කෑම අපතේ යැවෙන්නෙත් නෑ. හැබැයි එක දෙයක්! අන්තිමට ඉතුරු වෙන කෑම අපි පොඩි ශොපින් කවරෙකට දාලා තියනවා. ඔයා ඒක අරන් යන්න ඕනෙ ආපහු! ඔයා හොඳට - ගානට කෑම දුන්නොත් ඔයාට මෙච්චරක් වත් ආපහු ගෙනියන්න වෙන්නේ නෑ!" මම අත් දෙක එකට තබා දෝත ඔහුට පෙන්වීය.

අපරාදෙ කියන්න බෑ. ඔවුන් ඊට එකඟ විය.

අපේ පවිත්‍රතා අංශයේ අංශාධිපති මිස්ටර් පෙරෙරාටත් වැඩ අඩු විය. සතියක් යනකොට සියළු දෙනා වඩේට එකෙන්ම සෙට් විය. සහරාන් බෝම්බ ගසනා තුරු වඩේ පුරා වසරක වැනි කාලයක් නියමෙට නැගලා ගියා. 

ඔබ පිළිගන්නවාද? අන්තිමට නගර සභාවට පටවන්න කුණු නැතිවූ වග?

වරක් රජයේ නිළධාරිණියක් පැමිණ අපගේ අපද්‍රව්‍ය බැහැර කරණා අන්දම ගැන විමසුවාය.

"අපිට එහෙමට කියලා කුණු නෑ මිස්!"

"මොකක්!?"

"ඔව්! අපි කුණු ප්‍රශ්නය විසඳා ගෙන තියෙන්නේ මෙහෙමයි! . . . . . . . . . . . . . .!!  රුශානුයි මමයි තරඟෙට මෙන් කියාගෙන කියාගෙන ගියා! මිසී ඇස් උඩ තියාගෙන  යන්න ගියේ අපි නිකං දුන්නු ස්මැක් දිවුල් බීම එකත් නොබීම!

ආතල් එකේ වැඩ - රුශාන් මල්ලීත් රොක්සිත්  එක්ක!

අප ආයතනයකට වේවා. පලාතකට වේවා, රටකට සේවය කරණා විට; නායකත්වය සපයන විට එය පාලනය කලයුත්තේ සැපයුම් කරුවන්ගේ ඕනෑ එපාකම් වලට අනුව නොව එකී සංස්ථාවේ උන්නතිය සුභ සිද්ධිය උදෙසාය! මෙසේ කල හැක්කේ ජරාව නොකන එවුංට පමණි. සැපයුම් කරුවන්ගෙන් ජරාව කන එකා සැපයුම් කරුවාට නැවේ. ඉන් පසු ක්‍රියාවට නැගෙන්නේ සැපයුම් කරුවාගේ න්‍යාය පත්‍රයයි!

සියල්ල අතිශය සාර්ථකව කෙරුණි. අති මහත් බහුතරයකගෙ ආශීර්වාදය මත වැඩේ ලස්සනට ගියේය. එතෙක් බත් කොලේ මේසය මත එළාගෙන කෑ කොල්ලන් කෑම පෙට්ටියක පිළිවෙලට අසුරා තිබුනු බත් එක මා සමගම එක මේසයේ කෑවෝය.  ගෙදර වසිකලාට;  ඉතුරු කරණ්නට ඉඩ නොදී; බලෙන් ඇන ඇන කවන ලෙසින්ම උන්ට එළවළු මැල්ලුම් ඉතුරු කරණ්නට නොදී කන්නට බල කලෙමි! උන් මගේ වයසට ගරු කල නිසාදෝ නො එසේනම් අනුකම්පා කල නිසාදෝ; මැල්ලුම්, කරවිල, හාල් මැස්සෝ; තිබ්බොටු වැනිදේ කරබාගෙන ගිල දැමුවෝය. ඇත්තෙන්ම එය අතිශය සුන්දර මතකයකි!

කොහොමටත් තිබ්බොටු කෑම මගේ ජීවිතයේ අමරණීය මතකයකි!

197. තිස් අවුරුදු රථ මතක . . . . ! (7)

Austin MINIයේ අවසානය හෙවත් දුක්ඛ දායක සමුගැනීම ලියන්නට මත්තෙන් වෙනත් අද්විතීය වාහනයක් ගැන ලිවිය යුතුය.  මන්ද මිනියට සමුදෙන්නට සිදුවූයේ එය කරණකොට ගෙනය. ඒවන විටත් MINIය වයසට ගිය කෙනෙකි. ඒ නිසාම ඒ සඳහා සුපිරිම නඩත්තුවක් අවශ්‍ය විය. බොහෝ බාසුන්නැහැලා වාහනයේ බොනට්ටුව ඇරිය සැනින් වසා දමති. ඒ එය තුල තිබුනු 850CC එන්ජිම දැකීමෙන් උපන් අපුල නිසාය. ඔවුන් එක්ෂනයෙන් පවසන්නේ 1000CC එන්ජිමක් සවිකල යුතු බවයි.

850 යේ දොරවල් සාපේක්ෂව දිගින් මදක් අඩුය. ඒවාට සවිකොට තිබුනේ බස් වීදුරු මෙන් ඉදිරියට හා පසුපසට තල්ලු කල හැකි වීදුරුය. මේ නිසාම කාරය තුල ඉහල උනුසුමක් පැවතීම සැක්කරයාටහෝ නවතා දැමීමට නොහැක. මෙය ලැන්ඩ් රෝවර් සීරීස් රථ වලටද පොදුවූ කරුමයකි. ඒංගලන්තයට ගැලපෙන අයුරින් ඒවා නිපදවා ඇති අතර සමකය ආසන්න රටවල එවුන් හට මේ වාහනයක රැගෙන ගොස් ආසාවට බිත්තර කෝපි එකක් හෝ බුල්ස් අයි එකක් කෑමට නොහැක. මන්ද ඒවා නිවසට ගෙනයාමට මත්තෙන් හාෆ් බොයිල් වන බැවිනි!

1000CC රථයට එන දිගින් වැඩි දොරවල් වල වීදුරු හෙවත් ෂටර වයින්ඩරයෙන් ඉහල පහල යැවිය හැකි බැවින් විශාල ඉඩ පලලක් අවට වායුගෝලයට නිරාවරණය වේ. එහෙත් මෙම දොරවල් සවී කිරීමට නම් පසුපස දොර කණුව එනම් දොර අගුළු සවිවෙන B පෝස්ටුව කපා පසුපසට ගෙන යා යුතුය.

තවද 850CC වාහනයේ බ්‍රේක් ඩ්‍රම් නිපදවා තිබුනේ ඇළුමීනියම් වලින් වන අතර එමගින් සාර්ථක තිරිංග කාර්‍යක්ශමතාවයක් බලාපොරොත්තුවිය නොහැක. මේ සකල විධි අපල  සමග එකල තිබුණු ආර්ථික වපසරිය තුල මිනිය දිනෙන් දින අගාධයට යෑම වලක්වා ගත හැකි නොවීය. මා බලාපොරොත්තු වූයේ හැකි ඉක්මණින් 4WD රථයකට මාරු වීමය.

දිනක් වාහනයක් සොයමින් මීගමුව පාරේ කරක් ගසමින් සිටි මාහට කඳානේ පිහිටි නිපෝන් එන්ටර්ප්‍රයිසස් නම් වූ කාර් සේලය තුල පසෙකින් නවතා තිබුණු සුපිරි රථයක් ඇස ගැටුනි. ඒ අනෙකක් නොව 31ශ්‍රී5460 දරණ ටොයෝටා ලැන්ඩ්කෲසර් BJ40 යකි. වාහනයේ පොත (ඒය පොතක්ම විය!) තිබුනේ පොලොන්නරුවේ රන්කෙත රෙස්ටුරන්ට් නමටය.

හ්ම්ම්! හ්ම්ම්! මොකද මෙයාගෙ දත් ඇන්ද දික් වෙලා!?

ලෑන්ඩ්කෲසර් BJ40 කාණ්ඩය නැතිනම් මොඩලය ජපානයේ 1960 සිට 1984 දක්වාත් බ්‍රසීලයේ 1968 සිට 2001 දක්වාත් නිපදවුනු රථයකි.

ලෑන්ඩ්කෲසර් පිළිබඳව මෙතැනින් කියවන්න.

J කාණ්ඩය ටොයෝටා SUV රථ වලට ලැබෙන සංඛේතය. නවතම ලැන්ඩ්කෲසර් සහරා, ප්‍රාඩෝ, V8 ඔය ඕනෑම රථයක චැසි නොම්මරයේ J අකුරක් තිබිය යුතුමය. එසේ නොමැතිනම් එහි කොහේ හෝ වරදක් තිබිය යුතුමය. 40 යනු මොඩලය, මෝස්තරය වන අතර ඉදිරිපසින් යෙදෙන අක්ෂරයෙන් හෝ අක්ෂර කිහිපයෙන් එන්ජින් මාදිලිය දැක්වේ. 

කොටින්ම ටොයෝටා වාහන වල චැසි අංක දැක්වෙන්නේ පලමුව එන්ජින් කාණ්ඩයත් දෙවනුව එකී වාහන කාණ්ඩයට  දී ඇති සංඛේතයත් තෙවනුව එකී මොඩලයට දී ඇති අංකයත් යන ත්‍රිවිධ කාරණා එක් වීමෙනි.

BJ40 යනු B (B, 2B, 3B) එන්ජිමක් සහිත J එනම්SUV; 40 නමැති මොඩලය.

KZN185 යනු 1KZ එන්ජිම සහිත N එනම් ඩබල් කැබ් හෝ සර්ෆ් 185 මොඩලය.

LN106 යනු 3L එන්ජිම සහිත N එනම් ඩබල් කැබ් 106 මොඩලය.

KDH යනු 1KD එන්ජිම සහිත H එනම් වෑන් රථය

LH30 යනු L එන්ජිම සහිත H එනම් වෑන් 30 මොඩලය

BJ40 යනු B, 2B, හෝ 3B එන්ජින් වලින් සමන්විත රථයන්ය. මෙහිදී මෙම එන්ජින් එනම් B එන්ජින් යනු සිලින්ඩර හතරේ ඩීසල් එන්ජින්ය. මේවායේ එන්ජින් ධාරිතාවයන් පිළිවෙලින් 3000cc, 3200cc  හා 3400cc වේ. (B එන්ජිමක නිවැරදි එන්ජින් ධාරිතාව ඝන සෙන්ටි මීටර 2997 හෙවත් 2997CC ය. එය ආසන්න වශයෙන් 3000CC ලෙස දැක්වේ.)

මෙම මාදිලියම F (3800cc) සහ 2F(4200cc)  පෙට්‍රෝල් එන්ජින් සමගින් එන රථ FJ 40 ලෙසද ඩීසල් සිලින්ඩර හයේ H (3600cc) හා 2H (4000cc) එන්ජින් වලින් සමන්විත රථ HJ 40 ලෙසද දැක්වේ. මෙම ලෑන්ඩ් කෲසර් රථය පිලිවෙලින් 40, 43 හා 45 ලෙසින් දිග අනුව වෙනස් සංඛේතයන්ගෙන් නිපදවිය.

40 

43

45

45

මෙහිදී HJ45 යනු ට්‍රක් රථය හෝ ටෲපි හෙවත් බස් රථය වන අතර එහි අන්තර්ගත වන්නේ H (3600CC) එන්ජිමක් වන අතර HJ47 යනු 2H (4000CC) එන්ජිමක් සහිත ට්‍රක් රියයි.

HJ45 රථයේ ඉදිරිපස ඇත්තේ ඩ්‍රම් බ්‍රේක් වන අතර HJ47 රථයේ ඉදිරිපස ඩිස්ක් වේ. HJ45  සමන්විත වන්නේ වේග හතරේ (4 Speed) ගියර් පෙට්ටියක් වන අතර HJ47 රථයේ වේග පහේ (5Speed) ගියර පෙට්ටියක් සවිකොට එවා ඇත. එන්ජිම H (3600CC) සිට 2H (400CC) දක්වා වැඩිදියුණු වී ඇති අතර දුනු වල ගුන්ඩු හෙවත් Leaf Spring Eye විශාල ඒවා පැමින තිබේ. ඊට අදාල ලෙස දුනු ෂැකල් සහ හැඟර් වල දුනු පින් විශාල ඒවා පැමින ඇති අතර දුනු හැඟර සඳහා එන දුනු පින් දුනු සමග භ්‍රමණය වීම නවතා ලීමට එන කුඩා ලොක් ඇන දෙකක් වෙනුවට එකකින් සැහීමට පත්වීමට සිදුවී ඇත. ඩෑෂ් බෝඩයේ සුළු සුළු වෙනස් කම් කිහිපයක් සිදුකොට ඇත.

45 දුනු පින් සහ ලොක් ඇන

47 දුනු පින් සහ ලොක් ඇන

මා කලින් කියන ලද රථය B එන්ජිමකින් සමන් විත BJ40 රථයකි. වර්ණය සුදුය. 

වාහනය මිළදී ගන්නට මත්තෙන් එහි චැසිය පරීක්ෂා කල විට එහි වම්පස හා දකුනු පස එනම් දෙපසම කැඩී වෙල්ඩින් කර තිබෙනු දක්නට ලැබුනි. එකල පංචිකාවත්තේ සිටි ජීප් උස්තාද්ලා වූයේ ජොර්ජ්, ස්ටැන්ලි, ආරුමුගන් ආදී අයයි. මේ අය අතරින් දැනට ජීවත්ව සිටින්නේ ආරුමුගන් පමණි. ලැන්ඩ් රේවර් පකීර් කෙනෙකු වූ කිරිබත්ගොඩ ඔසඳ දැනට වැඩ පෙන්වන 6X6 ලැන්ඩ් රෝවරය ඔහුට ලබාදී තිබුනේ ස්ටැන්ලි විසින්ය. එය යුධ හමුදාවට දිගු දුර තුවක්කුවක් සවිකොට පැමිණි රථයක් බවත්, පනාගොඩ දී වෙන්දේසි කරණ විට එහි චැසිය කොටස් කිහිපයකට කපා වෙන් කොටතිබූ බවද ස්ටැන්ලි වරෙක මා හට පැවසීය. මීට අමතරව BCC වත්ත අසල වැලි වත්තේ අංක 11 හා 12 කඩවලද ජීප් සඳහා කෑලි බෑලි ස්ථානගතවී තිබුනි. සුදු සරම අඳින ස්ටැන්ලිද ආරුමුගන් මෙන්ම මනුස්සයෝය!

6X6 ලැන්ඩ් රෝවරය

ජෝජ් ගැන කීමට ඇත්තේ එකල 4DR5 එනම් මිට්සුබිෂි ජීප් සොහොනක් ඔහු සතුව තිබුනු බවයි. එම රථයේ ඕණෑම ඇනයක් මුරිච්චියක් හඳුනා ගැනීමට හා සැපයීමට ශක්‍යතාවයක් ඔහු සතු විය. ඊටත් වඩා ඔහුට තිබුනු විශෙෂ හැකියාව වූයේ පාරිභෝගිකයාහට එම අමතර කොටසට ඇති ලෙංගතුකමේ සීඝ්‍රතාවය හා ඊට ගැලපෙන අයුරින් පාරිභෝගිකයාගේ අම්ම තාත්තා සිහි ගැන්වෙන අයුරින්; අමතර කොටස මිළ කිරීමයි! කොටින්ම ඔහුගෙන් යමක් මිළදී ගැනීම ඉතා අපහසු කාර්‍යයකි. ඔහු තබන මිළ පාරිභෝගිකයා පහත හෙලා ඉල්ලුවහොත් අමතර කොටස ගබඩාව තුලට වීසිකොට දමා "එය විකුනණ්නේ නැති!' බව කියා පාරිභෝගිකයා එළවා ගන්නා අයුරු මා දැක ඇත.

චැසිය කැඩුනු මෙම වාහනය ගෙන එයට චැසියක් මාරු කිරීම මාගේ අදහස විය!

ඒ සඳහා මා දූරකථනයෙන් ආරුමුගන්ටත් ඔහු ලවා ස්ටැන්ලි ලඟත් චැසියක් සොයා බැලූමුත් ඔවුන් ළඟ චැසියක් නොවීය. අවසානයේ චැසියක් තිබෙන බව දූරකථනයෙන මා කල විමසීමට පැවසූයේ ජෝර්ජ් පමණි!

මා 31 ශ්‍රී 5460 ලැන්ඩ්කෲසර් BJ40 රිය මිළදී ගත්තේ රුපියල් 152500/= (රුපියල් එක්ලක්ෂ පනස් දෙදහස් පන්සීයකට) ය. මේ 1997 මාර්තු 18 වෙනිදාය.

රිය ගෙදරට ගෙන ආ දිනය මහත්වූ උත්කර්ශවත් දිනයක් විය.

එහි ප්‍රධාන ගැටළු කිහිපයක් විය.

චැසිය ස්ථාන දෙකකින් කැඩී තිබූ අතර දොර වීදුරු හොඳින් උස් පහත් නොවීය. එසේම ඉදිරිපස ඩිෆරෙන්ශලයේ ඇක්සලයේ ගෲ සහ ඊට සම්බන්ධ වන සම්බන්ධවන ෆ්ලාන්ජ් එකත් කෙටී කරකැවී ජෑම් වී තිබුනි.

ඇක්සලයේ ගෲ සහ ෆ්ලාන්ජ් එක

මා ඉක්මණින්ම සූදානම් වූයේ එම කටයුතු නිමා කර ගැනීමටය.

ප්‍රේම්කීර්ති ලියා නිරංජලා ගයන ලස්සන ගීතයක් ඇත "ඔබ දැක ගැනීමේ අරමුණ දිවා රැයේ - දෑසේ කැවී කැවී වැලි ලෑ විලාසේ . . //" යනුවෙන්. මේ වගේම තමයි බොහෝ පිරිමින්ට තමන්ගේ වාහනයක ලෙඩක් දුකක් කරදරයක් තියෙන කොට; ගෙදර මායියට ලෙඩක් දුකක් තියෙනවාට වඩා ඉවස ගන්න බැරි කාරණයක් - ඒක හරියට දෑසේ කැවී කැවේ වැලි ලෑ විලාසේ ම තමයි.

මටත් මේ වාහනය ගෙනා දවසේ ඉඳන් මේ වාහනයේ චැසිය කොටින්ම මල ඇනයක් උනා කිව්වොත් නිවැරදියි.  වාහනය අරන් දින දෙකක් තුනක් ඇතුලත ඒකත් මන්දො කරගෙන ගියා පංචිකාවත්තට. බැහැ දැක්කා ජෝජ් මහරජාණන්ව! ජෝජ් ආයේ වාහනේ දිහා දෙපාරක් වත් බැලුවේ නෑ එකෙන්ම කිව්වා ඇද කුද නැතිව!

"ආ! මේකෙ චැසියක් මා ලඟ නෑ!~"

"එහෙනං කිව්වේ තියෙනවා කියලා; මම කෝල් කලාම!?'

"මං හිතුවේ වෙන මොඩ්ල් එකක් කියලා!?!?!?!?!"

කියන්නට වදන් නොමැත! පංචිකාවත්තේම බීසීසී පාලම අසල වැලි වත්තේද චැසිය සොයා බැලීමෙන් පසුව අශ්වයා මැරුණු කව්බෝයි සේ ඉච්චා භංගත්වයෙන් ගෙදර ආවෙමි.

එහෙත් එමින් ගමන් ආරුමුගන් ලඟ තිබූ දොර දෙකක් හා ඉදිරිපස සම්පූර්ණ ඇක්සලයක් පිළිවෙලින් රුපියල් 22000ක් හා 19000 කට රැගෙන ආවෙමි.

තවත් කලක් ගොස් අවසානයේ නුගේගොඩ මෙල්ඩර් පෙදෙසේ; දැනට රාජගිරියේ කලපලුවාව කිට්ටුව ජීප් වැඩපොලක් පවත්වාගෙන යන මංජුල - මංගල දෙදෙනාගේ මාමා කෙනෙකු ලඟ තිබී චැසියක් සොයා ගැනීමට හැකිවිය! එයද FJ පැරණි චැසියකි.

එන්ජින් මවුන්ට්, ගියර් පෙට්ටියේ මවුන්ට්, දුනු හැන්ගර්, දුනු ෂැකල්, පිටු පස බම්පරය හෙවත් ක්‍රොස් මෙම්බරය ආදිය සියල්ල BJ40 ට වඩා වෙනස් විය. ඒවා සියල්ල රිවර්ට් වලින් ගලවා මාරු කිරීම මාගේ අදහස විය! 

චැසිය මිලදී ගත් ආසන්නයේදීම දිනක් මා අප පවුලේ සාමාජිකයින් සමග කඩවත සිට හක්බෙල්ලාවක බලා ගියෙමි. හක්බෙල්ලාවකට ඔන්න මෙන්න කියා තිබියදී වාහනයේ එන්ජිම කිසිදු හැල හොල්මනක් නැතිව නැවතුනි. පසුව මහත් ආයාසයෙන් රථය හක්බෙල්ලාවකට ගෙන ගියද එහි නැවතූ පසු යලිදු කිසිදු ලෙසකින් එය පන ගැන්වීමට නොහැකි විය. පසුව වාහනය කඩවතට ගෙන ආවේ බී. ඇල්. සිරිපාල විසින් ඇදගෙනය. පසුව බලන විට එහි එන්ජිම හිරවී තිබුනි. සෑම දිනකදීම එන්ජිමේ තෙල් වතුර බලා පනගන්වන එන්ජිමට එසේ සිදුවූයේ කෙසේදැයි අදටත් මාහට සිතා ගත නොහැක. එහෙත් වාහනය හක්බෙල්ලාවක සිට කඩවතට ඇදගෙන ආ දිනට පසුදින එන්ජිමේ ඔයිල් කූර ඇද බැලූ විට එහි තෙල් කළඳක් හෝ නොමැති බව දිස් විය. 

මේවන විට වාහනය මුළුමනින්ම ටින්කර් පේන්ට් කිරීමේ අවශ්‍යතාවයක්ද පැන නැගී ඇති බැවින් මිදුලේ තැබූ ලීටර 200 බැරල දෙකක් මතට වාහනයේ බොඩිය ගලවා ගත්තෙමි.

දැන් ඊළඟට ඇත්තේ චැසියෙන් එන්ජිම ගැල වීම හා චැසිය හා එන්ජිම අළුත්වැඩියා කිරීමය!

එන්ජිම අළුත්වැඩියා කිරීමට එවකට ටොයෝටා කොම්පැනියේ සේවය කල කිරිබත්ගොඩ පීරිස් වත්තේ ගාන්ධි අයියාව යොදාගැනීමට ඔත්තුව ලැබුනු ආකාරය මා හට මේ මොහොතේ මතකයට නොයේ. එකල ටොයෝටා කොම්පැනිය හැඳින්වූයේ ෆෲඩන්බර්ග් සමාගම ලෙසිනි. එය පැවතියේ බේස්ලයින් පාරේ කැළණි තිස්ස විදුලිබලාගාරය අසල දැනට "විජය ග්‍රැෆික්ස්" ආයතනය පවත්වාගෙන යනු ලබන ගොඩනැගිල්ලේය.

ගාන්ධි අයියාද එක ජාතියක පුද්ගලයෙකුවිය. 

ඔහු සමගවැඩය කථා කර ගත් දවසේ ඔහුගේ ගාස්තුව හා කොන්දේසි මාලාව එළිදැක්වීය.

එන්ජිම සවිකිරීමටවත් ගැලවීමටවත් ඔහුට නොහැක.

එය මවිසින් කල යුතුවූ අතර ඔහු පැමිනෙන්නේ අධීක්ෂණයට පමනි.

ඔහු කඩවතට ඔරුගොඩවත්තේ සිට රැගෙන ආ යුතුවූ අතර සැම පැමිණීමක් සඳහාම අය කිරීම ලෙස රුපියල් 500 ක් ගෙවිය යුතු විය.

ඊට අමතරව සෑම දිනෙකම ඔහුට භුක්ති විඳීම සඳහා අරක්කු කාලක්, පාන් භාගයක් හා හරක් මස් කරියක් සැපයිය යුතු විය!

කියා පලක් නැත. මේ සියළු කරුණු වල එකඟව මා ඔහුව පලමු දිනයේ නිවසට වඩමවාගෙන ආවෙමි. ඒ එන්ජිම චැසියෙන් ඉවතට ගලවා ගැනීමටය! චැසියේ සවිකොට තිබූ එන්ජිම දෙස පිළුණු බැල්මක් හෙලූ ගාන්ධි අයියා පැවසුවේ පොල් පරාල දෙකක් සහ සවිමත් පිරිමින් හතර දෙනෙකු සූදානම් කරගෙන ඔහුට දන්වා සිටින ලෙසය! එදින රුපියල් 500 ද, අරක්කු කාලද, පාන් භාගයද, හරක් මස් දීසියද  මල ගිය ප්‍රාණ කාරයනට දුන් පිදේනි තටුවක්ම විය!

පසු දින උදෑසන මිදුලට පැමිණ වාහනයේ චැසිය දෙස බැලූ කල මා හට අනගි අදහසක් සිතට ආවේය. අවශ්‍ය වන්නේ චැසියත් එන්ජිමත් වෙන් කිරීමය. ඒ සඳහා ගාන්ධි අයියා ප්‍රමුඛ මේ රටේ වෙසන සුවහසක් බාස්වරුන් චැසියෙන් එන්ජිම ගලවා ඉවත් කරති. මා හට සිතුනේ ඊට වඩා පහසුවෙන් එන්ජිමෙන් චැසිය ගලවා ඉවත් කල හැකි බවයි!

මා ගියර පෙට්ටිය ගලවා ඉවත් කලෙමි.ඉන් පසු ක්‍රම ක්‍රමයෙන් ක්‍රියාන්විතය පටන් ගත්තෙමි.

පලමුව ඉදිරිපස රෝදද දෙවනුව දුනු මිටි දෙක සමග ඉදිරිපස ඇක්සලයද ගලවා ඉවත් කල මා ඉන් පසුබ් ජැක් පහත් කරමින් එන්ජිමේ තෙල් දෙන හෙවත් සම්ප් එක ලෑල්ලක් මත සිටින සේ චැසිය පහත් කර ගත්තෙමි. ඉන් පසු එන්ජින් මවුන්ට් ගලවා චැසිය උස්සා පසු පසට ගෙන එන්ජිම නිදහස් කර ගත්තෙමි. පසු දින පොරොන්දු පරිදි ගාන්ධි අයියා පැමිණ  බැලූ කල ලෑල්ලක් මත සැතපී ගිමන් නිවන එන්ජිම දැක ඇසූ පලමු පැනය මට අද මෙන් මතකය.

"පොල් පරාල දෙකක් දාලා නේද බෑවේ?" හේ ඇසුවේය.

පසුව මා එය ඉවත් කල ආකාරය පැවසූ විට පංචිකාවත්තේ වතු වල චැසි එන්ජින් වෙන් කරණ්නේද එලෙසින් බව ඔහු කීවේය.

එන්ජිම සෑදීම ඇරඹුනි. එදිරිසිංහ යවා එන්ජිම  මැෂින් කිරිමෙන්  (එන්ජින් බ්ලොක් ෆේසින්, ස්ලීව් බෝරිං, ලයින් බෝරිං, ක්‍රෑන්ක් ග්‍රයින්ඩින්, කෑම් බුෂ් රී ප්ලේසින්, එන්ජින් හෙඩ් ෆේසින්, වෑල්ව් ගයිඩ් වෑල්ව් සීට් රී ප්ලේසින්) පසු එන්ජිම ක්‍රම ක්‍රමයෙන් සවි කලෙමු. ගාන්ධි අයියා බලා සිටියදී මා එන්ජිම එකලස් කලෙමි. පිස්ටන් හතර කළුතෙල් වල දමා පොල්කටු අඟුරු දමා තම්බා ගත්තේ පරණි මොරිස් මයිනර් එන්ජින් වල පිස්ටන් කේස් හාඩින් (මෙම වචනය නිවැරදි කරණ්න දැනුමැත්තෙක්!?) කරණා ආකාරය මතක් වීමෙනි! මෙසේ දින ගනනාවකින් පසු එන්ජිම සවිකොට පසෙකින් තබා චැසියේ වැඩ පටන් ගතිමි.

චැසි දෙකම මාවර මණ්ඩියේ බාලසූරිය ලඟට ගෙන ගොස් අවශ්‍ය කාරණය පැවසූ පසු ඔහු පෙරළා කීවේ "ඔයාට පුළුවන්නම් වැඩේ කර ගන්න. මම ආයුධ ටික දෙන්නම්!" කියාය. ඒවන විට මා A.C. පෝල් ආයතනයෙන් ස්පාඥ්ඥයේ සාදන ලද "ඉරිමෝ" කපන කටුවක් ගෙන කැඩුනු හෙවත් වාහනයට අදාල චැසියෙන් දුනු ෂැකල්, දුනු හැඟර් ආදිය ගලවා ගැනීමට සූදානම් විය.කපන කටුවෙන් රිවර්ට් දෙක තුනක් වත් කැපීමට නොහැකි විය. කපන විට කටුව කැඩී ගියේය. ඉන් පසු බාලේගේ ග්‍රයින්ඩරයට පිං සිදු වන්නට රිවර්ට් සියල්ල ඇඟ රිදෙන්නේ නැතිව ගලවා ගත හකි විය.

චැසියේ පසු පස ක්‍රොස් මෙම්බරයද ගලවා ගත්පසු අළුත් චැසිය කැබැලි ගැල වීමට පටන් ගත්තෙමි. පැරණි FJ40 රථයේ පසුපස සංඥා ලාම්පු සවිවී පැමිණියේ චැසියට නොවේ. එහෙත් BJ40 රථයේ එම සංඥා ලාම්පු චැසිය තුල ගිල්වා තිබුනි. එම නිසා පසුපස ක්‍රොස් මෙම්බරයද මාරු කිරීමට සිදුවිය!

පැරණි 

නව

නව චැසිය පොලොව මත තැබූ ආධාරක මත තබා ස්ප්‍රීතු ලෙවලයෙන් ලෙවල් කොට මුළු පරස් හැර, මධය රේඛාවට ස්ථාන තුනකින් ඇති වම් පස හා දකුණු පස දුරවල් මැන සීයට සීයක් නිවැරදි වූ පසු පසුපස ක්‍රොස් මෙම්බරයත් පසුපස දුනු ෂැකල සවිවී ඇති ත්‍රිකෝණාකාර ඝන තහඩුත් තබා හාෆ් ත්‍රෙඩ් වානේ ඇන දමා ස්ප්‍රින්ග් වොෂර් ෆ්ලැට් වොෂර් යොදා ටෝක් රින්ච් එකකින් කරටියටම තද කර ගත්තෙමි. එම ත්‍රිකෝණාකාර ඝන තහඩු මගින් චැසිය මුළු පරස් යෑම නවතාලයි. ඉන් පසු සියළු දුනු ෂැකල්, හැඟර් එන්ජින් මවුන්ට් සවිවන චැසි කොටස්, බොඩි මවුන්ට් සවිවන කොටස්, ගියර් පෙට්ටිය රැඳවෙන මවුන්ට් එක සවි වෙන ක්‍රොස් මෙම්බරය ඇතුළු අනෙකුත් සියළුම ආගන්තුක කොටස් සවිකොට FJ40 චැසිය BJ40 චැසියක් බවට හැරවූයෙමි. 

ගලවා හුවමාරු කිරීමට නොහැකිවූ වෙනස් කොටස් දෙකකට වූයේ ගියර පෙට්ටිය පිටිපසින් ඇති වක්‍රා කාර ක්‍රොස් මෙම්බරය පමණි. මන්ද අවරපෙති කඳ දිවෙන්නට සිදු කල නැම්මක් සහිත එය චැසියට නිෂ්පාදකයා විසින් වෙල්ඩින් කොට එවා ඇති බැවිනි. එහෙත් චැසි දෙකේ එම නැම්ම පැවතියේ දෙ ආකාර වූ ගැඹුරකින් යුක්තවය. සියල්ලෙන් ඉක්බිතිව ඇන සහ මුරිච්චි නොගැලවීමට වෙල්ඩින් තිත් තියන්නටත් අමතක නොකලෙමි.චැසිය ගෙනැවිත් එයටෑන්ජිම ඇමුනුවේද ගැලවූ ලෙසටමය. චෙන් බ්ලොක් එන්ජින් ජැක් හෙවත් අලි හොඬක් නොමැතිව තට්ට තනිවම එන්ජිමත් ගියර් පෙට්ටියත් ඇක්සල් හා අනෙකුත් උපාංගත් සවිකර ගත්තෙමි. බොඩිය තබන්නට පමනක් අහල පහල හතර පස් දෙනෙකු සොයා ගත්තා මතකය. සියල්ල අවසානයේ ප්‍රශස්ථ මට්ටමේ BJ40යක් ගෙදර මිදුලේ ඉතිරි විය. 

නංගීව පපුතුරේ රඳවාගෙන වසික

196. රස වෑහෙන පොලිස් කථා 2

"මටත් උනානේ මේ ළඟදි පට්ට සීන් එකක්. විළිලැජ්ජාවේ සංතෝසෙ බෑ!"

"කියහංකො! කියහංකො!!"

"මේ ළඟදි දවසක් මම මෙහෙන් යන්නම පරක්කුවෙලා යනවා ඇරසෝලෝ කියලා"

"ඉතිං!?"

"ඉතිං කඩවත පල්ලමේ වංගුවේ තනි ඉර කපලා ගත්තා විතරයි කීං ගාගෙන විසිල් එකත් ගහගෙන පාරට පැන්නා පොලීසියෙං. මට ආයෙ කියන්න දෙයක් නෑ මම එකසිය ගානටම වැරදියි. මම ඉතින් බැස්ස ගමන් අපේ සාම්ප්‍රදායික බොරුව කියන්න පටං ගත්තා.

මම ලෙඩෙක් බලන්න ඉස්පිරිතාලෙ යන ගමන්. උදේ කැම එක ගෙනියන්න ඕනෙ!!! ඒකයි ඉක්මනට යන්න ගිහින් ඉර කැපුනෙ!!! . . . . "   

"ආ! මහත්තයා ඉස්පිරිතාලෙ යන ගමන්ද? එහෙනං දැනටමත් පරක්කුවෙලා ඇතිනේ . . ?  - මේ . . සාජන් මහත්තයා! අනේ මේ මහත්තයට ඉක්මනට දඩ කොළයක් ලියලා දෙන්න පරක්කු නොකර!" මේකා කිව්වා කියන්නකෝ!?

"අම්මට සිරි ඉතිං!?" 

" ඉතිං වෙන මොනවා කරණ්නද දඩේ ගෙවලා ලැයිසන් එක හවස එන ගමං අරං ආවා!"

***************************************************************************************************

"ඉතිං ඔතනම මට සුපිරිම වැඩක් උනානෙ බං! දවසක් මම පන්නිපිටියෙ ගෙදර එල්ෆ් 250 ටිපර් එකත් අරං යනවා කිරිබත්ගොඩ පැත්තට. යනකොට එකෙක් චූටි බබා මහත්තයා වගේ ඉස්සරහින් යනවා ලොට ලොට!"

"ඉතිං! ඉතිං??"

"හරියටම සෙට් උනා කියාංකො ඔය වංගුවේදී. මමත් ආයේ බැලුවේ නෑ ඕටේක් කලා ඉර කපාගෙනම! ඉස්සර කරලා නිකං හිටියෙත් නෑ. මලටම ඉස්සරහට දාලා බ්‍රේක් පාරකුත් ගැහුවා - නැගපං පිට උඩ කියලා!"

"එල!"

"මොන එළද බං බ්‍රේක් සද්දෙට එතන ඉර කපන එවුංව ලිය ලියා හිටපු රාළහාමි ඔළුව උස්සලා බලලා දැම්මා විසිල් එකත් ගහගෙනම අත! මම බැස්සෙම අර ගෝතයට බැනගෙනම! ඒත් හරි ගියේ නෑ මොන දේ කිව්වත් දුන්නා දඩ කොලේයි ටෙම්පරි පර්මිට් එකයි! ඔක්කොමත් හරි ගෙදර මේකට පෝස් මොටම් තියලා හෙන බර බරේ"

"අප්පට සිරි ඉතිං!?"

"ඊළඟට තමයි හොඳම වැඩේ උනේ! පහුවෙනිදා මම ආයෙමත් ඒ වෙලාවටම වගේ ආයෙත් යනවා එතැනින්ම ටිපර් එකේම. ඇන්ටිත් වාහනේ. එදත් අර වගේම ඉස්සර්හින් පොඩි කාර් එකක්ද මොකක්ද යනවා නිකං නින්දෙන් ඇවිදිනවා වගේ. මටත් හොඳ චාන්ස් එක ඊයේ වෙච්ච දේ හරියටම රඟපාලා පෙන්නන්න. මාත් ඇන්ටිට කථා කරලා 'මෙන්න මේ වගේ තමයි ඊයෙත් වාහනේ ගියේ. ඉතිං මට බැරිම පාර මෙන්න මේ වගේ ඉර කපලා වාහනේ ඕවර්ටේක් කලා!' කියලා ඉර කපාගෙන ඉස්සර කලා!"

"ඉතිං!?"

"ඉතිං තමයි එදත් එතනම පොලීසියෙන් ඉඳලා ෆූ . . . . ගාලා විසිල් එක ගහලා නැවැත්තුවා කියන්නකෝ"

"අම්මට සිරි! ඉතිං?"

"ඉතිං මුකුත් නෑ. දඩ දෙකම කාලා ලැයිසම බේරගෙන ගෙදර ආවා!!

"ගෙදරිං හොඳ පෝරියෙල් වෙන්න ඇති!?"

"කියන්න වදන් නෑ බාං . . . . . . . . ඊට හොඳයි පොලිස් කාරයව යට කරලා හිරේ ගියා නං!!"

***************************************************************************************************

"ඕක නෙවේ කථාව! මට උනා සුප්ප සුපිරි තල් සූකිරි වගේ වැඩක්!" මම තව රස කථාවක් පටන් ගත්තා.

"ඒ මොකක්ද?"

"ඔයාට මතකද මධූ; අර ඔසී වල ඉන්න කපිල තුෂාරලා ලංකාවට ආවේ. ආන්න එහෙම ආපු වෙලාවක අපි ඔක්කොම ගියා යාපනේ. අපි ගියේ ටොයෝටා 106 කැබ් එකේ. කපිල තුෂාරලා ආවේ KDH වෑන් එකක් හයර් කරලා. අර නංගිලගෙ වාහනෙත් ගියාද කොහෙද. කොහොම හරි රෑ අපි පිටත් උනේ. රෑට මම කොහොමත් ටික වෙන්න පාගලා යනවානේ. නැතිනම් නිදි මත තමයි. ඉතින් මම ටික දුරක් ගිහින් නැවතිලා ඉන්නවා අනිත් වාහන දෙක එන තුරු. ඔන්න ගලේවෙල පහු කරලා මම ටිකක් පාගලා යන කොට පාර අයිනෙ ටෝච් එකක් අල්ලලා නැවැත්තුවා කැබ් එක! මම එතනට යන්න හදන කොටම මතක් උනා මගේ පර්ස් එකේ තිවුනු එස්. පී නිහාල්  මහත්තයාගේ නේම් කාඩ් එක! මම ඒකත් අතට අරං හිමීට රාළහාමිට කිට්ටු කලා."

"වේගෙ ටිකක් වැඩියි නේද?" රාළහාමි වැඩේට බහින්න පිටිය හදනවා.

"අනේ ඔව් රාලහාමි පොඩ්ඩක් විතර වැඩිවෙන්න ඇති. නැතිනං නින්ද යනවානේ ඒකයි!"

"නින්ද යනවා කියලා එහෙම හැම වාහනේම වේගෙන් ගියොත් හරියනවද? ගන්නකෝ මහත්තයාගේ රියැදුරු බල පත්‍රය!"

"ලයිසන් එක නං දෙන්නං! රාළහාමි බලන්නකෝ මේ කාඩ් එකේ ඉන්න මහත්තයා අඳුනනවාද කියලා?" කියලා මම අර නේම් කාඩ් එක රාලහාමිගේ අතේ තිබ්බා. රාළහාමි අතේ තිබ්බ ටෝච් එක කාඩ් එකට ගහපු ගමන්කොර උනා කියන්නකෝ!

"අනේ සර් කොහෙද මේ යන්නේ?" අනේ මේ අසරණ රාළහාමි හිතුවා මම අර එස්. පී මහත්තයා කියලා. මම කියලා ඉතින් මොනවා කරණ්නද?

"අම්මට සිරි එළනෙ! ඉතිං ඉතිං!!??"

"මම ටිකක් සද්දෙ බේස් කරලා කිව්වා 'ජැෆ්නා යනවා පුතා' කියලා!"

"ඩියුටියක්ද සර්?" මේ යකා අහපි.

"අනේ නෑ පුතා මගේ රිලේශන්ස්ලා වගයක් ඕස්ට්‍රේලියා ඉඳන් ඇවිත්. මේ එයාලත් එක්ක යනවා!"

"හරි සර් එහෙනං පරිස්සමිං ගිහිං එන්න! ගුඩ් නයිට් සර්!!" කියලා පොර ඇඹරුණා.

මාත් "ඕකේ පුතා! ගුඩ් නයිට්!!" කියාගෙන එතැනිං මාරු උනා!

"අම්මට සිරි! අහු උනා නං තාම බාප්පි කනවා!"

"පිස්සුද බං!ඉතිං මම බොරුවක් කිව්වෑ!?"

195. රස වෑහෙන පොලිස් කථා 1

කාලෙකට පෙර ඒ කියන්නේ  අවුරුදු තුන හතරකට කලින් දවසක මමත් මධුෂානුත්  රාත්තිරි 8 - 9 ට විතර කඩවතින් පිටත් උනේ වව්නියාවෙ යන්න. ඒ උන්ගෙ තාත්තා වෙච්චි මගේ එක්කසුපං අයියා රෝගාතුරව වව්නියාවේ ඉස්පිරිතාලගත කර ඇති පණිවිඩේ අරං ඌ අපේ ගෙදරට ගොඩ වැදූනායිං පස්සෙ! මධූ; දුරක යනවානම් මටත් පොඩි අප්ඩේට් එකක් දාගෙනම යන එක සිරිතක්. ඉතිං ඒ නිසාදෝ මංදා ඇවිත් කියපු ගමන් "පොඩ්ඩක් හිටාං! මාත් එන්නං!!" කියාගෙන නිසාන් පැට්රෝල් ලොරි පොඩ්ඩාවත අරං පිටත් උනා; කඩවතිං රුපියල් හාරදාහක ඩීසල් එහෙම ගහගෙන. අපි ගියේ ඇල්ල හරහා අනුරාධපුර පාරෙං යන්න පස්යාලෙන් මීරිගමට දාලා නාරම්මල ගිරිඋල්ල හරහා.

කොහොමින් කොහොම හරි වාරියපොල දළදා ගම  එහෙම පහු කරලා ගල්ගමුවට එනකොට රෑ 12 ට විතර කිට්ටු කරලා මයේ හිතේ!

ගල්ගමුව ටවුම දුරෙං අඩු ඇත්තේ කිළිනොච්චියට විතරය!

ටවුම පටං ගන්න තැනක් අවසන් වෙන තැනක් නිච්චියකට ගන්න බැරි ගානට ටවුම දුරයි; ඒ වගෙම මුල අග දෙකම වල් වැදිලා. ඒ ඒ වාහන වලට නගර සීමාව තුල ධාවනය කරණ්න ට ඇහැකි උපරීම වේගයක් තියෙනවානේ. නගර සීමාව අවසං උනාම ඇහැට පේන නොපෙනන බෝඩ් ලෑලක් තියෙනවා "දැං කෙලගෙන පලයං!" කියලා ඩැයිවර්ලට කියා පාන්න. අපි හැමෝම ටවුමකට ඇන්ටර් උනාම සොලෝ එකේ යන්නේ මේ නීතිය නිසාම නං වෙන්න බෑ. හුඟක් වේලාවට බොහෝ ඩැයිවර්ලා හිමීට යන්නේ මිනිහෙක් දෙන්නෙක් වාහනේට අඩ තියයි කියලා. බස් ඩැයිවර්ලා නං හිමිං යන්නේ කොහේ ඉඳං හරි තව රුපියල් විස්සක කෑල්ලක් අත දමාවි කියන බලාපොරොත්තුව හිතේ තියං.

කොහොම හරි රෑ 12 ට විතර ගල්ගමුවේ ටවුම මැද්දේ හෙමීට යන්න අපිට කිසිම උවමනාවක් තිබ්බේ නෑ. ඒත් කොයි එකටත් කියලා සූදානං සරීරෙ කියලා ගානකට ලොරිය එලෝගෙන ගියා.

හරියට ටවුම මැද්දෙදි රාළ කෙනෙක් පැනලා අත ඇල්ලුවා. සාජං මහතැන් කෙනෙකුත් අත ලඟ.

මං ක්‍රමේට පාර අයිං කරලා නවත්තලා බැස්සා.

මම වාහනයක් ගත්තු ගමන් කරණ දෙයක් තමයි වාහනේ පොතේ කොපියක්, ලැයිසන් එක, ඉන්ශුවරන්ස් එක තව දුං සහතිකේ කියන මේ මෙකී නොකී සියළුම බඩ මාළු ටික පිළිවෙලට පොඩි කාඩ්බෝඩ් ෆයිල් කවර කෑල්ලක අමුනලා තියාගන්න එක. අනෙක් අයටත් එහෙමමයි සැලකීම!

බොහෝ රාළහාමිලා ඒක දැක්ක ගමන්; වාහනේ තියෙන අනිකුත් අඩුපාඩු හොර මැරකං, කුපාඩි කං හොයන්නේ නැතිව යන්න අරිනවා. මොකෝ මේ ලිය කියැවිළි වල තියෙන පිළිවෙල දැකලා!

මාත් පොර සේ ලොරි පොඩ්ඩාට අදාල උප්පැන්නෙයි, පෝෂන කාඩ් එකයි, ක්ලීනික් කාඩ් එකයි සියල්ල අමුනපු ෆයිල් පොඩ්ඩ රාලහාමි අතේ තිබ්බේ පොඩි උණකුත් හිතට අරං.

රාලහාමිත් මේ ෆයිල් එක අරං ඒ මේ අත පෙරලලා  බලලා කුල්ටූර් වෙනවා වෙනුවට මගේ පැත්තට හැරිලා "කෝ ෆිට්නස් කොලේ?" කියලා අහපි.

"ඇයි රාලහාමි ෆිට්නස් එක තීන හින්දනෙ ලයිසන් එක ගන්න පුළුවං!? ලයිසන් එක ගන්න ගියාම ෆිට්නස් කොලෙයි දුං සහතිකෙයි දෙකම බලලා තමයි ලයිසන් එක දෙන්නේ!"

" මේ මහත්තයා පොඩ්ඩක් අපේ සාජං මහත්තයා එක්ක කථා කර ගන්නකෝ!?"

(මේ සැරසෙන්නේ ජරාවකට කියා නොතෙරෙන්න මම බිව්වේ මදු කිරි යෑ!? )

"දෙන්නෑ සත පහක්!" මම මධූට ඇහෙන්නට කෙඳිරි ගෑවා.

මාත්  මධූත් හැරෙන තැපෑලෙන් සාජන් බුවා ඉදිරියේ ප්‍රානි භූත උනා!

"සාජං මහත්තයා මේ මහත්වරුන්ගේ වාහනේ බර වාහනයක්, ලොරියක්! මේකේ ෆිට්නස් කොලේ නෑ!" රාලහාමි කියවගෙන හුස්මක් කටක් නොගෙන!

"නැ! සාජං මහත්තයා! මම මේ රාළ හාමිට කිව්වේ ෆිට්නස් එකයි දුං සහතිකෙයි තියෙන නිසා; එක බලලානේ ලැයිසන් එක දුන්නේ කියලා!?"මම මගේ නිදහසට කාරණාව සාජං මහත්තෙයා ඉස්සරහ ගොනු කලා! 

උප්පැන්නෙ ඕන හැඳුනුම් පත ගන්න. හැඳුනුම් පතයි උප්පැන්නෙයි ඕන පාස් පෝර්ට් එකට! දැං රටකට යන්න එයා පෝර්ට් එකට ගියාම එහෙන් ආයෙ උප්පැන්නේ වත් අයිඩෙන්ටියවත් බලන්නෑ නේ!? ඒකයි මගේ නිදහසට කාරණාව උනේ තේරෙන හිංගලෙන් කියනවානං!

"මහත්තයා ගෙදර ගියාම බලන්න ඔය දුං සහතිකේ පිටි පස්සේ හතර වන වගන්තිය විදියට "මෙම සහතිකය සෑම විටෙකම වාහනයේ රැගෙන යා යුතුවේ" කියලා ලියලා තියෙනවා වගේම ෆිට්නස් කොලේ පාමුල "මෙහි එක් පිටපතක් වාහනයේ තබා ගැනීමට අයිති කරුට ලබා දිය යුතුවේ" පැහැදිලිව ලියලා තියෙනවා!" සාජං මහත්තයා කට පාඩමිං කියපි!

"හරි ඔය මගුලක් නං මම ඇහුවෙත් අදයි! කමක් නෑ දැං මොකක්ද වෙන්ඩෝන කියන්නකො!?" මං ඇහුවේ ටික වෙන්න මල පනින ගමංමයි!

"මහත්තයා කොහේද?

"ඔය ලැයිසං එකේ තියෙන කරුණු හරියටම හරි!"

එහෙම කිව්වාම අතේ තිවුනු බැස්ටිය ලැයිසමට ගහලා මගේ ඇඩ්ඩස් එක කියෙව්වා!

"පුහ්! කඩවත!!??"

"ඔව්! කඩවත!"

"අපි නඩුවක් දැම්මොත් මහත්තයාට කඩවත ඉඳං මෙහේ එන්න වෙයිනේද?"

සාජං මහත්තයාගේ තැටමිල්ල හා ඇවටිල්ල සමග මගේ කං පෙති රත් වී ගිණි කන ඔන්න මෙන්නය!

"මේ මහත්තයා කරණ ඕන දෙයක් කරලා මාව ඉක්මනට යවන්න! මම වව්නියාවට ලෙඩෙක් බලන්න අයන ගමං!"

"මහත්තයා ආවේගයෙන් වගෙයිනෙ!?"

"හරියටම හරි! අනිවාර්‍යයෙන්ම ආවේගයෙන්! මගේ අයියා වව්නියාවේ ඉස්පිරිතාලෙ නවත්තලා! මම මේ එයාව බලන්න තකහනියෙං යන ගමං! එයත් ඔය මහත්තයා වගේම ආංඩුවේ යුනිෆෝම් එකක් තමයි අඳින්නේ! ඔබ තුමාට මාව යවන්න බැරිනං වාහනේම තියා ගන්න! ඊළඟට එන බස් එකට මං නගිනවා මොනවා උනත්. නඩු බැරිනං ඕන එකක් බලාගමු හෙට උදේට!"

මම කියෝගෙන ගියේ ආවේසයෙන් වගේ. මධූ සිද්ධිය බලාගෙන ඉන්නවා!

"හරි ලෙඩෙක් බලන්නනං අපි ඒ ගැනත් හිතන්න එපායැ! යන්නකො!" කියලා සාජ්ං මහත්තයා මගේ අතට වාහනේ ලියකියවිළි ටිකයි මගෙ බර වාහන ලැයිසමයි දුන්නා කියන්නකෝ!

ආයෙ "ටැං කිව්!"  කියන්නවත්  ඉන්නැතිව මම ලොරියට නැගලා එතන ඉඳන්ම රේස් කරගෙන

 පිටත් වෙලා වාහනේ නැවැත්තුවේ වවනියාවටම ගිහිං!

මේ ගැන යාන්තම් මම මෙතැනත් ලියා තියෙනවා. 

***************************************************************************************************

ළඟදි දවසක මදූ හෙවත් මධුෂාන් ආවා අපේ ගෙදර! ඌව දැක්ක ගමන් මට මතක් උනා මම ඌට කියන්න ගත්තා අලුත්ම එපිසෝඩ් එක!

ඒක මේ ළඟදි මට සිද්ධ වෙච්ච සුපිරි කථාවක්!

"මධුෂාන් මට මාර මගුලක් උනානෙ . . . !"

"ඒ මොකක්ද ඒ සීන් එක . . . . ?"

ඊයේ පෙරේදා මම හක්බෙල්ලාවක ගිහින් එන කොට රුවන්වැල්ලෙන් නිට්ටඹුව  පැත්තට හරෝලා හැතැම්මක් වත් එන්න උනේ නෑ හරියටම මොරාවත්තේ වලව්ව ඉස්සරහ පොලිස් රාලහාමිලා රෑණක් - එක හය හත් දෙනෙක්!

ඒ අතරේ වටේ පිටේ ගෙවල් වල උනුත් ගෙට්ටු - වැට කඩුලු අස්සෙං බෙල්ල දික් කොරාන මෙතන වෙන සීන් එක නරඹනවා එක සීරුවට.

ඉස්සර වගේ නෙවෙයි දැං මගේ වාහනේ රක්ෂණ සහතිකෙයි, ආදායං බලපත්‍රෙයි, දුං සහතිකෙයි, ෆිට්නස් කොලෙයි, ෆිට්නස් පරීක්ෂණ වාර්ථා කොලෙයි, ඒ ඔක්කෝටම යටින් වාහනේ පොතේ කොපියකුයි එකට අමුනපු ප්‍රෙෂර් ලෙඩෙක්ගේ ක්ලීනික් ෆයිල් එකක් වගේ කොල දුසිං භාගෙක ඇමුනුමක් තමයි වාහනේ තියාගෙනනෙ ඉන්නේ! ඉතිං භය වෙන්න දෙයක් නෑනේ! ඉන්න බැරිකමට මම ගිහින් ලොරිය නැවැත්තුවා එතන හිටිය පොලිස් පරීක්ෂක ඉස්සරහිංම!

"චීෆ් මොකද!? මුකුත් කරදරයක් වත්ද?"

"නෑ මහත්තයා! අපි මේ පාරෙ යන වාහන චෙක් කරණවා බොහෝම ස්තූතියි!"

වටේ ඉන්න එවුං බලාන ඉන්නවා මොකක්ද මේ උනේ කියලා!  මමත් ඇඟට උණ අරන් එන්ජිම ටික වෙන්න දෙපාරක්  රේස් කරගෙනම ෆස්ට් එක දාගෙන පිකප් කලා එතනිං.

එහෙම පිටත් වෙලා ආයේ මීටර පංසීයක් යන කොට වංගුව! අර පදුමුත්තර බුදුංගෙ කාලේ ඉඳං හද හද ඉඳං යාන්තං පහුගිය චන්දෙට ඉවර කරපු පාලං පොඩ්ඩ! ඒක පහු වෙන කොටම ඉස්සරහිං පේන්නේ වම් පැත්තේ අයිනෙ තියෙන යෝධ ගල් ගෙඩිය. මෙන්න ඒ කිට්ටුවම ඉන්නවා රාළහාමිලා දෙන්නෙක් ඒ පැත්තෙං එන වාහන නවත්තන්න.

එතන හිටිය ගෝටයිංබර සයිස් රාළ එක පාරටම පාරේ මේ පැත්තට පැනලා දැම්මා කියන්නකෝ වාහනේට අත - හරියට හොර හරක් ලොරියක් නවත්තංන වගේ!

මාත් පාරෙ අයිංකරලා පිළිවෙලට නැවැත්තුවා. ඔව් පිළිවෙලට!

පොලිස් රාලහාමිලා දෙන්නා මම බැහැලා එන තුරු බලාන ඉන්නවා.

මං මොකටද බහින්නේ!? මම අර ෆයිල් එකයි මගේ හෙවි වීකල් ලයිසන් එකයි ජනේලෙන් එළියට දික් කලා.

අත අල්ලපු හයේ හතරෙ බුවා ගාට ගාට ඇවිත් වාහනේ පිටිපස්සෙ බක්කියට එබිල  බලං ඉඳලා ඇවිත් මගෙ අතේ තිවුනු කොල ගොන්න අතට ගත්තා!

මම සිංහාසනේට වෙලා බලා ඉන්නවා "යන්න මහත්තයා!" කියලා කොල ටික පිළිවෙලට ආයේ මගේ අතේ දැං තියයි! දැං තියයි!! කියලා

"මහත්තයා මේ රක්ෂණ සහතිකේ කල් ඉකුත් වෙලානේ!?"

"මොකක්!? ඒක වෙන්න බෑ!"

"වෙන්න පුළුවංද බැරිද කියලනං මං දන්නෑ! ආ! මහත්තයාම බලන්නකෝ!!!!"

එක පාරටම මගෙ උණ හුටස් ගාලා බැහැලා ගියේ හිතාගන්නටත් බැරි වේගෙං!! උණ බැස්ස බැහිල්ලට මාද වාහනයෙන් බිමට බැස්ස උනා කියහංකො!!!

"දැං මොකද කරණ්න පුළුවං!?" මගෙ කටේ කෙළ හිඳිලා. මට ගිලින්නට  කෙළත් නෑ කියහංකො!

"අපිට පුළුවං මහත්තයාට ටෙම්පරියක් දෙන්න. දින පහක් ඇතුලත රක්ෂණ සහතිකේ ගෙනත් දීලා ලැයිසන් එක අරං යන්න!

"අප්පට සිරි! මම දවස් පහකින් මෙහේ එන්නේ නෑනෙ!?" මං කිව්වා නෙවෙයි මට කිය උනා!

" හරි දවස් පහකින් මෙහේ එන්නේ නැත්නම් කෙලින්ම සතියකින් විතර උසාවියටම එන්නකෝ මහත්තයා!"

"එහෙම නෙවෙයි! මාව විශ්වාසෙට අරං ලයිසන් එක දෙන්න. මම හෙටම ඉන්ශුවටන්ස් එක අරං රාලහාමිගේ ෆෝන් එකට ෆොටෝ එකක එවන්නම්!" මං ශේප් එකේ කියලා දැම්මා ශේප් නියායෙන්ම.

"හරි! හෙට කථා බෑ! මහ්ත්තයාට ලයිසන් එක ඕනෙනම් අද දිනයට ඉන්ශුවරන්ස් එක ගන්න ඕන! නැතිනං කෙලින්ම උසාවි! කැමතිද?"

"කැමතියි!" මට "හා!" කියනවා ඇරෙන්න වෙන කියන්න දෙයක් තිබුනෙත් නෑ. අනික උංට හිතුනොත් මං  උංට ආතල් දෙනවා කියලා දෙනවා දඩේ රිදෙන්නම. ආ! මට කියන්න බැරි උනා! ඉන්ශුවරන්ස් එක නෑ කියලා දැන ගත්තු ගමං බුවා අහපු පලවෙනි ප්‍රශ්නෙ මොකක්ද දන්නවද? "දන්නවානෙ දඩේ විසිපංදාහයි!" මම කොර උනා!

"දැං වෙලාව හතරයි විස්සයි!"

"අවුලක් නෑ!"

රාළහාමිලා දෙන්නා මට දුන්නේ එළම කිරි චැලෙන්ජ් එකක්!! මම ට්‍රක් එක නැගලා එන්න ගත්තා ගැම්මට!.

එන ගමන් අලියෝස්  ලඟම ඇති ඔපිස් එක කොයි ලෝකෙද? හිතාගන්නට බෑ!  කරණ්න තිබ්බේ එකෝම දෙයයි! පරණ කාඩ් එකෙන් නොම්මරේ හොයාගෙන උන්ට කතා කලා! කියන්නෝන නෑනෙ උංගෙ විනාඩි 15 ක විතර රෙකෝඩිං එකෙන් පස්සෙ කෙල්ලෙක් කථා කලා!

"නිට්ටඹුව!" කියලා තිබ්බා. දැං මට කියන්න ඕනෙ මං එනකල් ඒ මගුල ඇරලා තියන්න කියලා!මුකුත් කියන්න බැරිඋනා මේ කෙල්ල තිබ්බ හිංදා!

මම ට්‍රක් එක ඩ්‍රයිව් කලේ වේගයෙන් නොවුනත් ඉක්මනින්, කලබලෙන් නොවුනත් සීරුවෙන්, මදාවි දැමිලි නොදැම්මට ටැක්ෆුල් විදියට! ඩෑශ් බෝර්ඩ් එකේ වොච් එක දිහා බල බල රන් රේට් එකේම ප්ලේ කලා! ඇයි බං හදිස්සියේවත් කොහේ හරි යන එකෙක් මේකෙ ඇනලා කේස් එක ගියොත් කට ඇරලා කියන්න පුළුවංද "මේ ඉන්ශුවරන්ස් එකක් ගන්න කෙල ගෙන ගියා!" කියලා?

හරියටම 5 ට විනාඩි 3 ක් ඉතිරිව තිබියදී මා නිට්ටඹුවේ අලියොන්ස් ඔපිස් එක ඉස්සරහ කියන්නකෝ!

මැනේජ' බුවා; බිත්තියේ ගහල තිබ්බ ඔරලෝසුව දිහා බලලා "දැං වෙලාවක් නෑනෙ!" කිව්වා.

මට දැං කොර ගන්න දෙයක් නෑ! " අනේ මෙක ලොකු උදව්වක්! ලොකු දෙයක් කරලා දුන්නෝතිං!" මම එකසිය ගානට ඇඹරෙණවා.

මැනේජ' එතන ඉස්සරහ කවුංටරේක හිටපු කුමුදුද, මොකක්ද කියලා කෙල්ලෙකුට කථාකරලා  "මේක දැං කරලා දෙන්න පුළුවංද?" කියලා ඇහුවාම අනේ ඒ මනුස්සයා කැමති උනා වැඩේ කරලා දෙන්න.

තවත් විනාඩි 20 කින් පමණ එලකිරි වන් කිරි ටොයියා ඉන්ශුවරන්ස් කාඩ් එකක් මගේ අතේ!

සටස් ගාලා ඒකෙ ෆොටෝ එකක් රාලහාමිගෙ වෙත වට්සැප් එකට දැම්මා. පහත වාක්කිය යටින් ගැහුවා; ඇඟිලි වලින් නෙවෙයි; ඇත්තටම බොක්කෙන්!

"ඔබ මා කෙරෙහි තැබූ විශ්වාසය කෙරෙහි බොහොමත්ම ස්තූතියි!"

පස්සෙ මම කෝල් එකකුත් දීලා කථා කලා පොරට! වැඩේ ගොඩ!

අම්මට සිරි එළනෙ! මටත් උනා මරු වැඩක්! ඒකත් පට්ට! මදූ තවත් "රස වෑහෙන පොලිස් කථාවක් " කියන්න පටන් ගත්තා. ඒක ඊළඟට!