216. සිහිල් සුළං රැල්ලේ - ඔබේ සුවඳ මුසුවේ . . !

ටීටර්,නෘත්‍ය, නාට්‍යය, නාඩගම් ආදී සම්ප්‍රදායන් හරහා ගෙවී ආ අපගේ සංගීතයේ ගමන් මග වෙනස් කල නම් කිහිපයක් අපේ හිත්වල ලැගුම් ගෙන ඇත.

එච් ඩබ්ලිව් රූපසිංහ මාස්ටර් (සිරි බුද්ද ගයා විහාරේ / මව් පිය ආදී සොඳුරු තමාගේ / ශ්‍රී රාහුල හිමිගේ නාමේ), අහමඩ් මොහිදීන් (සිළුමිණි සෑය වඳිම් රම්‍ය තව්තිසා බවනේ / තිලොනා සෑසිමුණි ගෞතම ස්වාමී / ලෝනා සිරි ධර්ම රාජා - ශාන්තිවාදී තාපස කාලේ), ඒ ආර් එම් ඊබ්‍රාහිම් (සුන්දර ශ්‍රීණී මණහාරී / දුව දීමට කාරෙ බැඳා), සුනිල් සාන්ත, සූර්ය ශන්කර් මොල්ලිගොඩ (අක්කෙ අක්කෙ අර බලන්නකෝ - වැස්සක් නොවැ එන්නේ / කරුණා නදියේ පැද යාමු//), අයගෙන් පටන් ගෙන එය පණ්ඩිත් ඩබ්ලිව් ඩී අමරදේව දක්වා ඇදෙයි.

අමරදේවයන් පනස් හයේ  දරුවෙකු යැයි මා කීවොත් ඔබ ඊට එකඟ වෙනවා නේද?

බණ්ඩාරනායක බලයට පැමිණීම හරහා සඟ වෙද ගුරු  ඇතුළු පංච මහා බලවේග සමග මෙරට එතෙක් ගමන් ගත් මගින් වෙනස් වී වෙනත්; උන්නති කාමී ගමනක යෙදෙනු ඇතැයි බොහෝ දෙනා විශ්වාස කලහ.

1990 ජුනි  මස  රාත්‍රියකක; නුගේගොඩ අනුලාව පිටුපස පිහිටි ස්වකීය නිවසේදී මා හා සම්මුඛ වූ ඔහු පැවසුවේ "ඒකනේ අපි - ඔබ හට ලෝකය සාදා දී මිස යා නොහැකිය මගෙ පුංචි පුතුන්  - කියලා කිව්වේ" කියාය.   

සිංහල මධ්‍යම පන්තීය විසින් ඉහලින්ම ග්‍රහණය කරගත් පනස් හයේ සමාජ පෙරළිය (මේ පිළිබඳව විව්ධ මත ඇතත් මේ ලියන්නේ එකල වූ පරසිද්ධ හා ජනප්‍රිය වූ මතයට අනුව )  සමග පොපියා ආ කලාව තුල සංගීතයේ මුදුන් මල් කඩ වූයේ අමරදේවයන්ය!

මඩවල, සේකර, මානවසිංහ ආදීන්ගේ අර්ථපූර්ණ ගී පද නැවුම් අමරදේවීය තනුවල ගිල්වී ගුවන් විදුලිය හරහා අසන්නට ලැබුනේය.

මෙම පනස් හයේ දරුවන් තමන් දකිමින් සිටි සුන්දර සිහිනයන්ගේ දිගුවන් දුටුවේ 1970 සමගි පෙරමුණු ආණ්ඩුව බිහිවීමත් සමගය. මහවැලි ව්‍යාපාරයේ ආරම්භය ලෙස; 1976 ජුලි මසයේ  පොල්ගොල්ල වේල්ල, බෝවතැන්න, උකුවෙල විවෘථ කිරීමට සමගාමීව මහගම සේකර අතින් ලියැවී අමරදේවයන් වෙතින් ගැයුනු "මහවැලි" ගීතය මා අදත් රස විඳින ගීතයකි.

මේ පිළිබඳව බොහෝ අර්ථ දැක්වීම් ඇතත් හැත්තෑව දශකය හරහා සුන්දර ගීත ගණනාවක් අපට හිමිවිය.

මාගේ මතකය නිවැරදිනම් ටී එම් ජයරත්න, නීලා, රෝහණ සිරිවර්ධන, වැනි ගායකයින් බිහි වූයේ මේ යුගයේදීමය. එසේම එඩ්වර්ඩ්, සුනිල්, ලක්ෂ්මන්ලා අමරදේවයන් පසුපස සිට අත්වැල් ගැයූවේද මේ  කාලයේ විය යුතුය.

කපුගේ, සෝමතිලක ජයමහ, සනත් ආදීන්ගේ සුමියුරු ගී ජනතාසන්තක වූයේද හැත්තෑව දශකයේය.

මේ සියළු ගායක (ගායිකාවන්) ගුවන්විදුලියේ LP තැටිවලට ගයද්දී ජනතාව වෙත වේදිකාවක සිට තනිව ගැයීම ඇරඹුනේ 1973 ජුලි 20වෙනිදා ය.

ඒ එදින ලුම්බිනි රඟහලේදී "ස" ප්‍රසංගය ඇරඹීමත් සමගය.

එදින අවදිවූ හඬ රත්නායක ආරච්චිලාගේ වික්ටර් හෙවත් අපි සැමගේ ආදරණීය ගී පෞර්ෂය වූ වික්ටර් රත්නායකගේය.

ගීතනාත් කුඩලිගමගේ සංස්කරණයෙන් යුතුව 1997 ජුලි මාසයේ ප්‍රකාශිත "වික්ටර් රත්නායක ගී සීයයක්" පොතේ පසු පස සුචියේ; ගීත 600 ක විස්තර දැක්වේ.

එහෙත් විකිපීඩියාහී විශෙෂයෙන් දැක්වෙන ගීතයක් ඇත.

In 1969, Rathnayke joined the Ministry of Education as a music instructor, and was assigned to a post at Eththalapitiya Maha Vidyalaya in Bandarawela in 1966. He would later look back to his days as a teacher in his song "Sihil Sulang Ralle," which described the beauty of his surroundings that he noted as he travelled on the train to the school. The lyrics were penned by Sena Weerasekera on Rathnayake's recollections.

හැටේ දශකයේ අගබාගයේදී බණ්ඩාරවෙල ප්‍රදෙශයේ පාසලක සංගීත උපදේශකයෙකු ලෙස සේවය අරඹන වික්ටර් දුම් රියේ කෙරෙන ගමනේදී දුටු සුන්දර දසුන් පිළිබඳව; සේන වීරසේකරයන් අතින් පබැදුනු"සිහිල් සුළං රැල්ලේ - ඔබේ සුවඳ මුසුවේ" එම සුන්දරවූද හෘදයාංගමවූද ගීතයයි.

ජීවිතය හදවත ලඟ නතරකරවූ ගීතය!

වික්ටර් ගැයූ අති මහත් බහුතරයක් ගීත වල තනුව හා සංගීතය ඔහුගේම විය. ඔහුගේ ගීත මන්දීරයේ කැණිමඬල ලෙස මා දකින්නේ කේ ඩී කේ ධර්මවර්ධනයන් වෙතින් ලියැවුනු "හෝපළු වන පෙත" ය. එයින් ඔහු පිළිබඳව තිබුනු "සරල ගී ගායක" තිමිර පට ඉරා දැමුනි.

එහෙත් ඔහුට සුන්දර ගීතනු නිර්මාණය කල සහෘද සංගීතවේදීන් මෙන්ම ගායකයින්ද වූහ.

මුල් යුගයේ ඔහු ගැයූ; එසේම අදටත් රස විඳිය හැකි "පා වේ වලා - ඈත කඳු බලා" ගීතය මර්වින් පෙරෙරාගේ සුන්දර තනුවකි.

මෙයට අමතරව අමරදේව, ෂෙල්ටන් ප්‍රේමරත්න, සරත් දසනායක, ප්‍රේමසිරි කේමදාස , පුන්‍යසිරි මහවත්ත,සෝමපාල රත්නායක, සරත් ද අල්විස්, එච් එම් ජයවර්ධන ඇතුළු බොහෝ සංගීත වේදීන්ගේ ස්වර රටා වලට අනුව ඔහු ගීතවත්වී ඇත.

එසේම ඔහු විසින් සහෘද කලාකරුවන් වෙත බොහෝ තනු නිර්මානය කොට ඇත!

කුමරියක පා සළඹ සැලුනා, බඹර පැටික්කී (අමරදේව ) / මට මව් පදවිය ලැබුනු දිනයෙදී, රුවන් මුවා පොලෝතලේ, දෙනෝ දාහක් නුවන් අතරේ (නන්දා මාලනී) / දෙතැනක පිපුනත් එක මල්, ඉරට උඩින් ඉර ගිරවට (සුජාතා) / සිත කතා කරයි (ජී ඇස් බී රාණි ) / සීගිරියේ කැටපත් පවුරේ, පුංචි පුංචි තරු කැට මැද (චිත්‍රා සෝමපාලා / සඳකඩ පහනක, වෙරළු ගෙඩිය, පිනි බර යාමේ, කුඩා ගමේ මද්දහනේ, සොයා පිළිසරණක්, සිනාසෙනු මැන, තාරකා මල්, හිසේ ගිණි ඇවිලෙතේ (සුනිල්) / හිත හිලෑ නෑ, කුලගෙදරින් දුම්බර කඳුවැටියේ (බන්දුල ) / සුවිසල් මැදුරක, ඔබගේ සුන්දර (ක්‍රිස්ටෝපර් පෝල්) / රාජ කිරුළු පලන්දාපු, (ජෝතිපාල ) / දෙතුන් වතාවක්  (මිල්ටන්) / කුන්ඩුමණී, පාන්කිරිත්තා, හඳ මාමා (ෆ්‍රෙඩී) / ඔබයන ගමනේ (රුක්මණී) / බැරිබර හින්දයි, සුළං කෝඩයක (එඩ්වඩ්) / ඔබේ ඇසුරින් (රෝහණ බෝගොඩ ) ඇතුළුව රෝහණ වීරසිංහ (නෙළුම් මලේ) / ලතා, බෙග්, ජයමහ, ජයතිස්ස හෙට්ටිආරච්චි, සනත්, අනෝමා රාසපුත්‍රම්, අමිතා වැදිසිංහ, කපුගේ, මාලනී බුලත්සිංහල, ෆීලික්ස් ඇන්ටන්, සිසිර, නිරංජලා, අබේවර්ධන, මල්ලවාරච්චි, අමරා රණතුංග, නීලා, විල්බර්ට් ඇන්තනි, අමරසිරි, නිර්මලා, ටී එම්, නන්දා පතිරණ, සමිතා, යමුනා, චන්ද්‍රාණි, ඇන්ජලින්, ලක්ෂ්මන්, මර්වින්, ශ්‍රීමතීතිලක රත්න ඇතුළු බොහෝ ගායක ගායිකාවන්ට ඔහුමධුර තනු නිර්මාණය කොට  ඇත!

එසේම ප්‍රේම කීර්තිද අල්විස්, සුනිල් ආරියරත්න, අජන්තා රණසිංහ කුලරත්න ආරියවංශ හා බණ්ඩාර කේ විජේතුංග ඇතුළු බොහො ගී පද රචකයින්ගේ  පදවැල් ඔහු ගීත කොට ඇත්තේය.

සරසවියේදී තමාහා බැඳුනු එහ්ත් සරසවි ජීවිතය සමගම වියැකී ගිය වැඩිමහළු ආදරය පිළිබඳව සුනිල් ආරියරත්නයන් අතින් ලියැවුනු "දෛවයෝගයකින් නොවේදෝ" ගීතයට තම ශෝකී බර හඬ එක් කරණ වික්ටර් "සඳකැන් වැසිලා - අඳුරේ එතිලා" ලෙස තමාගෙන් ඈත්ව ගිය විශ්වාසනීය බැඳීම පිළිබඳව ප්‍රේම් ගේ හැඟීම් වලට පන පොවයි.

ස්වකීය තහනම් ප්‍රේමය සත් සමුදුරෙන් එතෙර යෑම පිළිබඳව "සත් සමුදුරු තරණය කොට" යැයි ලියූ බණ්ඩාර කේ විජේතුංගයන් එම අත් පිටපත; පන පෙවීමට අත තබන්නේ වික්ටර්ගේ හාමෝනියම මතය.

මේ සියල්ල විප්‍රලම්භ ප්‍රේමයේ ය.

සත් සමුදුරු තරණය කොට

ගීතය මෙතැනින් (දුක ) විඳිමින්ම 

යලි හමුවන බලාපොරොත්තුවකින් වෙන් වෙමු!

අදින් වසර 33 කර පෙර 27/06/1990 දින නවයුගයේ සටහන් වූ ඔහු මා හා සම්මුඛ වීමේ මතකය.