තැඹිළි ගහ පීදිලා

පාන්දර ලැබෙන්නේ අළුත් ආරංචියක්

තැඹිළි ගහ පීදිලා පල දරා ඇති බවක්

කාටදෝ කියන්නේ හිතට ආවට නමක්

කියන්නේ නෑ කාටවත් වදිනවට ඇස් වහක්

තැඹිළි ගස සිටෙව්වේ තනිව නොව ඇය සමග

මුල් ඇදපු දා පටන් රැක්කේ බැඳ පන සමග

දිනෙන් දින අතු ලමින් ටිකින් ටික උස ගියද

හැම විටම දුටුවෙ එය තාම පොඩි ගසක් ලෙස

කාලයක් ගෙවෙන කොට උස ගියා මට වඩා

ගස මුලට ආවාම සෙවන දුන්නා එයා

මගේ අතු අල්ලන්න; සිප ගන්නදෝ කියා

විටෙන් විට මද නලින් බිමට නැවිලා ගියා

ගොක් අත්ත තනි කෙළින් ඉහලටම විහිදුනත්

මෝරද්දි අතු නැමේ එය සිතට ඉගෙන ගන්

බාල වී කරල් සෘජුව ගොයම තුළ වැජඹුනත්

පැසුනු වී කරල තම උපත දෙස නෙත් යොමන්

ගස හොඳින් ඉහල ගොස් නුබට අත් දිගු කලා

පූදින්නෙ කවදාද? සිතා සිටියා බලා

දහස් බුදු බව ලබන වප් මසේ කල් බලා

ගස පීදිලා පුවත දෑස් අග තෙත් කලා

1/10/2025