Monday, January 29, 2018

79. තුවක්කු සහ පතරොම්

මල් මල් වාරම්!

ඉස්සර පරණ පත්තරයක් අරණ් ලුහුඩු දැන්වීම් පිටුව බැලුවොත් මේ මාතෘකාව ගව ආදී මහීෂ සතුන් පිරිවරා සිටිනු දකින්නට පුළුවන.        
ගව ආදී මහීෂයින්  ගැන කතා කරණ්නට තවත් දෙයක් ඉතිරිවී ඇත්නම් එළඹෙන  ප්‍රාදේශීය  සභා මැතිවරණයේදී අසා, විමසා දැන ගැනීමට හැකියාවක් ඇති බැවින් ද එයින්  පත් වෙන අයගෙන් බේරී සිටීමට අපි වැනි හුදී ජනයාට පමනක් නොව වැදි ජනයාට පවා සාදාරණ අයිතියක් උවමනාවක් ඇති බැවින් තුවක්කු සහ පතරොම් වලට වැඩි අවදානයක් යොමු කරණ්නට සිතුවෙමි.

එංගලන්තෙ "සිළුමිණ" පත්තරේ පලවූ තුවක්කු දැන්වීමක්!

පැරණි සිළුමිණ පත්තරයක් අරණ් ලුහුඬු දැන්වීම් තීරය කියවාගෙන ගියහොත් මෙවැනි දැන්වීම් තීරුවක් දක්නට ලැබෙනු ඇත.
“අනර්ඝ තත්වයේ බෝර 12 කානු දෙකේ වෙම්බ්ලි ඇන්ඩ් ස්කොට්  තුවක්කුව ...” ආදී වශයෙන් ලියැවුනු තුවක්කුවේ විස්තරේ දැක්කාම ඒක හරියට  මංගල දැන්වීමක මනමාළිය වර්ණනා කරලා තියෙනවා වගේ මයි !

සිහින් සිරුරක් හිමි හුරු බුහුටි සුන්දර යුවතියක් වන්! 
බලපියකො ලාලිත්යය!

මේක කියවා ගෙන යනකොට ඊට යටින් තියෙනවා “බෝර  16 හා 20 තුවක්කු දෙක ……” කියලා තවත් සටහනක්. 
බෝර 12 බේරගන්න බැරිව ඉන්නකොට තවත් දෙකක් ?
 මේ බෝර ගනන් වලින් කියැවුනේ Shot Gun හෙවත්  මූනිස්සම් තුවක්කු  හෙවත් පතරොම් තුවක්කු ගැනයි. 
මූනිස්සම් කියන්නේ තුවක්කුවට යොදන පතරොම තුල තියෙන කුඩා ඊයම් බෝල වලට බව මම නොකීවාට ඔබ තමුන්නැහැලා දන්නා බව ඉන්තේරුවටම දනිමි.  

අනේ මේ අග්ගලා නොව ඊයම් බෝල හෙවත් තනි වච්නෙන් කියනවානම් මූනිස්සම් ය!

මේවායින් කියැවුනේ තුවක්කු බටේ ප්‍රමානය හෙවත් සයිස් එක . 
හැබැයි තුවක්කු බටයක පසුපස කෙලවරට සාපේක්ෂව ඉදිරි කෙලවර කුඩාවේ.  තුවක්කුවේ  ටේපරේ කියන්නේ මේකට වෙන්න ඕනෙ !

තුවක්කු හදන අයියලාගෙන් මේ ටේපරේ ගැන ඇහුවාම කියන්නේ "ඕක නැත්න වෙඩි තිබ්බාම නිකං කට හෝදලා දැම්මා වගේ" කියාය!

ඒකාලෙ සුද්දගෙ රටේ තිබුනේ යාර ,අඩි අඟල් වගේම අවුන්ස රාත්තල් හොන්ඩර වගේ මිනුම් !
ඉතින් තුවක්කුවේ බටේ ප්‍රමානය කියැවුනෙත් මේ ඒකක වලින්මයි.

සුට්ටං ටුවක්කුවේ සිට ඉහලට!

බෝර 12 යනු ඊයම් රාත්තල් එකකට අල්ලන සමාන ඊයම් බෝල ප්‍රමානයය. තවත් විදියකින් කියනවානම් ඊයම් රාත්තලක් ගෙන සමාන කොටස් 12 කට  බෙදා ගත් විට ලැබෙන එක් කොටසක් ගෙන එයින්  ගෝලයක විෂ්කම්හයට  සමාන විෂ්කම්බ්හයකින් යුත් බටයක්  බෝර 12 තුවක්කුවක් වේ. 

මේ  ආකාරයෙන්ම බෝර 16 හා 20 ද නිර්මාණය කරගෙන ඇත.
 ඊයම් රාත්තල 16 කට බෙදා ඉන් කොටසකින්  සාදන බෝලය ඊයම් රාත්තල 12 කට බෙදා සාදන බෝලයට වඩා කුඩා බව මා අමුතුවෙන් කියා සිටින්නට ඇවැසි නොවේ.
මෙම ගණිත කර්මය අසීරු වේ නම් පාන් රත්තල 4 බෙදූ පසු එක කොටසක විශාලත්වය 2 න් බෙදූ කොටසට වඩා කුඩා බව  ඔබ තමුන්නැහැලා   තේරෙණවා ඇතැයි සිතමි. 
 යට කොටස විශාල වෙන්න වෙන්න වටිනාකම අඩුවෙන බව මෙයින් පෙනී යනු ඇත.
මේ  පතරොම් තුවක්කු ඒකාලෙ 12 , 16 ,  20 ට අමතරව 410 කියලා එකක්ද ආවේය.
 යටියන්තොට ගණිතකන්දේ 410 තුවක්කුවක් තියෙන බව මාගේ මිත්‍ර දයානන්ද  කී  විට එය බලන්නට හැතැම්ම ගනනක් ගෙවාගිය හැටි මතකය.
 අද කාලෙ නම් මේ ගමන ඒ තරම් අසීරු එකක් නොවන්නේ දැන් හැතැම්ම නැති නිසාය. දැන් ඇත්තේ ඊට වඩා කුඩා ඒකකයක් වන කිලෝ මීටරය! 

අනේ අයිබොවන්ඩ දැන් අහන්න එපා 410 කියන්නෙ ඊයම් රාත්තලක් 410 න් බෙදලා  ද ……..? කියලා.
අනේ නෑ ඒක එහෙම නෙවෙයි.ඒක වෙනමම මිනුමක් ! ඒක අඟලෙන් දශම 41 තමයි මේ කියන්නේ.
කාත් කවුරුත් දන්නා පොයින්ට් ත්‍රී එයිට් කියන්නෙත් මේ වගේ මිනුමක්!

ඉතින් අපි  ආයෙත් යමු බෝර  12 නොහොත්  බෝර 12 තුවක්කුව වෙත. 
මේවාට දාන පතරොම් වලත් (හැට්ට පතරොම් එහෙම නොවේ) නොම්මර 4 , SG , තනි උන්ඩ යනාදී වශයෙන් කොටස් කිහිපයකි. 
නොම්මර 4 යනු කුරුළු උන්ඩයි. මේවායේ මුං ඇට ප්‍රමාණයේ කුඩා ඊයම් කැට රාශියක් පවතී.   
 SG උන්ඩයක ඇත්තේ කැට 9 කි .  
බෝර 16 තුවක්කුවකට යොදන පතරොමක කැට 6 ක්ද බෝර  20 තුවක්කුවට යොදන පතරොමක කැට 3 ක්ද අන්තර්ගතව ඇත. 
 තනි උන්ඩ  ලෙස ව්‍යවහාරයේ හැඳින්වෙන  පතරොමක ඇත්තෙ එක ඊයම් මූනිස්සමක පමනි.
( මෙය හරියට ත්‍රී වීල් එකට රෝද තුනක් පැවතීම වැනිමවූ පුදුම උපදවන කාරණයකි !)  

තනි උන්ඩෙ!
බලපල්ලකො තියෙන ආඩම්බරේ!

බෝර 12 තුවක්කුවට බෝර 20 හෝ 410 පතරොම් යෙදීම සඳහා භාවිතා කරණ ; වඩා  විසල් බටය තුලට දැමිය හැකි තවත් අවශේෂ බට සුද්දාගේ රටේ  පවතී. ඒවාට කියන්නේ අඩප්පර හෙවත් Adapters  කියාය.
අඩප්පරයක්! 

අඩප්පරයක් ගිලපු තුවක්කුවක්!

තනි උන්ඩෙ පතරොම් ඒකාලේ යොදාගෙන තුබුනේ අලින්ට වෙඩි තියන්නටය කියා දවසක් අපේ බුරම්පි ආතා  මා එක්ක කීවා ය. 
බුරම්පි ආතා  කියන්නේ අපේ තාත්තාගේ මාමා විය. 
අර බී ඇල් පොඩිනෝනාගේ බාලම මල්ලිය.
 උන්දෑ ඒ කියන්නේ   බුරම්පි සිංඥ්ඥෝ උන්නැහැ නොදන්න කෙහෙම්මලක්  නැති කෙනෙක්. 
උන්නැහේ හොර තුවක්කු හදපු කෙනෙක්. 
ඒවා කලේ විනෝදෙට. 
එයා ඒකෙ දුන්නට දැම්මෙ සිංගර් මැෂිමේ ෆුට් එක නොහොත් පාදය පහලට තෙරපාගෙන ඉන්නා දුන්නයි. 
ඔය කියන බුරම්පි ආතාගේ මැෂින් දුන්න! 

“ඔය නොම්මර  12 තුවක්කුවට් හරියටම හරියන බටේ තමයි මොරිස් මයිනරේ ස්ටියරින් බටේ …!” බුරම්පි ආතා මට කීවේ කනට ලංවෙලා.

මේ මහතැන් දන්නවානම් මේ කරකවන්නෙ තුවක්කු බටයක් කියලා!

 තව තුවක්කු හදන්න නම් දරාපු අයියා කෙනෙක් නම් කිව්වේ “මලේ ඊට හොදයි විලීස් ජීප් එකේ ගියර් බොක්ස් එකේ ලිවර් හිර කරණා දුනු කියාය !” 

මෙච්චර සුපිරි කතාව මැද්දට කොහෙවත් නැති  බුරම්පියෙක් පැනලා වැඩේ අල කලා කියලා හිතන්න එපා.
 එතනින් තමයි ඊලඟ කයිවාරුවට පොට පෑදෙන්නේ. 
මේ දුනු කියන්නේ සිත්තර පත්ත්‍රේ කැලුම් එක දිගට අවුරුදු හතක් අටක් හොටු පෙරාගෙන ලව් කල  දේදුනු වත් තිසා හාමි ඕනමන්ට් එකක් විදියට තියාගෙන ඉන්න අර අඩි හතරක් පහක් උස  ගැජට් එක වත් නොවේය. 
මේක තේරෙණ හිංගලෙන් කියනවා නම් ස්ප්‍රින් එකකි.

අපේ ආදරණීය චින්තන අයියාගේ චින්තනයෙන් කල එළි  බැහැපු රටම දන්න ඩබල. දේදුනු හා කැළුම් ! පෑත්තක සිට මුන් දෙන්නාට රබර් ඇහැ දාගෙන ඉන්නේ යුනිකෝ කොල්ලාය!

තිසා හාමිම නෙවෙයි හැබැයි එවගේම වෙනත් බුවෙක්! - දුනු හී දරාගෙන!

සෑම පතුරමක්ම  පාහේ සමන්විත වී ඇත්තේ වෙඩි බෙහෙත් වලිනි.
 අපිට බීරංගෙට දාන ගිණිකූරු බෙහෙත් වල  ඉඳන් දක්වා ඇල්ෆ්රඩ් නෝබේල් හොයාගත්ත නයිට්‍රෝ   ග්ලිසරීන් හෙවත් ඩයිනමයිට්  නැතිනම් ට්‍රයි නයිට්‍රො ටොලුයින් - ( අනුග්‍රහය සුමිත් කළ්යාණ මිත්‍ර)(Trinitrotoluene) හෙවත් TNT දක්වා සියල්ල වෙඩි බෙහෙත් උනාට සුද්දාට තුවක්කු පතරොම් සඳහා උපයෝගී කරගන්නා වෙඩිබෙහෙත්  ගන් පවුඩර්  Gun Powder වූවේය.  
මෙම Gun Powder සෑදී ඇත්තේ සල්ෆර් , අඟුරු හා පොටෑසියම් නයිට්‍රේට් මිශ්‍රනයකි .  තුවක්කු සෑදීමට ගත් මිශ්‍ර ලෝහය හැඳින්වූයේ Gun Metal  කියාය. 

Gun Metal   සෑදී ඇත්තේ 88% තඹ 8-10% ටින් හා  2-4% සින්ක් (තුතනාගම්) මිශණකිනි.


 තුවක්කු බටය දනිස්සට තියලා නවන්න පුළුවන් වග කීවේ කරවනැල්ලේ මෛත්‍රී අයියාය. 
එයා  කිවානම් ඒක ජී ඇල් පෙරේරා ගේ තාත්තා කීවාට වඩා මට ශුවර්ය!
 මේ ජී ඇල් පෙරේර කියන්නේ  මා සමග එකම  පංතියේ සිට ඉහලට ඉගෙන ගෙන ලොකු මහතැන්  කෙනෙක් වූ ජී ඇල් පෙරේරා ය. 
එයාගේ තාත්තා එකල යුධ හමුදාවේ තුවක්කු රෙපයාර්  අංශයේ ලොක්කා ව සිටියේය .


අනේ මේ ජී ඇල් ලගෙ තාත්තානම් නොවෙයි. 
හැබැයි මේ ඉන්නෙ සුද්දගෙ රටේ තුවක්කු බාස් කෙනෙක්!

 ගෙවල් තිබුනේ දෙමටගොඩය. 
 එකල ජී ඇල් ලගේ ගෙදර ගිය විට මා වැඩි පුර රැඳෙන්නේ ඔහුගේ තාත්තා සමගය.
 මන්ද එයා තුවක්කු පිස්තෝල ගැන මගේ තිබූ කුහුළ  දුරු කරණ නිසාය. 
ජීඇල්ගේ තාත්තා ඇරපු අතක් නෑ ලී වෑන් ක්ලිෆ්  වගේමය. 
For a few dollars more එකේ කර්නල් ඩග්ලස් මෝටිමර්  එක්ක ජී ඇල් පෙරේරාගෙ තාත්තා එකට තිබ්බොත් අර බෝන්චි කන  කොට ගේම අදින්න ගිහින් ඉල්ලං කන කුදාට වත් දෙදෙනා වෙන් කරලා හඳුනා ගන්නට බැරිය!

ලී වෑන් ක්ලිෆ් - කොහොමද ගැම්ම!

මතකද ඔය බයිස්කෝප් එකේ කර්නල් ඩග්ලස් මෝටිමර් නොහොත් ලී වෑන් ක්ලිෆ් ඔය කුදා එක්ක මුලින්ම ගේම ඉල්ලන සීන් එක?
 කර්නල් එයා ගේ පයිප්පෙ පත්තු කරගන්න ගිණි කූර පත්තු කරගන්නේ බාර් එකේ නැමිලා ඉන්න කුදාගෙ ප්ශ්චාත් භාගයේ  අතුල්ලලා !

කුදා එක්ක ගේම ඇදගත්තු ඒ අමරණීය අවස්ථාව! -  නාකි විසේ!

 ඒකලේ තිබුනේ ඒවගේ ගිණිකූරු! පස්සෙදි තමයි ඔය Safety Matches කියලා අටමගලක් ඇවිත් තියෙන්නේ. 
අන්න ඒ වගේ තාක්ෂණයක් තමයි පතරොම ඇතුලේ තියෙන වෙඩි බෙහෙත් වලට ගිණි අවුළුවන්න පාවිච්චි කරණ්නෙත්. 

     සුට්ටං රවුම - කැප් එක

ඉතින් මම  අර කීව ගන් පව්ඩර් එහෙම නැත්නම් වෙඩි බෙහෙත් වලට ගිණි අවුලුවන්න පොඩි කැප් එකක් ඕනෑම  පතරොමක පිටි පස්සේ තියේ. පතරොම පිටිපස්සේ හරි මැද්දෑවෙ සුට්ටං රවුමක් තියෙන්නේ ; ආං ඒක තමයි  මේ  අපේ උදවිය කැප් එක කියල හඳුන් වන්නේ . 




බඩු ගබඩාව!

ඕක ඇතුලෙත් තියෙන්නේ වෙඩි බෙහෙත්ම (Primer)  තමයි. 
අඩු පීඩනයකින් ගිණිගන්නා එකක් තමයි ඕක ඇතුලේ තියෙනවා කියන්නේ. මේක මැද්දට පොඩි පාරක් වැදුණු ගමන් හට ගන්නා ගිණි පුළිඟුවෙන් ඇතුලත තියෙන ගිණි ගත් සැනින් මහත් පීඩනයක් ඇතිකරණ ගන් පවුඩර් වල්ට ගිණි ඇවිලෙන්නේ. 
ඒ සැනින් හටගන්නා අධික පීඩනය හිස්ව ඇති තුවක්කු බටයේ ඉදිරි කෙළවරින් මූනිස්සම්  පිටතට තල්ලු කරමින් පිටවේ. මේ සකල විධ උපක්‍රමයට කියනා පොදු නම වෙඩි තැබීමය ! නැතහොත් ගිනි  පිඹීමය !!   

මේ සිද්දියට පතරොමේ කැප් එක මත පීඩනය ඇතිකරණ්නේ හැමරයෙන්‍ය. මේ හැමරය පනගැන්වේ දුන්නකින්ය. මෙන්න මේ දුන්න ගැනයි බුරම්පි සිංඥ්ඥෝලා අර විදියේ කතාවක් කිව්වේ.


“මලේ වෙම්බ්ලි ඇන්ඩ් ස්කොට් තුවක්කුවේ තියෙන්නේ මේන්න මේ වගේ දුන්නක් !” කියා අතේ දඹරැඟිල්ලයි මැදඟිල්ලයි ඈත් කරලා පෙන්නුවෙත් නම් දරාපු අයියා කෙනෙක්. 

මේ වගෙ දුනු වලට කිව්වේ “කාදු දුනු” කියලයි.  


කාදු දුන්න උඩ ! නිකං දුන්න යට!!



වෙම්ලිඇන්ඩ් ස්කොට් තුවක්කුවේ එකම වැරැද්ද ඔය දුන්නලු .
 කැඩුනොත් හදන්න දන්න එකෙක් ලොවෙත් නෑ  ලොවි ගහෙත් නෑ කියලා තමයි කියන්නේ. 
හැබැයි ඒකාලේ සුපිරි අයියල ඕක කැඩුනාම දාල තියෙන්නේ අතින් වයින් කරණ පරණ ගරැමෆෝන් වල දුන්නෙන් කෑල්ලක් කපලලු!

ලියන්න මහන්සි වෙන්න ඕනෙ නෑනෙ -  ඔය කියලම තියෙන්නෙ!

වෙම්බ්ලි ඇන්ඩ් ස්කොට් කිව්වාම මතක් වුනේ අර මහල්ලා සහ මුහුද පොත ලියපු අර්නස්ට් හෙමිංවේගේ  ඩබල් බැරල් එකත් මේ ජාතියේ එකක්!
 අන්තිමට ඒක කටේ දාගෙන වෙඩි තියාගෙන තමයි එයා මේ ලෝකෙන් යන්න  ගියේ. ඩබල් බැරල් කියන්නේ බට දෙකක් සහිත මූනිස්සං තුවක්කු වලටය. මෙයට එක වර පතරොම් දෙකක් දැමිය හැකි  වේ.

මේව ඉතින් සිහින!

මේ ඩබල් බැරල් තුවක්කු  ට්‍රිගර් දෙකක්  සහිතවද නොඑසේනම් සිලෙක්ටරයක් සහිතව තනි ට්‍රිගරයක් සහිතව හෝ නිපදවා ඇත. 
මේ සිලෙක්ටරය මෙහෙයවා පලමුව ක්‍රියත්මක විය යුත්තේ කුමන  බටයේ ඇති පත්‍රොමද යන්න තෝරා ගත හැක. සෑහෙන අමරුවක් ඇත්නම් පතරොම් දෙකම එකවර ක්‍රියාත්මක කල හැකි ඒවාද තිබෙන බව මා  අසා  ඇත!
 එහෙත්  අහෝ දුකකි ඉරකි තිතකි දැකලා නම් නැත! 
 ට්‍රිගරය යනු තුවක්කුවෙන් ගිනි පිඹීමට දබර ඇඟිල්ලෙන් පසුපසට මිරිකන කුඩා ලීවරයයි .  
තුවක්කුවට මල පනිනේ මේන්න මේක ඇල්ලුවාම තමයි!

මූනිස්සම් පතරොම් කිහිපයක් දැමිය හැකි තුවක්කුවට කියන්නේ රිපීටරය කියාය.  ලංකාවේ බහුල වශයෙන් දැකිය හැකි රිපීටර වර්ග දෙකින් එකක් වන ස්මිත් ඇන්ඩ් වෙස්සන් රිපීටරයට පතරොම් පහක්ද මොස්බර්ග් රිපීටරයට පතරොම් අටක්ද ගබඩ කොට ගත හැක. 
පතරොම් ගබඩාකරණයට කියන්නේ ලෝඩ් කරණවා කියාය.
රිපීටරයට ලෝඩ් කරද්දී එක පතරොමක් හෝ කණපිටට ලෝඩ් වුනොත්  මලම කෙළියකි. මරණ්න ගිය එකාට “වච්ච්ල්” කියා පතරොම බේරා ගත යුතුවේ.

Pump Action Shot Gun

රිපීටර තුවක්කු වලට බොහෝ රටවල කියන්නේ Pump Action Shot Gun කියාය. මන්ද තුවක්කුවේ ඉදිරිපස ඇති අල්ලගන්නා කොටස Fore End / Fore stock පිටුපසට හා ඉදිරියට  චලනය කිරීමේදී  පෙර වාරයේදී වෙඩි තැබීමට භාවිතාකල පතරොම ඉවත් කිරීම ; තුවක්කුවේ බටයට පහලින් ඇති Tubular Magazine එක තුල ගබඩා කොට ඇති පතරොම බටය තුලට ලෝඩ් කිරීම  හා හැමරය පනගැන්වීම යන කාරණා ත්‍රිත්වයම සුරුස් ගා සිදුවන බැවිනි.

මෙසේම ක්‍රියත්මක වන රයිෆල් තුවක්කුද ඇත. 

ඒවයේ චලනය කල යුතුවන්නේ Fore End එක නොව Trigger Guard එකය. 
Fist Full Of Dollars බයිස්කෝප් එකේ Gian Maria Volonte  හෙවත් Ramon Rojo තියාගෙන ශිල්ප දක්වන්නේ  මෙම වර්ගයේ රයිෆලයකිනි. 

මැගසිනයේ තිබූ අන්තිම පතුරම වනතෙක් වීරයාට වෙඩි තෑබීමෙන් පසුත් ඔහුව මරා දමන්නට නොහැකිව  කොරවී - රෝජෝ

  මේවයේ විශේෂත්වය වන්නේ රයිෆලය රඳවා ගැනීමේදී මෙම ට්‍රිගර් ගාර්ඩ් එක සමග  අල්ලා  ගැනීමට හැකිවන පරිදි අතේ දඹරැගිල්ලට පහලින් ඇති අනෙකුත් ඇඟිළි ත්‍රිත්වයම රිංගවිය හැකි අකරයට   ට්‍රිගර් ගාර්ඩ් එක සමන්විත වීමයි. 
මෙම වර්ගයේ තුවක්කු හැඳින්වීමට භාවිතා කරණ පොදු පදය වන්නේ Lever Action Guns යන්නය.

Lever Action Gun

සාමාන්‍ය තුවක්කු වලට පතරොම් දැමීමට එය කැඩිය යුතුවේ. මේ කියන්නේ ගෙදර පවුල ට අහුවුනාම වාගේ  පොලවේ ගසා සුන්නත් දූලි කරණා එක නම් නොවන්නේය. එහි බටය පහලට නැමිය යුතුවේ. එයට කුඩා අගුලක්ද ඇත.
අගුල පන්නා බටය පහතට නැමූ පසු පතරොම පහසුවෙන් රිංගවිය හැක.

කඩා ඇතුලු කිරීම!

 ඊට පෙර පත්තු කල පතරොමේ හිස් කොපුව ඔටෝ එලියට විසිවෙන හුරු බුහුටි  ක්‍රම වේදයක්ද මෙහි අටවා ඇත.
 ඉන්පසු නැවත තුවක්කු බටය වසා හැමරය අටවා ට්‍රිගරය මිරිකූ විට බඩු බනිස් ය! සමහර ඒවාට Safety Lock ජන්මයෙන්  ලැබී ඇත.
 අපේ සීයාගේ එනම් බී ඇල් පොඩිනෝනාගේ මහත්තයා  සතුවූ ස්ටීවන්ස් තුවක්කුව ඊට හාත් පසින්ම වෙනස්වූ භාණ්ඩයකි. එය කඩා පතරොම රිංගවා වැසූ  පමනින් හැමරය පන ගැන්වේ. 
සේෆ්ටිය  පන්නා ට්‍රිගරය මිරිකූ සැනින් වැඩේ සිද්ධවේ.

ආචාර්‍ය ඇන් ඇම් පෙරේරා
නවසිය හැට ගනන්වලදී ඡන්දෙන් දිනූ ආචාර්‍ය ඇන් ඇම් පෙරේරා මහතා  ගමන් ගත් පෙළපාළියට ; බදුල්ලවල යසරත්න මාමා ගේ තාත්තා අපේම තව ඥතියෙකුගේ ගෙදර දොර මුල්ලේ සිට වෙඩි තැබූ පසු එතුමාව  තම  ගෙදර ඉස්තෝප්පුවේ වාඩි කරවාගෙන; ඔහුගේ මෝටර් රිය පැමිණෙන තුරු ;  EALY බ්‍රෑන්ඩ් එකේ පතුරම් 25 පෙට්ටියක් කඩා   ඉන් එකක්  ලෝඩ් කරවාගෙන සීයා  සිටියේ මෙම  ස්ටීවන්ස් තුවක්කුවටය. 

මේක ඒකම  නොවුනත් ඒක මේවගේ වෙන්න ඈති!

 එම තුවක්කුවට හෙන හුරා වැහුනේ නාහේනෙ මූකලානේ ගල් ලෙනේ වැඩ වාසය කල වජිර බුද්ධි නොහොත් දනියෙල් හමුදුරුවෝ කිසියම් ගුරුකමක් කලාට  පසුව යැයි මතයක් පවතී. 
එම තුවක්කුවට අරක් ගෙන සිටි අපේ ලොකු බාප්පා  දිනක් මහ රෑ දිෂ්ඨියකට වෙඩි තබමින් සැරි සැරූ පසු එම තුවක්කුවෙන් කිසිදා ඉලක්කයට වෙඩි තැබීමට නොහැකිවූ බවට අපේ පවුලේ ජනප්‍රවාදයේ කියැවේ. 


මේ ගල් ලෙන වන විට ලෝක ප්‍රසිද්ධ වී හමාරය! 
ජයන්ත චන්ද්‍රසිරි ගේ දඬුබස්නාමානය ටෙලියේ රණා - කමල් අද්දර ආරච්චි සැඟවී සිටින්නේ නාහේන මූකලානෙ පිහිටි මේ ගල්ලෙන තුලය!

කෙසේ හෝ මා එම තුවක්කුව අවසන් වතාවට  දැක්කේ 1971 අප්‍රෙල් කැරැල්ල පැවති සමයේදීය. 
එකල සියළු ගිණි අවි පොලීසි වලට භාරදෙන්නට ආ නියෝගය පරිදි එය භාරදුන් අතර නැවත ඒ වෙනුවට ලැබුනේ කාගේදෝ තුවක්කු කබලකි! 
සීයාකලේ මගේ තුවක්කුව නැත්නම් මට අනුන්ගේ ඒවා වැඩක් නෑ කියා එකක්වත් නොගෙන ආපසු පැමිණීමය ! 
අයියෝ සල්ලි !

Bolt Action

  රයිෆල් වලට පතරොම් ලෝඩ්  කිරීමට  ඇත්තේ  හැමරය වෙනුවට එහි ඇති Firing Pin  එක පන ගන්වන්නේත් කුඩා ලීවරයක් පසු පසට ඇදීමෙනි. 
ඒවට කියන්නේ Bolt Action  තුවක්කු කියාය.
  එය පිහිටා ඇත්තේ තුවක්කු බටයේ පසුපස කෙළවරේය. 
 Sniper හෙවත් දුර සිට ඉලක්කයට වෙඩිතබන වෙඩික්කරුවන්  භාවිතා කරණ්නේ Sniper Rifle  මෙම Bolt Action  තුවක්කු වේ.   

Sniper Rifle -මරණය තැපෑලෙන් බෙදීම!

 මෙයට කලකට පෙර පොලිස්  රාළහාමිල කරේ තියාගෙන ගොස් වෙඩි තියනවා වෙනුවට දෝත බදා ඔලුවට පත බෑවූ 303 රයිෆලයද බෝල්ට් ඇක්ෂන් රයිෆලයකි. මේ 303 (ත්‍රී ඕ ත්‍රී ) රයිෆලය සෙල්ලම් භාණ්ඩයක් නොවන්නේය.
 මෙම රයිෆල් පතරොමක Effective Range  එක නොහොත් “වදුනොත් මළා" දුර යාර 3000 ක් හෙවත් මීටර 2700  හෙවත් කිලෝ මීටර 2.7 කි.

හිත හීලෑ නෑ!

ඒ කියන්නේ බොරැල්ලේ පොලීසියේ  සිට වෙඩි තැබූ විට  මරදාන කිට්ටුවට වදින  බවය! අනේ ඒවට මොනවා කලාද මංදා ! දෙවන මහ ලෝක යුද්ධයේදී බ්‍රිතාන්‍ය හමුද විසින් භාවිතා කල සුප්‍රකට  Bren Gun නමැති LMG (Light Machine Gun)  සඳහාද භාවිත  කොට  ඇත්තේ මෙම 303 උන්ඩය.

මිත්‍ර හමුදා බිම ලැග ගෙන!

උන්ඩ කිව්වාම මතක් උනේ. ශ්‍රී ලංකාවේ ප්‍රථම විධායක ජනාධිපති ජේ ආර් මහතා කීවේ උන්ඩ වලට මුන්ඩ කියාය. ඒ කුමන මුන්ඩයක් හිත තබාගෙනදැයි කියන්න දන්නේ එතුමා හා එලීනා ජයවර්ධන මහත්මිය පමනකි!  

   මුන්දෑගේ මුන්ඩ කතා දන්නෙ මේ උපාසක අම්මා පමනි!

 තුවක්කුවක බටය දික්වූ  තරමට එහි ඉලක්කය හොඳය. 
පතරොම් තුවක්කුවක නම් බටය ඇතුලත් ඇති ආනතිය එනම් කෝණික බව වැඩිවූ තරමට ඉලක්කය වෙත මූනිස්සම් නොඉහිරී එක රොත්තට වදී.
 එහෙත් තුවක්කු බටය දික් වීම හා පෙරකී කෝණික බව Taper වැඩි වීමෙන් තුවක්කුවේ වාංගුව  නොහොත්  පසුපසට එන පහරේ Backfire ප්‍රභලත්වය රඳා පවතී.   
පෙරකී තනි උන්ඩ යෙදූ පතරොමක් ගැලවූ විට එයතුල මූනිස්සමට  බද්දකල ආනත දැති සහිත නයිලෝන් රෝදයක් පවතී. 
ඒ උන්ඩය ගමන් කිරීමේදී එයට භ්‍රමනයක් ලබ දීමටය. අධික වේගයෙන් පිටවන උන්ඩයේ පසුපස සවිකොට ඇති දැති රෝදය තුවක්කු බටයේ ඇතුලත බිත්තිය හා ගැටීමෙන් එය භ්‍රමණය වන්නට පටන් ගනී.

පිට පොට නොයන පොට!

රයිෆල් තුවක්කු වල මෙම ක්‍රියාව ඉටු කිරීමට බටය තුල පොටක් Thread එකක් කපා ඇත. කාත් කවුරුත් දන්නා ටT 56 ද 9mm ද මේ  පොට නොහොත් රයිෆ්ලින් Rifling එක දැකගත හැකිය.
 Rifling Twist කියන්නේ මෙම පොට ටය.
  Rate of Twist කියන්නේ  එක් වටයක් බ්‍රමනය වන්නට උන්ඩය පොට දිගේ කොපමණ දුරක් ගමන් කලයුතු වන්නේද කියාය. එය සමන්‍යයෙන් 1 ට 7 ක් පමණවේ. 
303 හි මෙය 1 ට 10 කි. එනම් එක් වටයක් බ්‍රමණය වන්නේ අඟල් 10 ක දුරක් උන්ඩය ගමන් කල යුතු පසුවය.   



 ගැට්ට සහිත!

ප්‍රධාන වශ්යෙන් පතරොම් වර්ග  දෙකකි.
 රිම් එක සහිත හා රහිත මෙම දෙවර්ගයයි. 
තුවක්කුවේ බටය තුලට පතරොම මුලුමනින්ම ඇතුළුවීම වැලැක්වීම හා වෙඩි තැබූ පසු හිස් පතරොම් කොපුව ඉවතට ගැනීමට මෙම රිම් එක ප්‍රයෝජනයට ගැනේ. රිම් එකක් සහිත පතරොමක් ක්‍රියාත්මක වීමේදී රැඳෙන්නේ බටයේ පසුපස කෙළවරේය. 


රයිෆල් , පිස්තෝල වැනි පතරොම් රැසක් ගබඩා කිරීමට ඇති මැගසිනය තුල ඇසිරීමට පහසුවන පරිදි එලියට  නෙරූ රිම් එකක් නොමැත. 
   එහෙත් මෙම  ස්වයංක්‍රීය  ගිණි අවි වල ක්‍රියාත්මක වීම සඳහා බටය තුලට ඇතුළු කරන්නේත්  ඉන්පසු ඉවතට ගන්නටත්  හැකිවන පරිදි පතරොම අල්වා ගැනීමට කාණුවක් නොහොත් Groove  එකක් හරා ඇත !


ගැට්ට රහිත!

කාණු කිව්වාහම තව එකක් මතක් වුනා නොලියාම  බැරි. 
තුවක්කු ගැන කතාකරද්දි භාවිත කරණ එයටම සුවිශේෂ වූ වචන කෝෂයේ ඇති තවත් එක් වචනයකි “කාණු” යන්න. 
අර දයානන්ද  ගුණවර්ධනයන්ගේ මධුර ජවනිකා නාටකයේ ඒකාලෙ කලා කරුවෙකුව සිටි ජැකා ; අනුලා බුලත් සිංහල එක්ක; ජෝන් කොතලාවල ගැන කියන  විරිදුවේ “කාණු හතයි පිස්තෝලෙට.” කියා කියැවෙන්නේ මෙම කාණු ගැනය. ඒ රිවෝල්වරවල පතුරොම් රිංගවන කුහර මේ නමින් හඳුන්වති.    

 ජැකා ඇන්ඩ් අනුලා (වෙන්න ඕනෙ!)

නෙයිනට තියෙන්න ඇත්තේ මේ වගේ එකක්!


“රිවෝල්වර ” ඒකත් කතාකරණ්න සුපිරි මාතෘකාවක් ! පාඨක ප්‍රථිචාර බලලා කතා කරමු !

Wednesday, January 24, 2018

78. සිරි බෝ අයියා !




සවිය ඇති දින ලඟින් සිටියද වාරු නැතිවූ පෙර දිනේ
දිවිය ඇති තෙක් එක්ව ඉන්නට පැතුව ඔබ නැත  අද දිනේ
නිවිය යුතු වෙද සෙනෙහසේ සිළු  දැල්වු ඔබ මා සැම දිනේ
දිවිය නිම වන දිනට පෙර මා පැමිණියෙමි  ඔබ කෝ අනේ.........?



  


Saturday, January 20, 2018

77. ගඟක් දිගේ ගිය ගමනක් …….18

නුවරගලට ගොඩබැසීම!

අප අත ඉතිරිව ඇති අහාර ස්ව්ල්පයෙන් කුමක් නම් කරණ්නද ? 
මෙයට කිසිදු පිළියමක් නොමැති වුවද මාගේ දැඩි ආත්ම විශ්වාසයක් තිබිනි. 
එය ලැබුනේ පසිඳුගේ කොල අත්තෙන්ද ? 
නොඑසේනම් මාගේ බිරිඳගේ දෙවියනට කල භාර කිරීමෙන්ද ? 
නොඑසේනම් අප මෙතෙක්  ස්වභාව ධර්මයට  එකඟව කරගෙන ආ චර්‍යා රටාව  නිසාද කියා මට සිතාගත නොහැක.

පාසලේ උසස් පෙළ ලියද්දී මගේ මව රෝගාතුර විය. 
ඇය ලෝකයේ සිටි හොඳම අම්මාය! 
ඇය රෝගය උත්සන්නව එක් තැන්විය. 
පුරා වසර දෙකකට ආසන්න කාලයක් මා ඇයව රැක බලා ගත්තෙමි. 
මගේ අම්මාව දෑතින් ඔසවාගෙන මා දන්නා කියන සැමතැන ගෙන ගියෙමි.
 එහෙත් ඇය කිසිදිනෙක අපට සුවපත් කර ගැනීමට නොහැකි විය. 
ඇය වරෙක මා හට බුදුබව පැතීය.
 මවකගේ පැතුම  පමණක් බුදුබව ලැබීමට ප්‍රමණවත් නොවූවද ජීවිතයේ මෙවන් වූ අර්භූධකාරී අවස්ථාවකට මා පත්වූ සෑම මොහොතකදීම මා හට මගේ අම්මාව හා ඇගෙ ඒ නියත විවරණය සිහිපත්වේ. 
ඒ  සෑම මොහොතකදීම මා තුල   ඇතිවන ආත්ම විශ්වාසය , ආත්ම ශක්තිය මෙතැකැයි කිව නොහැක. 
මා බොහෝ අවස්ථාවලදී බිරිඳට පවසන වැකියක් මහට මේ මොහොතේ මතකයට නැගේ. 
“බය වෙන්න එපා මම කිසි දවසක  මහ පාරක හව් හරණක් නැතිව මැරෙණ  කෙනෙක් නොවේ !
 මම  මැරෙණ්නේ බෙහෙත් උගුරක් බීලා  !!”

මේවා කිසිවෙකුට බැහැර කිරිමට  පුළුවන. 
එහෙත් ඔබට මවක් වෙත්නම් ඇය වෙනුවෙන් කලහැකි සැමදේම උපරිමයෙන් ඉටුකොට බලන්න. 
සිතට  ඇතිවන විශ්වාසය ශක්තිය අත්විඳින්න!
 එයට ආගමක් ජාතියක් බලපාන්නේ නැත ! 
අවශ්‍යවන්නේ ඔබ මවකගේ කුසින් මෙලොවට බිහිවූවාද - නැද්ද  යන්න පමනකි!  

 නෑ කිව්වම නෑ බං ! තව ඉතින් කන්න කියලා මෙලෝ දෙයක් නෑ ! කිව්වම අහංකො !


 මට බඩගිනියි! මේ මගේ බඩේ හැටි !! දැක්කාම මටම දුකයි!!!

තවත් විනාඩි 15 ක් 20 ක් යද්දී ගං ඉවුරෙන් මතුව ආවේ මිනිස් රූප දෙකකි. 
ඔවුන් හට අප කණ්ඩායම  විශ්මයකි ! 
මහියංගනයේ සිට ගඟක් දිගේ කිසිදු ලාභාපේක්ෂාවකින් තොරව හුදෙක් විනෝදය පතා ඉබාගාතේ පැමිණි අප ඔවුනට විශ්මයක් වීම විශ්මයක් නොවේ. 
එය අතිශය සාමන්‍ය තත්වයකි.

හිටපල්ලා පොඩ්ඩක්!

මෙවන් පිරිස් සමග කරණ ගනුදෙනු වලට තෙශාන්තගේ ඇත්තේ  උපන් හපන් කමකි. 
“මාමේ” , “නැන්දේ” කියා මිනිසුන්ට අමතන්නේ බොරුවට නොවේ. හෘදයාංගවමය! 
ඕනෑම ජාතික ව්‍යවසනයක කේන්ද්‍රයේ සිට වැඩේට බැස අතින් වියදම් කරගෙන සමාජ සේවයේ යෙදෙන්නේ කිසිදු ලාභප්‍රයෝජනයක් නොමැතිවය.
 ඒ වියදම් කරණ්නේ හෙට දවසේ ගෙදර කන්නට තියෙන රුපියල් දහස වුවද ඒ ගැන තැකීමක් නැත! 

 මේ නිසාම ගං ඉවුරෙන් මතුවූ දෙදෙන සමග ගනුදෙනු කිරීමට  තෙශාන්තටම ඉඩ හැර මා නිහඬ විය.
මහියංගනයේ සිට මෙම ස්ථානය දක්වා අප පැමිනි මගත් විඳි දුක්ඛ දෝමනස්සයනුත් අකුරක් නෑර ඔවුන් ඉදිරියේ ගිරවෙකු සේ දිග හැර දැක්වූ තෙශාන්ත ටික වේලාවකින් ඔවුන් සමග නික්මෙන්නට සූදානම් විය.

“මෛත්‍රී , වසී උඹලා දෙන්නත් වරෙං …! උඹලා තුන් දෙනා හිටපල්ලා ..!!”

කියමින් තෙශා අනිත් දෙදෙනා සමග එතැනින් අඩි පාරක් දිගේ නොපෙනී ගියේ එම ගමේ නම පමනක් අපවෙත ඉතිරි කරමින්‍ය.

 සමරේ - අපේ ගින්න ඔහුට දැනී !


 වට වැස්සෙන් අවදි වූ නුවරගල


රෑ පැල් රකිණ කුරහන් පැහෙනා හේනේ....!

සමරෙලාගෙ ඉසව්ව !


මෙම ගම නමින් “නුවර ගල” ය.  

මහවැළි යෝජනා ක්‍රමයෙන් ගම්බිම් අහිමි වූ නුවරකළාවියේ ගැමි ජනතාව නැවත පදිංචි කොට ඇත්තේ මෙම ගම්මානයේය. 
කාලය ගෙවීගියේ  හෝහපුටුවන් ඉතිරි කරමින්‍ය. 
 ගොඩට ඇදගත් කයාකයන් තුන මතට වී අප තිදෙන නිදන්නට තැත් කලෝය. නින්ද ; හෝහපුටුවන්ට බියේ පැත්ත පලාතක නො ආවේය!


  අනාගතයේ යම් දිනෙක මෙම මහවැළි ගවේශනය  කරණ යමෙකු වේ නම් ඔහුට හෝ ඇයට  මෙම ස්ථානය ඉතා වැදගත් තැනක් වනු ඇත.
 එසේනම් මෙම ස්ථානය හඳුනා ගැනීමට සළකුණක් අප ඉතිරි කල  යුතුවේ.  
 පසු දිනෙක මේ මග එන්නෙකුහට හදිසි අවශ්‍යතාවයකට වනාන්තරයෙන් එළියට යෑමට ඇති එකම හා පහසුම ස්ථානය සනිටුහන් කර  ගැනීමට එහිවූ කුඹුක් ගසක් මත N අක්ෂරය කෙටුවෙමු.

  හදවතිනම ස්වභාව ධර්මයට , එහි ගහ කොලට , සතා සීපාවට ආදරය කරණ අප එම ගසේ පොත්ත ඉවත් කොට  අකුරක් කෙටුවේ හුදෙක් මානව දයාව පෙරෙදැරි කරගෙන මය.
 එය “නුවරගල” යන්නෙහි මුල් අකුර විනා අප කණ්ඩායමේ සිටි කිසිවෙකුගේ නමෙහි වත් ගමෙහි වත් මුල් අකුරක් නොවූයේ ඒ නිසාමය. 
මහියංගනයේ සිට මනම්පිටිය දක්වා  ඇති කිලෝමීටර 72 දුරැති ගමනේ ; මිනිස් වාසස්ථානයකට ආසන්නතම ස්ථානය සොයා ගැනීමට පමණක් මෙම සංකේතය ප්‍රයෝජනයට ගනිත්වා යන්න අපගේ එකම ප්‍රාර්ථනයය.

තවත් පැයක දෙකක  කලයක් ගෙවීගියේ අපගේ සිතේ එතෙක් පැවති නිශ්චල භාවය සිඳී යමිනි. 
සැබවින්ම මොවුන්ට කුමක් නම්  සිදු වුනිද ? 
අපට  ඔවුන් ගිය අතක් වත් සොයා යෑමට අපහසුය. 
මන්ද එක් අයෙකු කැලයක් මැදින් ගමන් කිරීම අනතුරුදායක විය  හැක.
 ගමන සඳහා දෙදෙනෙකු  පිටව ගියහොත් ගං ඉවුරේ එක් අයෙකු තනිවේ. තිදෙනාම ගියහොත් අපගේ යාත්‍රා අනෙකුත් අවශේෂ දේ අනාරක්ෂිත තත්වයට පත්වේ. මේ තර්කය තුල අප තිදෙනාට ඔවුන් එනතුරු බලා සිටිනවා හැරෙන්නට වෙන කලයුතු දෙයක් නොමැතිවිය!

    තවත් විනාඩි ගනනක් ගතවෙද්දී කැලෑ බූටෑව අතරින් මිනිස් හඬක් ඇසුනි. 
තවත් ස්වල්ප වේලාවකින් තෙශාන්ත කැලෑව අතරින් මතුවිය. 
එකා පසුපස එකා අපගේ කණ්ඩායමේ ඉතිරි ගමන් සගයන් දෙදෙනාද ගැමියන් දෙදෙනාද පැමිනුනි.
ඔවුන් උනු උනුවේ විසල් බත් මුල්  හයක්ද රැගෙන පැමින තිබුනි! 
මෙම  බත් මාළු ඉදී ඇත්තේ  මෙහි පැමිනි මනුසත් බවින් පෝසත් එක් ගැමියෙකුගේ මුළුතැන් ගෙය තුලය.  ඔහු නමින් සමරෙය!

 නුවර - ගලේ බණ්ඩාර දෙවියන්ගේ දෙවොල !


 දාන ශාලාව හා මුරුතැන් ගෙය !


 කෑම කිව්වාම කට කනේ !


 බඩගින්නෙන් පිසෙන සහල් !


 දුම් කකා !


 පෑන්ට්‍රිය !


 ආගන්තුක සත්කාරයේ සැඟව ගිය සිනහව - සමරෙගෙ දූ සිඟිත්ත


 අපේ  දේ තොපේ පවසට- සිත් තුටින් !


 සමරෙගෙ නිර්ව්යාජ සිනහව කියවන්නට රූපය ලොකු කලා !


 ලන්ච් එක රෙඩි වෙන තුරු නැප් එකක් ! - වසික


අපේ අය ;
 මේ වන විට වඳ වෙමින් සිටින "මිනිස්සු" 
එක්ක ගත් අතිශය දුර්ලභ ඡායා රූපයක්!


 සමූපෙයි බැංකුවයි දෙකම හාමතේ !



 කඩමණ්ඩිය = කඩය


 රොගාතුරව පණ අදින බෙහෙත් හල


ඇඩ්‍රස් නොහදා ලමයාව ඇතුළු කල හැකි පාසලක් ! 
(ලඟම පාසල - හොඳම පාසල!)

නුවරගල යනු කුඩා  කඩ මණ්ඩියකි.

 කඩ මණ්ඩියක් කීවාට එහි ඇත්තේ එක් කඩයකි. 
සමූපාකාරයක් ,පුස්ථකාලයක් හා පාසැලක් එහි විය. 
මෙම අහාර වේල ඔවුන් අපවෙත ලබාදී තිබුනේ නොමිළේය. දැඩි පරිශ්ශ්‍රමයකින් පසුව තෙශාන්ත කිසියම් මුදලක් බලෙන්  “ඇඟේ ගසා” තිබුනි!

 ඒ වෙලාව වන විට දවල් බතට වෙලාව සැකසී තිබුනු බැවින් බිමම ඉඳගෙන  බත් මුල් ගිලදමන්නට විය.

දිවා අහර කිසෙන් පසුව අප එම උදාර මිනිසුන්හට සමු දී යලිදු යාත්‍රා කිරීම ඇරඹීමු. එතැන් සිට කුඩා ඇළි කිහිපයක් පසු කරමින් නිසල විලකට පිලිපන්නෙමු. නුවරගල සමරෙලා “මහ වල” කියන්නට ඇත්තේ  මෙතැනට විය යුතුය. මහවලෙහි ජලය ගලායාමක් නොවීය.එය එක තැන නැවතී ගත් ස්ව්භාවයක් පෙන්නුම් කල ස්ථානයකි.
 ගලා යාමක් නොවීම කරණ කොටගෙන එම විලෙන් ඉවත්වීමට වැඩිපුර කාලයක් හා ශ්‍රමයක් වැය කරණ්නට සිදුවිය .

මහවල ඔබ්බෙන් ඇල්ලක හෝ හෝව ඇසෙමින් විය. ඒත් ඇසට පෙනෙන ඇල්ලක් නොවීය.  ගඟේ ඉදිරියක්  නොපෙනේ. ගඟේ දිය පොලොව යටට ඇදී ගොස් ගඟ අවසන් වූ සේයාවකි.

එච් රයිඩර් හැගාර්ඩ්ගේ ඇලන් ක්වාටර්මෙන් පොතේ මහා විශල විලක ජලය එක් ස්ථනයකදී පොලොව අභ්‍යන්තරයට ඇදීගොස් භූගත ගඟක් සේ ගලායන අකාරය මාහට මතක් විය. එය ගලා යන්නේ මහ පොලොව අභ්‍යන්තරයේ වූ  අග්නි පුෂ්පයක් අසලිනි.  එය ලොමුඩැහැගන්වන අවස්ථාවකි.

මේ එවන් ස්ථානයක් වත්ද? 
ලංවත්ම අපට  මේ කුමක්දැයි හඳුනා ගත හැකිවිය. අප  ඉදිරියේ වූයේ මහා විසල් ගල් පර්වථයකි. ඒ අවට  ඒහා සමාන තවත් අවශේෂ ගල් පර්වථ කිහිපයකි! 

නුවරගල අපගේ  මිතුරන් පැවසූ “කාලිංග දූව” මෙය විය යුතුය.  මෙතෙක් දුර පැමිණි මහා ගඟාවෝ  මෙම ගල් පර්වථය හමුවේ ශාකා දෙකකට බෙදී යති. 
ගල් පර්වථයෙන්   ඔබ්බෙහි මහා රූස්ස වනන්තරයෙන් වැසුනු  කාලිංග දූවය.
 එම දූපත වටකොට ඇත්තේ පවුරක්වන් මහා ගල් වලිනි. ඒ වටා ගලන ගංඟාවය ! 
ඉන් මත්තට ඇත්තේද   මහා වනයය. 
ඉහල  නිල් වන් අහස  දිස්වේ. 
අප වටකොට ඇත්තේ උස්ව වැඩුනු මහ විසල් ගස් වලිනි.  ඉහල බැලූ විට අප ආඝාධයක් පතුලේ සිටිනා වැනිය. 

බෙදී යන ගඟේ දකුණු පස ජල ප්‍රවාහය හරස් කරමින් වඩාත් විසල් ගල් කුළු ඉහළට එසවී  එහි ගමනට  බාධා ඇති කොට තිබුනි. එම මාර්ගය බාධා රැසක් ඇති සේයාවක් දක්නට ලැබේ.  
එම අතු ගඟ ගල්කුළු අතර සැඟවී ගොස් ඇති සේයාවකි.

වම්පස මාර්ගය තරමක සැඩ පහරක් සහිත වුවද සාපේක්ෂව විශාල ගල් පෙනෙන්නට නොමැතිවිය. එසේම එම දිය දහර මතින් යම් ඈතක්  දර්ශණය විය. අප වම් පස තෝරා ගතිමු.

වේගවත් එහෙත් නොගැඹුරු ජල ධාරාව ගල්  අතරින් දඟර ගැසෙමින් ඉදිරියට ඇදී යයි. 
මොහොතින් මොහොත් දිශානතිය වෙනස්වේ.
 දිය සෙවෙල වන් දියෙහි හට ගන්නා ශාඛ වලින් ගල්වල මතුපිට පෘෂ්ඨය වැසීගොසිනි.
 මුළු ජල ධාරාවම යෝධ කුඹුක් අරණකින් වැසී ඇත. 
මේවනවිට වේලාව දවල් දෙකට  පමන වන්නට ඇත. එහෙත් මෙම අතු  ගඟට හිරු එළියක් පතිත නොවේ.  
 
මේවනවිට සැතපුම් ගනනාවක් කයාක පදවා මහත් පරිචයක් ලබා සිටි අප ; පිටකොටුවේ දෙවන හරස් වීදියේ ස්කූටියක් පැදයන බුහුටි තරුණයෙකු මෙන්  ගල් අතරින් රිංගමින් ; ඒවයේ නොගැටෙමින්  ; විටෙක යන්තමින් ඒවා ස්පර්ශ වෙමින් සුන්දර ලාලිත්‍යයෙන් යුතුව ඉතා වේගයෙන් අප අපේ යත්‍රා පැදයමින් විය.

මනස් කාන්ත මතකයක් වන කලිංග දූව පසු කිරීම  ජීවිතයේ කිසිදා අමතක නොවන ස්වප්නයක්ම වනු ඇත. 
මෙම දූව පසු කිරීමෙන් පසුව අසල වැලි තලාවකට ගොඩවදින අප ; අපගේ කණ්ඩායමේ සුන්දරවූ ඡායරූපමය  සිත්තම ධම්මික මහේන්ද්‍රගේ සෙල්ෆියක් ලෙස සනිටුහන් කොට ඇත.

දිනය මහළුවන්නට පටන්ගෙන ඇත. 
අපගේ යාත්‍රාව එනම් කණ්ඩයමේ වූ එකම ග්ලාස් ෆ්යිබර් කයකය ; මෙතෙක් දුර වැඩිම බරක් ගෙනා යාත්‍රාව අසාමන්‍ය  ලෙස  ජලය තුල ගිලී ගොස් ඇති වගක් මහට දැනෙමින් විය!

කිසිවෙකුට නොපවසා  මා හොඳින් නිරීක්ෂණය කල විට මාගේ පූර්ව නිගමනය නිවැරදි බව මාහට ප්‍රථ්‍යක්ෂවිය!

 අප ගේ කයාකය සිදුරුවී ජලයෙන් පිරී යනවා විය යුතුය!

 අපට මග ගෙවායන්නට තවත් කිලෝමීටර 25 – 30 ක් වත් අපට යාත්‍රා කිරීමට තිබිය යුතුය.

 මුලු ගමන් මග කිලෝමීටර 72 වනවානම් අපට එක දිනකදී ගමන් කල යුතුව ඇති දුර කිලෝ මීටර 36 ක් පමන වේ. 
පෙර දිනයේ අප ගමන්  ඇරඹුවේ උදෑසනින්ම  නොවේ.  එම වේල්කාව පෙරවරු 10.00 10.30 පමණ විය යුතුයැයි අනුමන කරමි. කිරි අම්ම ඇල්ලෙන් ලත් සුන්දර ප්‍රථිචාරයෙන් පසු නැවත ගසාගෙන ගිය ; දියබත්වූ අපගේ අවශේෂදෑ එකතු කරගැනීමටත් ඉන් පසුව වන සංචාරකයන් වෙතින් “පිනට යමක්” ලැබෙන තුරු  මිඩංගු කල කාලයත් ගෙන බැලූ විට අප පෙරදින කිලෝමීටර 36 ක් පැමිණ ඇතැයි සිතිය නොහැක.
 අද  දිනයේද මාගේ භූමිතෙල් සිද්ධියටත් ඉන් පසු අපගේ දිය කෙළියටත් ඉක්බිති නුවරගල රැඳී උන්  කාලයත් ගැන කල්පණා කලවිට  අපට ගෙවා යායුතු මග අපගේ උපකල්පනයට වඩා බොහෝ  සෙයින් වැඩි විය හැක!

මා ඉක්මනින් කණ්ඩායම දැනුවත් කලෙමි. 
හිරු අපසු ගමන් අරඹා සිටියත් ඔහුගෙ රෂ්මියේ අඩු පාඩුවක්  අප නොදැක්කෙමු. සිද්ධිය කන වැකෙත්ම ; අබේවර්ධන බාලසූරිය ශිල්පියාගේ “සැරසිළි ගොක්කොල  පෝරුව අයිනේ..” ගීත්යේ දැක්වෙන පරිදි
  “දෙබරෙට ගැසුවාසේ ….” කුඩා කණ්ඩයම බොහෝ සෙයින් කැළඹිලි සහගත තත්වයකට පත්විය.

 කණ්ඩායමේ වයසින් ජේෂ්ඨතමයා ලෙස ; මාගේ සිතතුල ඇති කලබලකාරී ස්වභාවය  යටපත් කරගෙන සිටින්නට උත්සුක වුවද මාගේ මුහුණින් ඔවුනට යථා ස්වරූපය තත්වාකරයෙන් තේරුම් ගැනීමට හැකි වන්නට ඇත.

බොහෝ මෙවන් අවස්ථාවලදී කලයුතු හොඳම දේ නිහඬවීම වුවද ඊටත් වඩා හොඳම දේ වන්නේ දොඩමලු වීමය!

මන්ද අප නිහඬ වීම තුල අප කණ්ඩායමට තනි තනිව තම තමන් කැමති විදියට අර්භූදය තම සිත තුලින් විශ්ලේෂනය කරගනිමින් තම තමන්ට ගෝචර ; තමතමන් කැමති අකරයේ සිතුවිලි මවා ගනිමින් තම තමන් රිසි ලෙස මන්දෝත්සායි වීමට , බලාපොරොත්තු සුන්කර ගැනීමට ඉඩ ප්‍රස්ථාව සැලසේ.

මෙතෙක් ගමනතුල කඳවුරු බඳින ලද අවස්ථාවේදී හැරෙන්නට අන් සියළුම අවස්ථාවලදී පැන නැගුනු ගැටළු සහගත තත්වයන් වලදී පිළිතුරු සැපයීම සිදුවූයේ මා වෙතිනි. 
මේ අවස්ථාවේදීද කණ්ඩායම පිළිතුරු බලා පොරොත්තු වන්නේ මා වෙතින්මය. ඔව් එයට සර්ථක පිළිතුරක්  විය.

Asbestos Gum Tape ! 

ඔව් එය තමා එයට කදිම විසඳුම වන්නේ. කයාකය පතුලේ සිදුවන ඕනෑම සිදුරක් පලුද්දක් පිපුරුමක් ඉරිතැලුමකට නොවරදින අත්දුටු බේත වන්නේ ඇස්බැස්ටෝස් ගම් ටේප්මය. 
එය කලකට පෙර ගමේ කඩ වල තිබුනු දෑ කැත්ත ලකුණ දරණ
 "නාහල්ලේ තුවාල තෙල" මෙන්ය!

එය මේ මොහොතේ කොහිද?

එය මහියංගනයේ සරත් මහත්තයාගේ නිවස ඉදිරිපිට සුවසේ පසුවන
 Toyota Land Cruiser BJ 60 යේ පසුපස කොටසේ වූ ප්ලාස්ටික් පෙට්ටියේ ඇත!

මතකයෙන්ම රැගෙන එන්නට තිබූ දේ විශ්වාසදායී ලෙස මතකයෙන් බැහැර කොට ඇත!   මෙයට වගකිවයුත්තෙක් සිටී.

මෙය ඔහුගේ අතපසුවීමක්‍! නොසැලකිල්ලය !! 
වගකීමෙන් තොරව කටයුතු කිරීමය !!! 
 ඔහු සියළුදේම දෙවරක් පරීක්ශාකලයුතු බව ; ලැයිස්තුව හා දෙවරක් විමසා බලා තහවුරු කරගත යුතු බව හොඳාකාරවම දන්නා කෙනෙකි. 
 එහෙත් ඒ සියල්ල ඔහු වෙතින් මග ඇරී ඇත.

මේ සියල්ලටම වගකිව යුත්තා අනෙකෙකු නොව කණ්ඩායමේ වයසින් ජේෂ්ඨතමයා වන මම මය!        
              

 හැකි ඉක්මනින් අපි ඉවුරකට ගොඩ බැස්සෙමු !              
                            

23. ගඟක් දිගේ ගිය ගමනක්

"ගඟක් දිගේ ගිය ගමනක්" කියන්නේ ගඟක් වගේම දිග කථාවක්. අමෙරිකනු ලේඛක හර්මන් මෙල්විල් ගේ ධවල තල්මසාගේ කථාන්දරය -"මෝබි ඩික්"...