Thursday, December 26, 2019

159. වර්ණවත් හීන දකින්නේ කවුරුන්ද? - Diving I

වර්ණවත් හීනයක !

මම ඉස්කෝලෙ යන කාලේ; මගේ පාසලේම මට පහල පන්තිවල හිටියා මිත්‍රයින් දෙදෙනෙක් එකෙක් දැනට අමෙරිකාවේ බෝස්ටන් නුවර වෙසෙන සුජීව ද සිල්වා. 
අනෙකා දැනට බොහෝ කලක සිට මා සමග කතා බස් නවතා ඇති; කලකට පෙර මා හට සිටි විශ්වාස දායකම මිත්‍රයා - ශානක රාජකරුණා.

ශානක කලකට පෙර සේවය කලේ ගුවන් හමුදාවේ.ඔහු ගුවන් හමුදාවෙන් විශ්‍රාම යන්නේ බල ඝන නායක වරයෙක් ලෙස.  
මා දන්නා පරිදි ඔහු දැන් මහාචාර්‍ය ෂානක රාජකරුණා සේවය කරණ්නේ එක්සත් ජාතීන් හෙවත් UN එකට.

ඔහුත් මමත් මේ රටේ බොහෝ පලාත් වල; පවුල් පිටින් සංචාරය කලේ බොහෝ කාලයකට පෙරයි.

මෙසේ ගිය අවස්ථාවක; හීනියට අඩියක් කාරිය ගහලා ඉන්න වෙලාවක; ඔහු මට කී එක් වැකියක් තවමත් මට අද වාගේ මතකයි.

"මචං මේ ලෝකෙ වර්ණවත් හීන දකින්නේ කවුද කියලා දන්නවාද? - ඩයිවර්ස් ලා!"

ශානක පාසැලේ පිහිණුම් කණ්ඩායමේ සාමාජිකයෙක්. එසේම වෝටර් පෝලෝ නායක. ජීවිතාරක්ශකයෙක් නවසීලන්ත ලෝකඩ පදක්කම දිනූ.

මේ නිසාම ශානකගේත් මගේත් පැවති මිත්‍රත්වයට මේ ජලාබුජ ජීවිතයත් එක සාධකයක් වූවා යැයි කීවොත් නිවැරදියි.

කිමිදීම ගැන මා පලමුව අත් පොත් තබන්නේ ඔහු ගෙන්. scuba   කියන එකෙ තේරුමම මට ශානක කියල දීලා ඇති දහ දොලොස් වතාවක්.

"scuba කියන්නේ (self-contained underwater breathing apparatus) වගන්තියේ වචන වල මුල් අකුරු ටික එකතු කරලා." 

ශානක; මම අහන අහන පාරට කියලා දුන්නා!

මේ scuba හෙවත් self-contained underwater breathing apparatus   කියන වැකිය සිංහලට නගලා තිබුනා "කිමිදුම් කලාවේ අත්පොත" කියන මහැඟි ග්‍රන්ථය මෙරට පොත් කඩවල රාක්ක වලට ගෙන ආ ශ්‍රී ලංකාවේ අග්‍රගන්‍ය කිමිදුම් ශිල්පියෙකු මෙන්ම උපදේශක වරයෙකු වන ලක්ෂ්මන් මුතුකුඩ මහතා. 

එනම්: ස්ව්යං අනතර්ගත දිය යටහුස්ම ගැනීමේ උපකරණය.

Diving හෙවත් කිමිදීම ප්‍රධාන වශයෙන් කොටස් දෙකකට වෙන් කල හැකි වේ. 

ඉන් එකක් වන්නේ ස්නෝකලින්ග් Snorkeling හෙවත් මාස්ක් Mask එකක් පමණක් පැළඳ නොගැඹුරු ජලයේ කරණ කිමිදීමය. 
අප බොහෝ විට පරෙවි දූපත අසල, හික්කඩුවේදී කරණ්නේ මෙම පංතියේ කිමිදීම්ය! 
මෙහිදී අප ආශ්වාසයට අවශ්‍ය වාතය රැගෙන යාමක් කරණු නොලැබේ.

ස්නෝකලින්ග් Snorkeling - සිහින මොන්ටිසෝරිය !

එහෙත් ගැඹුරු දියේ කරණ්නාවූ කිමිදිමේ කටයුතු වලදී දිය යටදී ආශ්වාස කිරීමට වාතය; ටැංකි තුල ගබඩා කරගෙන; රැගෙන යා යුතුය. Scuba Diving යනු මෙම දෙවන හෙවත් වඩාත් සංකීර්ණ පංතියේ කිමිදීම් ය.

Scuba Diving - මීන රාශියට පිවිසීම !

කාලය සමග ඔහු ඒ පිළිඹඳව කියවීම ඇරඹුවා. ඒ වගේම ඒ ගැන ඔහු හැකි හැම විටෙකම මාවත් දැනුවත් කලා.

"පැඩී (PADI) ලයිසන් එක ගන්න ඕනෙ මචං!" වරක් ඔහු හමු උනාම මට කිව්වා. 

ඒ අපි හික්කඩුවේ කොරල් බලන්න වීදුරු පතුලක් සහිත බෝට්ටුවක ගිය ගමනකදී වගෙයි මතක.

"පැඩී (PADI) ? ඒ මොකක්ද ඒ?"  මම ඇහුවාම ශානක කියලා දුන්නා.

කිමිදීම විනෝදාශයක් කරණ බොහෝ දෙනා පෞද්ගලිකව ලඟ තබා ගන්නේ; මුහුන ආවරණය වන මාස්ක් (Mask) එක හා දෙපා ආවරණය කරණ පාවහන් හෙවත් ෆින්ස් (Fins) පමණි.

ඔක්සිජන් සිලින්ඩර හා අනෙකුත් උපාංග බොහෝ විට කුලී පදනම මත සපයා ගැනිම කරණු ලබයි.
ඒක හරියට වෙනත් රටක සිට අප රටට පැමිණෙන විදේශික සංචාරකයෙකු යාල යන්නට ලෑන්ඩ් රෝවරයක් තිස්සමහරමෙන් කුලියට ගන්නවා වගෙයි. 

මනාළියන් (ගොනාට) ඇන්දවීමේදී දාන හෝ ජසයා හා ලෙන්චිනා පැළඳි මාස්ක් නොව; 
මේ දිය යට දී ජිවිතේ ගොඩදාන මාස්ක් එකක් !


කකුල් තුනක් ඇති එකෙකුගේ ෆින්ස් හෙවත් කිමිදුම් වරළ් කුට්ටම් එකහමාරක් නොව 
විකිණීම සඳහා සාප්පුවක තබා ඇති එකම පැත්තක වරළ් තුනක් !

රියැදුරු බලපත්‍රයක් නොමැති කෙනෙකු හට වාහනයක් පැදවීම සඳහා ලබා දීම තහනම් වනවා සේම කිමිදීම සඳහා නියමිත ප්‍රමිතියේ බලපත්‍රයක් නොමැති අයෙකු වෙත කිමිදුම් උපකරණ ලබා දීමද නිති විරෝධී කටයුත්තකි.
වෙනත් රටක සිට මෙරටට පැමිණෙන සංචාරකයෙකු දේශීය මගපෙන්වන්නෙකු ගේ සහය ලබා ගන්නවා සේම;  කිසියම් ප්‍රදේශයක කිමිදීමේදී; එම ප්‍රදේශය පිළිඹඳව හොඳින් දන්නා කිමිදුම් මෙහෙය වන්නකු හෙවත් Diving Master ගේ සහය ලබා ගනියි.

එවිට එම  Diving Master විසින් තමාගේ සේවා දායකයාගේ කිමිදිම පිළිඹඳව ඇති හැකියාව තක්සේරු කරණ ප්‍රධාන නිර්නායකය වන්නේ මෙම බලපත්‍රයය.

එම බලපත්‍රයට අනුව; එම බලපත්‍ර ධාරියා හට කිමිදිය හැකි හා පලපුරුද්ද ඇති ගැඹුර පිළිඹඳ අදහසක්ද Diving Master  හට ලැබේ.

සේවා දායකයාගේ ජීවිත අවධානම හා වගකීම සහමුලින්ම දරණ Diving Master විසින් තම  සේවාදායකයා බලාපොරොත්තු වන නො එසේනම් අපේක්ෂිත කිමිදීම සඳහා ඔහු හෝ ඇය සුදුසු දැයි තීරනය කරණ්නේ මෙම බලපත්‍රය මගිනි.

මෙයට අමතරව කිමිදුම් ලොග් පොත  Diving Log Book ගින්ද තම සේවා දායකයාගේ පලපුරුද්ද පිළිඹඳව පූර්ණ වැටහීමක් ලබා ගත හැක. 

ගුවන් නියමුවන් ගේ පියාසර පැය ගණන  Flying Hours එකතුවෙමින් ගණනය කරණවා සේම කිමිදෙන්නන්ගේ කිමිදුම් පැය ගනන Diving Hours එකතු වෙමින් ගණනය කෙරෙනු ලබයි.

මෙවන් කිමිදුම් බලපත්‍ර සපයන ජාත්යන්තර සංවිධාන කිහිපයක් ඇති අතර මෙරට වඩාත් ප්‍රචලිතව ඇත්තේ; ඇමරිකාවේ කැලිෆෝනියා ප්‍රාන්තයේ මූලස්ථානය පිහිටා ඇති  PADI - Professional Association of Diving Instructors  ආයතනයයි.




"මචං ඩයිවින් වල තියෙන ගෝල්ඩන් රූල් එකක් තමයි කිසි දාක තනියෙම ඩයිව් කරණ්න එපා කියන එක! විශ්වසවන්ත එකෙක්  තමයි බඩියට ගෙනියන්නේ. අපි දෙන්නාම පැඩි ගමු. එතකොට අපිට ශේප් එකේ ඩයිව් එකක් දාගෙන ඉන්න පුළුවන්!" මේ ශානකගේ ඒකාලේ තිබුණු අදහස්!

කාලය විසින් අප අතර තිබුණු හිතවත්කම් ඈත් කලත් ඔහු කාලෙකට පස්සෙ පැඩී (PADI) ලයිසන් ගත්තා කියලා මම දැක්කා එයාගෙ ප්‍රොෆයිල් එකෙන්. 

අපේ හිතවත් කම  එලෙසින්ම පැවතියානම් මම ඒ එක්කම ගනීවි.

ඒත් ඒක මගේ බකට් ලිස්ට් එකේ තිබුනු එකක්.

මම මේ බ්ලොග් එකේම ලියලා තියෙනවා ඒ අවුරුද්දේ කරණ්නට අරමුණු කරගෙන තිබුණු වැඩ වලින් එකක් ලෙස පැඩි ලයිසන් එක ගන්න බලාපොරොත්තුව හිටි බව. මට මතක විදියට "සයිකලයෙන් තල් අරණට" ලියන්න පටන් ගන්න කොට.




අප කළු ගඟ පටන් ගත්තේ 2019 මාර්තු16 දා. එතැන් පටන් තවත් බොහෝ කාලයක් ඇදුනා අවසන් අදියරය පටන් ගන්නට. මේ අතරේ තමයි මේ අවුරුද්දේ අප්‍රේල් මාසය යෙදුනේ.

හැම අවුරුද්දකම අප්‍රේල් 30 වන දින මාගේ ජීවිතයේ අමතක නොවනම දවස! ගිය අවුරුද්දේ මම හක්බෙල්ලාවක සිට හැටන් වලට සයිකලයෙන් ගියේ මේ දිනය සැමරීමට!
http://thattayagekolama.blogspot.com/2018/05/blog-post.html



අමතක නොවන හැටන් ගිය මතක !

2019 මර්තු 21 වෙනිදා රිවර් එක්ක්ස්පෙඩිශන් වට්ස් ඇප් එකතුවට  තෙශා එවා තිබුනා පණිවිඩයක්. "මම පැඩී ලසිසන් ගන්න යනවා කවුරු හරි උනන්දුද?" කියා! ඊට අමතරව ගාස්තුව  ගෙඩි රුපියල් 50,000 ක් ලෙසින්ද ස්ථානය මීගමුව කියාද වැඩිදුරටත් එහි සඳහන් වූවා.

"මේ අවුරුද්දෙ මම මාහට පිළිගන්වන උපන්දින  සමරුව පැඩී ලයිසන්ස් එක කර ගන්නට ඇත්නම් !": මම මගේ හදවතින් ඇසුවා. 
"සත්තකින්ම එය කෙතරම් හොඳ සමරුවක්ද?" හදවත කෙඳිරුවා.

මා එකෙන්ම; වට්ස් ඇප් එකතුවට උත්තර බැන්දා! " Yes "

අහලාම බලන්න බොරුද කියලා;  පොත් කියවන අයගෙ පුරුද්දක් තියෙනවා ඕනම දෙයක් ඉගෙන ගන්න, විමර්ශණය කරණ්න පටන් ගන්නකොට මුලින්ම කරණ දෙයක් තමයි ඒ විෂය ගැන ලියැවිලා තියෙන පුස්කොල පොත් වල සිට සියල්ල මේසය උඩ ගොඩ ගහ ගන්න එක. 

මොකද එතකොට එයාලට හිතෙන්න පටන් ගන්නවා "දැන් මම වැඩෙන් භාගයක් ඉවර කර ගත්තා!' කියන සහනදායී සිතුවිල්ල.

ඒත් වැඩේ පටන් ගත්තාම තමයි තේරෙණ්න ගන්නේ; "සර්පිනාවේ එක පැත්තක් ඒ කියන්නේ හුළං ගහන පැත්ත දවසකින් ඉගෙන ගෙන ඉවර කොලාට අනෙක් පැත්ත දවසෙන් ඉගෙන ගෙන් ඉවර කරණ්න බැරිවග!"


ඉතිං මේ කරණ්න යන වැඩේට අදාල මෘදු දත්ත තෙශාන්ත එකතුකරගන්න කොට මමත් එකතු කර ගත්තා  පොත් පත් කිහි පයක්. 
සමහරක් ඒ වෙන කොටත් මගේ පොත් එකතුවේ තිබුනු ඒවා. තව කිහිපයක් මරදානේ ගාමිණී හෝල් ලේඛණාගාර පරිශ්‍රයෙන් මිළදී ගත්තා.







මෙතැන් සිට දිග ඇරෙණ්නේ මමත් තෙශාන්තත් පැඩී (PADI) බලපත්‍රය ලබා ගැනීම සඳහා ගිය ගමනේ කථාවයි.


Tuesday, December 17, 2019

158. මෛත්‍රී - ආයුබෝවන් මිත්‍රයා . . . !

ඔව් මේ අලි පන්නපු මෛත්‍රී තමයි.

මෛත්‍රී මා හට මුන ගැහෙන්නේ අපි මහවැළි ගඟේ මහියංගනයේ සිට මනම්පිටියට යාත්‍රා කල අවස්ථාවේ අපිට එක් වූ අවසාන ගමන් සගයා ලෙස.

"මා කණ්ඩායම නැවත සැකසූයෙමි. 
ධම්මික පැමිනිය හොත්; පසිඳු-ධම්මික , වසික - මම , තෙශාන්ත -  ?

ඔව් තව එක් අයෙකුගේ සහභාගීත්වය අනිවාර්‍යයෙන්ම  අවශ්‍ය වේ. මන්ද මේ  ගමන සඳහා   භාවිතා කලයුතු වන්නේ Two Man Kayak මය. එය හැසිරවීමේදී පොඩි ලමයෙකු වාගේ  කීකරුය ! 


මේ නොදන්නා ගමන් මගේ තිබිය හැකි  Rapid හෙවත් ඇළි වලට වඩාත්  සාර්ථකව මුහුන දිය හැක්කේ Two Man වලටය. වැඩි බරක් ගෙන යා හැක්කේද මේවාටමය . මේ නිසාම මේ ගමනට Two Man හෙවත් Tandem  විනා  One Man හෙවත්  Solo ගෙනයාම බුද්ධි ගෝචර නොවන්නේය. එසේම  One Man හෙවත්  Solo කයාකයක් පැදීමට සුවිශේෂි හැකියාවක් තිබිය යුත්වේ. එවන් හැකියාවක් ඇත්තෙකු ඉතිරිව ඇත්නම්  ඒ පසිඳු පමනකි! 


අවසානයේ තෙශාන්ත මාහට කථාකලේය. ඔහුගේ මිතුරෙකුවූ වන ජීවී දෙපාර්තමේන්තුවේ  මෛත්‍රී නමැති අයෙකු මේ ගමනේ ඉතිරි ගමන් සගයා ලෙස මහියංගනයේදී  අප හා එක්වන බව ඔහු සහතික විය.


මේ වන විට ඇළහැර ප්‍රදේශයේ අලි පැන්නීමේ ව්‍යාපෘථියකට සම්බන්ධව සිටිනා ඔහු අද රාත්‍රී බසයෙන් මහියංගනය බලා පිටත්වන බව වැඩි දුරටත් හේ පැවසීය."

-(https://thattayagekolama.blogspot.com/2017/10/54-11.html )-

මහවැළියේ යන්නට අප පිටත් වෙන්නේ රජරටට මහ වැසි වැටෙන්නට ඔන්න මෙන්න තියෙන කාලයක. අහස ගැබ්බරව වැසි වදන්නට සූදානම්ව සිටි මොහොතක අප ගමන යොදාගෙන තිබුනි. 
මුලින් අප සමග සිටි 9 දෙනෙකුගෙන් යුත් කණ්ඩයම කෙට්ටුවී කෙසඟවී කෙඬෑරිවී 5 දෙනෙකු දක්වා පසු බැස තිබුනි. 
එවන් මොහොතක අප "නැතිවූ" සගයා සොයමින්; හාත්පස  ඉව අල්ල අල්ලා සිටි මොහොතක මෛත්‍රී පිළිබඳ ආරංචිය ගෙනාවේත් තෙශාන්තයමය!

"අප දැන් මහියංගනය නගර සීමාවේ සිට නිපෝන් පාලම සොයා යන්නට පිටත් වූ අතර;   තෙශාන්ත දිගින් දිගටම ඔහුගේ මිතුරා මෛත්‍රී ඇමතීමට උත්සාහ ගනිමින් විය. 

මේ තෙශාන්ත පවසන 
මෛත්‍රී  අනුකම්පා විරහිත අපව අතර මං කලාවත්ද? මෛත්‍රී  නොපැමිනියහොත් අප අතරින් කවුරුහෝ එක්  අයෙකු එක්  කයාකයක් සමග මහියංගනයේ නවතින්නට සිදුවනු ඇත. මන්ද Two Man  කයාකයක්  තනිව ලොකු දුරක් පැදීම බොහෝ අසීරු කටයුත්තකි. එය වඩාත් අසීරු වන්නේ එය මතුපිට තවත් අමතර බරක් පැටවූ පසුය.


 අවසානයේ නිපෝන් පාලම අසලදීම  තෙශාන්තට තම උත්සාහය සාර්තක කර ගැනීමට හැකි විය. ඔහු පෙරදින සිට නිදි වර්ජිතව ඇලහැර සිට මහියංගනයට පැමින ඇත.


මහියංගනයේ සිට නිපෝන් පාලම පසුකොට ගොස් අපසු හරවා ගෙන පැමිනෙද්දී කාල වර්ණ, ප්‍රියමනාප, ශක්තිමත් දේහයකට හිමිකම් කියූ තරුණයෙකු අපට හමුවිය. ඒ අන් කිසිවෙකුත් නොව මෛත්‍රීය. 

-http://thattayagekolama.blogspot.com/2017/10/12.html )-

හමුවී කෙටි වේලාවකින්ම ඔහු අප සමග ඇති කර ගත්තේ කලක සිට ගෙන ආ මිතුරු බවක සේයාවක්. ඔහු පැද්දේ වසික එක්ක. වසික කියන්නේ මගේ සුජාත පුත්‍රයා. ඔවුන් දෙදෙනාම ගමනට එක් වූයේ ආධුනිකයින් ලෙස! එහෙත් ඔවුන් ඉතා ඉක්මණින්ම කයාකය හසුරුවා ගැනීමට ඉගෙන ගත්තා. ගමන තුල ඉතිරිව ඇති මිහිරි මතක අතර මෛත්‍රී වටා ගෙතුනු කථා බොහොමයක් තවමත් අප අතර.

"බොහෝ විට වසික -මෛත්‍රී  යුගලය රැගත් කයාකය ඉදිරියෙන්ම ගමන් ගති. අප එය හැඳින්වූයේ අධිශක්ති කයාකය ලෙසයි. හොඳින් වැඩුනු දේහයකට හිමිකම් කියූ මෛත්‍රී ශක්තිමත් තරුණයෙකු විය.ඔහුගේ දෑතේ හෙවත් බාහු යුග්මයේ   මස්පිඩු හොඳින් වැඩී තිබුනි.

වන ජීවී දෙපාරතමේන්තුවේ සේවය කරණ ඔහු එයට අමතරව පුහුණු ජීවිතාරක්ෂකයෙකි! නවසීලන්ත ජීවිතාරක්ෂක සංගමයෙන් තඹ පදක්කම් ලද්දෙකි. ( Bronze Medalist)! එසේම හොඳ පිහිනන්නෙකි. වසිකද ඇඟ පුරා ගාය ඇති නව යොවුන් තරුණයෙක්‍ ය.

මේ නිසා වසික මෛත්‍රී ද්විත්වය රැගත්  කයාකය ගඟේ හරහටද දිගටද උඩහටද පහලටද සෑම දිශාවකටම ගමන් කරණු බොහෝවිට දක්නට ලැබුනි. ශක්තිය අවශ්‍යය; ඒ අවශ්‍ය වේලාවට අවශ්‍ය පරදිය!  ඔවුන් මෙසේ ගඟේ හතර මුල්ල පැන්නේ අප බොහෝ සීරුවෙන් මෙන්ම අසීරුවෙන් ගඟ පහලට සෙමෙන් සෙමෙන් රූටමින් සිටිනා විටදීය !"
-( http://thattayagekolama.blogspot.com/2017/11/14.html )-

මහ කැලේ අප රාත්‍රිය ගත කරද්දී අපගේ ජීවිත ආරක්ෂාවට ගිනි මැලය පරදා ඉදිරියේ සිටියේ මෛත්‍රීය.  ඔහු අපගේ කාන්සිය මැකී යන්නට තම කට හඬ අවදි කලේය.
තෙශාන්ත පවසන ලෙසට පලමු විවාහය කෙළවර වී ඇත්තේ "හුලවාළි" චිත්‍රපටයේ කථාවට සමපාත වෙමිනි. ඒ වන විටත් විරහව ඔහුගේ සිතේ කොතැන හෝ තිබෙන්නට ඇත!


"ටික වේලාවකින් තෙශාන්ත විසින් සම්පාදනය කොට මෛත්‍රී විසින් ඉදිරිපත් කරණ්නට යෙදුනු “අසන්නන්ගේ   ඉල්ලීම්”  වැඩසටහණකට සවන් දීමේ අවස්ථාව ලැබුණි. 
මාගේ මතකයේ හැටියට  ඔහු පලමුවෙන් ම ගායනා කලේ  විශාරද  ටී ෂෙල්ටන් පෙරේරා ගේ ගීතයකි.

“මී පැනි දී රිදී ගන්න   ගං පොජ්ජට මං ගච්චා …….” නම් රසාලිප්ත  ගීතයය. 

ඒ වන විට ප්‍රථම ප්‍රේමය විසින් මෛත්‍රීගේ හදවත දරුණු ලෙස බරුගසා සිටි අවධියයි! ඒ දුක් බර හඬ නැගුනේ ඔහුගේ ස්වරාළයෙන් නොව හදවතින් විය යුතුය!

මේ ඔහුගේ ආත්ම කථනයද ?"

“මී පැනි දී………..” ගීයෙන් පසු තවත් එම ශිල්පියා ගේම ගීත කිහිපයක් මෛත්‍රී  ගායනා කලේය.   

ෂෙල්ටන් පෙරේරා ගායකයානන් ගේ නාසික හඬට  තරමක දුරින් නෑකම් කී හඬකට හිමිකම් කී මෛත්‍රීගේ ගී රාවය ; ඒ වනවිට බොහෝසෙයින් විඩාබරව සිටි අපට සුන්දර මිහිරියාවක් ගෙන දෙන්නට සමත් විය.

මයිත්‍රී එක් ගීතයක් ගයා අවසන්  වත්ම තෙශාන්ත ; “අනේ මයිත්‍රියෝ තව එකක් කියහංකෝ…….!” යයි පවසමින් කල ඉල්ලීම පසෙක නොහෙලා මෛත්‍රී ගීත දහයක් පමන ගැයුවේය.

අප එකෙක් අය කැමති ගායක ගායිකාවන් කවුරුන් වුවද ;  එම මොහොතෙ අප සියල්ල ඒකාග්‍රව ඒකාත්මිකව එම හඬ රස විඳීය. 

ඒ ; ඒවනවිට   අප කැමතිම හඬ වූයේ ටී ෂෙල්ටන් පෙරේරා ගේ හඬ මුසුවූ මයිත්‍රීගේ දුකබර හඬට වූ බැවින්‍ ය."
-( http://thattayagekolama.blogspot.com/2017/12/16.html )-


මෙවර කළු ගඟේ යන්නටත් මා ඔහුට අමතන ලෙස තෙශාට කීවෙමි.

"අප සමග මහවැළි තරණයට ගිය අනෙක් තිදෙනා වන්නේ වසිකත්, මෛත්‍රීත්, ධම්මිකත්ය. වසික මේ වන විට කැන්ගරු දේශයේය.
ඊළඟට ලැයිස්තුවේ ඉන්නේ මෛත්‍රී හා ධම්මික ය.  
දෙදෙනාගෙන්; අවස්ථාවට පළමුව හිමිකාරීත්වය කීවේ මෛත්‍රීය. ඔහුගේ ජිව දත්ත මා මෙහි නැවත සඳහන් නොකරණ්නේ  ඒ සියල්ල මා ගඟක් දිගේ ලියා තැබූ බැවින්ය.

"අද හවසට ඌට කතා කරලා උදේම උඹට කියඤ්ඤං !" කියා කීවාට තෙශාන්ත කියපු දෙයක් නැත.

මම දෙවන වර තෙශාන්තව අමතන විටත් ඔහුට මෛත්‍රීව සම්බන්ධ කර ගැනීමට නොහැකිවී තිබුනි.

මන්ද මහ කැළයේ ගස් බෙනවල, රූස්ස ගස් මුදුන් වල, ගල් ගෙවල් තුල කටු ලැහැබ් තුලින් මී පැණි පොජ්ජක් මන්දො කර ගත්තාට සිග්නල් පොජ්ජක් පටෑරගෙන කෝල් පොජ්ජක් මන්දො කරාන්නට හැකියාවක් නොමැති නිසාය.

"දිවයිනම ආවරණය වන පරිද්දෙන් . . .  " බයිලා  මහ කැළයට ඒවා වලංගු නොමැත.

බඩ රස්සාවට අලි පන්නන මෛත්‍රී ඉන්නා රූස්ස කැළයට සිග්නල් සිදාදියෙ හූරන් රැගෙන යා  යුතුය.

"මචං ඌට එන්න වෙන්නේ නැතිලු . . . !" මේ 11 වෙනිදා හවස් යාමයේය!"
-( http://thattayagekolama.blogspot.com/2019/04/131-2.html )-



15/12/2019 කියන්නේ මෑත කාලයේ බොහෝ සෙයින් කලබලකාරී දිනයක් උනේ වැඩපලේ මිත්‍රයෙකුගේ පියාගේ අවමංගල්ලය වෙනුවෙන් මස්කෙළියේ නොටිංහෑම් වත්තට යන්නට සිදු වීම හේතු කොට ගෙන! මමත් රුෂානුත් අගනුවරින් පිටත් උනේ හරියටම දහවල් 12.00 ට!

හරියටම 1.30 ට දූරකථනය නාද විය.

තෙශාන්ත! අමතමින්.

"තෙශා! කියහං මචං මම මලගෙදරක යනවා මස්කෙළියේ!"

" සෑඩ් නිව්ස් එකක් මචං! අපේ මෛත්‍රියාට අලියෙක් ගහලා! එතනමලු!  බොඩි එක අරණ් තියෙන්නේත් මාර ගේමක් දීලාලු!"


එතනින් එහාට මම මොනවා කිව්වාදැයි මම නොදනිමි. ඉන් එහාට මා ඒ පිළිබඳව කිසිදු දෙයක් ආරංචි නොකලෙමි. මන්ද ඒ කිසිදු දෙයකින් ඒ සුන්දර මිනිසා නැවත අපට දකින්නට නොහැකි වන නිසාය. මා මේවන තෙක් මාගේ පුත්‍රයාට නොකීවෙමි. ඔහු එතරම්ම මෛත්‍රීට ආදරය කල බව මා හොඳාකාරවම දන්නා නිසාය.

මහවැලියේ එක් මොහොතක වසික හා මෛත්‍රී පැදවූ කයාකය සැඩපහරට හසුවී; දියට බරවූ විසල් ගසක් යටින් ගමන් කරද්දී වසික හට සිදු වන්නට ගිය මාරන්තික අනතුරකින් ගලවා ගත්තේ මෛත්‍රීගේ වේගවත් මෙන්ම ශක්ති සම්පන්න වූ ප්‍රථිචාරය කරණ  කොට ගෙනය!


මෛත්‍රී පිළිබඳව කතා කරන සෑම අවස්ථාවකදීම වසික එය මහත්වූ ගෞරවයකින් යුතුව මතක් කරණු මා බොහෝ වර අසා ඇත!

අලින්ට විනය කටින  ගිහියන් පැවිද්දන් මෙතරම්  සිටින රටක; සැබැවිම "ගජ මිතුරන්" වූ කණ්ඩායමක මෛත්‍රීවම මරා දැමුවේ ඇයිද කියා මාහට සිතා අගන්නට නොහැක!

උඹේ මල ගෙදරට ඇවිත් උඹේ කනට ලං වෙලා කියන්නට දෙයක් ඇත.


"උඹ ඇත්තටම හොඳ මිනිහෙක්!"

කාකි හැට් තොප්පියක් ඇඳ සිටින්නේ මමය! 
මාගේ දකුණු පසින්; කොල පැහැති කැප් තොප්පියකින් සැරසී සිටින්නේ පසිඳුය.  
 මාගේ වම් පසින් සිටින; මාගේ සුජාත පුතු  වසිකය. 
වසික අත තබාගෙන සිටින්නේ අපගේ ආදරණීය මිත්‍රයා - මෛත්‍රී ගේ දෙවුර මතය.
 උපැස් යුවලකින් සැරසී මෛත්‍රීට අසල සිටින්නේ තෙශාන්තය.
 පිංතූරයේ ඉහළ කෙලවරේ සෙල්ෆිය මෙහෙයවූ මහේන්ද්‍ර !


සිය පතක් රැඳුනද කුසුමක
සිත හදා ගන්නේ කෙලෙසද

එක් පතක් වියැකෙද්දී . . . ?


ඔව් බලමු ලබන ආත්මෙදිවත් මෙවන් අකල් මරණයක් අත් නොලබන්නට!



Monday, December 9, 2019

157. කළු ගඟදිගේ . . . . . . 16

අවසානය
 ජීවමාන පාලමක්  - තුරු වදුලෙන් එබී බලා . . . !

සුදා සහ තෙශා විසින් ගෙන එන ලද බත් ගෙඩි හතර පාර අයිනේ ලෙහාගෙන කෑ අපි ඉක්මණින් දියත් වුනෙමු. 

ගඟ අයිනේ ගිනි අවුවේ පැසෙමින් තිබුණු කයාක කොත්තු තැටි සේ ගිනියම් වී තිබුනි. අප සතු සියලු රෙදි පෙරෙදි ගල් මත එලා වේලා ගත් පසු සියල්ල පිළිවෙලට අඩුක් කර ගැනීමෙන් ඉක්බිතිව කෑමට පසු පලමු හබල් පහර ගැසුවෙමු. 

එතැන් සිට ගඟේ තිබුනේ ඒකාකාර රටාවකි. සාමාන්‍යයෙන් ගඟක් පළලින් අඩුවූ විට එහි ගලා යාම වේගවත්ය. එසේම එහි යාත්‍රා කරණ කෙනෙකුට දැනෙන සුළුය. එහෙත් අතිශය පළලකින් යුත් ගඟාවක්; ගඟාවකට වඩා කිට්ටු වන්නේ විලකටය! එවන් ගඟක යාත්‍රා කිරීම අතිශයින්ම මනස වෙහෙස ගන්වන සුළුය. එය තනි යායට දිගට පෙනෙන විට තත්වය වඩාත් බරපතලය! 

ඈත පෙනෙන ඉමක් වෙත ලං වන්නට පැයකට ආසන්න කාලයක් හබල් ගැසීමට සිදුවීම සමාන කල හැක්කේ; ඉමක් කොනක් නොපෙනෙන කාන්තාරයක ඇවිදීමකටය! ගල්පාතින් පසු ගඟ මේ සියළු කාරණා වලට නිදසුන් සපයමින්ය! 

 මෙසේ පැය දෙකක පමණ කාලයක් ගෙවමින් හබල් ගැසූ පසු අප ඉවුරක නිවෙසක් පෙනෙන තැනකට සේන්දු උනෙමු. එම නිවසේ ගෘහපති - අයියා අප සමග මදක් දොඩමළු විය! 
පසුව අපගේඉතිරි ගමනට අවශ්‍ය අවශේෂ කලමණා මොනවාදෝ ; අසල කඩේකින් ගෙනැවිත් දෙන්නට ඔහු කාරුනික විය. මතක ඇති තැනකට ගඟේ ඉවුර අසල යම් පමනකට හෝ බිම පය තබන්නට හැකි ස්ථානයක් වුනි නම් ඒ මෙම ස්ථානයේ පමණි. 

 ගෙදර අයියාව කඩේ යවන්නට මොහොතකට පෙර . . !

එම ස්ථානයෙන් මදක් එබී බැලූ විට දක්නට ලැබෙන්නේ මෙම පෝස්ටුවේ "පෙරවදන" ලෙස දක්වා තිබෙන දසුනය!
 ඒ මෙතෙක් අප පසුකල ගමන් මග තුල දක්නට ලැබුණු විශාලතම පාලම් රාජයාය! දක්ෂිණ ලංකා අධිවේගී මාරගය සඳහා  කලු ගඟ මතින් ඉඳිකොට ඇති මෙම පාලම; ගඟ මැද දරා සිටින්නේ විසල් කනු දෙකක් මත පමණි. 

එම පාලම දකිත්ම සිතට ඇතිවන්නේ ඩයිනෝසරයෙකු දකින විට ඇතිවිය හැකියැයි උපකල්පණය කල හැකි ආකාරයේ කිසියම් බිය උපදවන සුළු හැඟීමකි! ඒ මන්දැයි අද ද  සිතා ගත නොහැකි වුවද එම පාලම යටින් ගමන් ගනිත්දී; කුඩා කල අලියාගේ බඩ යටින් රිංගා යාමේදී ඇතිවූ හැඟීමට සමාන හැඟීමක් සිතට කාන්දුවිය.  


 හිතා ගන්නකෝ අපි නිකං පොල් ලෙලි . . !

එතැන් සිට ඒකාකාරී ගඟ දෙපස මිනිස් පුළුටක් වුනි නම් ඒ අතිශයින්ම දුර්ලභ ලෙසය. 
ගඟේ ඉවුර අසල පවා අධික ගැඹුරකින් යුක්ත වීම නිසා තම එදිනෙදා කටයුතු සඳහා ගඟ ප්‍රයෝජනවත් සම්පතක නොවන හෙයින් මිනිසුන් ගඟෙන් ඈත්ව ජීවත් වනවා විය හැකිය. 

එසේම කළු ගඟ සාපේක්ෂව දැඩි ලෙස ගං වතුර තර්ජනයන් ගෙන දෙන සාධකයක් වන බැවින් ගඟ හුදෙකලා කොට මිනිසුන් ඈත්ව ගොසින්ද? සිතා ගත නොහැක. රත්නපුර, හොරණ ආදී ප්‍රාදේශවලට විනා මේ පලාත්වලටද ගං වතුර තර්ජනයන් වෙත්ද?

දිනය මහළු වියට පා තබා ඇත. හිරු; ගඟ අවට ඇති ගස් වල දිගු සෙවනැළි ගං දිය මත අඳිමින්ය. පසුගිය කාල සීමාවතුල දිගින් දිගටම වට වැස්ස අදත් හවස් අතේ නොලැබේවි යැයි සිතා ගත නොහැක. අහසේ එකදු වළාකුලක් හෝ නැති තරම්ය. මෙතෙක් අව්වෙන් සිදුවූ ආපදා - අපල උපද්‍රව බොහෝ සෙයින් අවම වී ඇත. එහෙත් දහවලේ අත් පා පිළිස්සුණු තැන් තදින් දා යනු දැනෙයි. 

ගංඟාවේ ඉවුරු දියෙන් මතුවූ ගස් වලින් සරුසාර ලෙස වැසී ගොස්ය. අපට කුමණ හේතුවකට හෝ ගමන නවතා ඉවුරකට ගොඩ බැසීමකට කෙලෙසකින් හෝ නොහැකි තරමට එකකට එකක් ලංව ගස් හටගෙනය! ගඟේ ඉවුරු අසල ගස් වැල් වල සෙවනැළි පතිතවී අඳුරු ස්වභාවයක් ගෙන තිබුනි. මේ නිසාම ඉවුරට ඈතින් අප යාත්‍රා කලෙමු.


 සොවින් පිරි මගේ හදවත - තුළින් මතු වෙවී පිටවන
හැඟුම් කැටි ගැසී ගෙනදේ - සිතට වේදනා . . . 
සුවෙන් මා එදා සැතපුණු - යහන් මත මහත් විෂකටු 
තිබෙන්නාවු ලෙසට දැනේ - ගතට වේදනා . . .//

(රිච්මන්ඩ් කාසල් පියස)

තවත් දුරක් පැදගෙන ආවිට; මා ගමන පිටත්වූ මොහොතේ පටන් දකින්නට බලා සිටි මන්දීරයක පියස්ස ඈතින් දිස් විය. 

එය අනෙකක් නොව "රිච්මන්ඩ් කාසල්" මන්දීරයයි. 

මෙය නැරඹීමට පැමිනෙනවානම් කළුතර සිට ගඟබඩ පාරේ පැමින පලාතොට හංදියෙන් කෙත්හේන පාරේ පැමිණිය යුතු වෙනවා. 

අක්කර 42 ක භූමි භාගයක් පුරා විහුදුනු; කළු ගඟට යාබද ඉඩමක උස් කඳු ගැටයක් මත මෙම විසල් මංදීරය පිහිටා ඇත. 1910 දී ඉඳි වන මෙම මන්දීරය කළුතර දිසාව භාරවවූ මහ මුදලි දොන් ආතර්ද සිල්වා විජේසිංහ සිරිවර්ධන පඬිකාර මුදලිතුමාගේ නිවෙසයි.

මෙතුමා විවාහ වන්නේ  දිසා කළුතර දිසා විනිසුරුගේ දියණිය වන ක්ලැරිස් මෝඩි මැටිල්ඩා සූරියබණ්ඩාර  සමගයි.

එහෙත් දශක තිහක පමණ කාලයක් තිස්සේ විවාහ ජීවිත ගත කලවුනට දරුවන් නොසිටි අතර සූරිය බණ්ඩාර ළමාතැනී  මන්දීරයේම සේවකයෙකු සමග අනියම් සබඳතාවයක් ඇතිකරගත් බවක් ව්යවහාරයේ පවතී.

මේ සියල්ලෙන්ම සිත කලකිරුණු මුදලිතුමා මන්දීරයෙන් හා ළමාතැනීගෙන් වෙන්වී මහනුවර ක්වින්ස් හෝටලයේ; 1947 වසරේදී මියෙන තුරු ජීවත් වුනු බවක් සැලකේ.

ගූගල් වෙතින් - රිච්මන්ඩ් කාසල්

යාන්තම් වහලය පමනක් පෙනෙන රිච්මන්ඩ් කාසල් මන්දීරය ගඟ දිගේ ටික දුරක් පහලට යත්‍රා කිරීමේදී තරමක් පෙනෙන්නට ගනී. 
මීට කලකට පෙර "රැජින" පුවත් පතේ මෙම රිච්මන්ඩ් කාසල් ශෝකාන්තය කොටස් වශයෙන් පලවූවා සේ මට මතකය. 
පෙලින් පෙලට සියලුම කොටස් කියවීමට නොහැකිවුවද එම කාථාවේ ඇති දැඩි ශෝකාකූල බව මේ මොහොතේ මාගේ මතකයට ආවේය. 

මලහිරු ගඟ දිගේ මලාණික එළියක් විහිදුවමින් මුහුදේ ගිලෙන්නට ආසන්නවය. හාත්පසින්ම දිගුවූ සෙවනැලි වලින් ගඟේ බොහෝ කොටසක් ආවරණය කරගෙනය. මුහුදු සුළඟින් ගඟාව රැළි නංවමින්ය. සිසිල් සුළඟක් ගතට සිසිළසක් ගෙන එමින්ය. මුළු ගංගාව පුරාවට හාත්පසම  පාලුවට ගොස්ය. අපේ යාත්‍රා දෙක හා ඈත අහසේ; නිවෙස් බලා පියාඹා යන සියොතුන් හැරුනුකොටගෙන  වෙනත් කිසිම ප්‍රාණියෙකු දක්නට නොහැක. මේ සියල්ල අතරිණ් මගේ මනසට රිච්මන්ඩ් කාසල් ශෝකාන්තය ගෙන ආවේ වචනයෙන් විස්තර කල නොහැකි දුකකි. ඔහු මේ ගඟ දෙස බලා මොන තරම් නම් සුසුම් හෙලන්නට ඇතිද? 


සිනෙක් - බය හිතවන ස්ථානය - කළුතර . . !

 ගඟේ එක් ඉවුරක; ඔව් දකුනු පස ඉවුරේ; රිච්මන්ඩ් කාසල් එක තිබුනේ වම් පස ඉවුරේ; අමුතුම ආකාරයේ බෝට්ටු වැඩපොලක් වැනි ස්ථානයක් ඇත. එය සිනෙක් ආයතනය සතු බව එහි ලියා ඇත. 

මා සිතන පරිදි එය සිනෙක් විදුහලෙන් උගෙන ගන්නා නැවියන් හට ප්‍රායෝගික පුහුණුව ලබා දෙන ස්ථානයක් විය! එය පසුව සොයා බලද්දී එය CINEC- Department of Safety & Survival Training -  Ernest Peter Komorowski Survival Centre - Kaluthara  බව තහවුරු විය!


දිනය මහළුව ගොස් - ඉර ඕෆ් වෙලා පොත  අස්සන් කරණ්න යන ගමන් . . . ! 


 ගඟට කර්ෆිව් . . . !

පාලුවට ගිය ගඟාවේ කුඩා නැමි වලින් එබී බලත්ම හිත් සොයන දසුනක් වේ. ඒ කළුතර දාගැබේ සුදො සුදු කොත් කැරැල්ලය. 

මෙවිට දැනට කැංගරු දේශයේ සිටින වසික දිනෙක ඇසූ ප්‍රශ්ණයක් මගේ මතකයට ඒ.

"හරි කියන්න බලන්න කළුතර බෝධියේ කොත ගාළුපාරේ පලවෙනියෙම්ම පෙනෙන්නේ කොහේදිද කියලා?" 

"බෝධි වලට කොහෙද බං කොත් ?"

"ඒක තමයි!" ඌ නෝන්ඩි හිනාවක් මට දායි!

ඌට මාව වටේ අරිණ්නට බැරිවිය. 
එහෙත් මේ ලියන මොහොතේදී පවා ලියැවෙන්නේ "කළුතර බෝධියේ කොත් කැරැල්ල" යනුවෙන් යොදමින්ය. (ඇත්තටම මේක මට පමණක් ආවේණික රෝගා බාධයක්ද?)

එක් නැම්මකින් ගඟාවට ප්‍රවිශ්ඨ වත්දීම අවට තරමක දවල් එළියකින් සිරිගත් බවක් පෙණින. ඒ මුහුදු ඉමට ආසන්න නිසාදැයි මට සිතේ.

ඒ සමගම අපගේ වම් පසින් ඈත නුබ සිසාරා ඉහල නැගුණු; ශතසහස්‍ර දනන් සිත් පොබකල මහඟු දසුන දෑස් මාණයේ විය. 

කළුතර දාගැබ !

අප ගමන පිටත් වෙත්දීම අරමුණු කලේ කළුතර දාගැබ දැකීමය. සත්තකින්ම මා හට "සාදු!" කියැවින!



වදන් තුළ ගොළුව යන හැඟීම . . . . ! 

මා පසුපස හැරී බලන විට පසිඳු හා තෙශා රැගත් කයාකයද අප අසලට පැමිණෙමින් විය. අප එකට එක් වී සෙල්ෆියකට මුහුණ දුන්නෙමු. 

අප ගමනාන්තයට පැමිණ ඇත.  රත්නපුර මහ සමන්දේවාලය අසලින් ගමන් ඇරඹූ අප දින තුනක් ඇවෑමෙන් කිලෝමීටර 70 ක පමන ගමන් මගක් ගෙවා දමමින් දිස්ත්‍රික්ක දෙකක් හරහා පලාත් දෙකක් යා කොට ඇත!


 ගං සෙල්ෆි . . !




පාලම යට - කළුතර







අප සෙමෙන් සෙමෙන් කළුතර පාලම අසලට ගාල් වුනෙමු. පරිස්සමින් හා කල්පණාවෙන් කයාක දෙක ගොඩට ගත් පසු; සුදාත්, පසිඳුත්, තෙශාත්, මාත් අපි එකිනෙකා වැළඳ ගත්තෙමු. 

"මචං එකෙක්ගෙ වත් අතක් පයක් යාන්තමින් වත්  හීරිලාවත් නෑ නේද?" මා බිඳුණු ස්වරයෙන් උස් හඬින් ඇසීය. එම  ආමන්ත්‍රණය වඩාත්; එසේම අනවශ්‍ය තරම් හැඟීම් බර එකක් වූවාද?

"හීරිලාවත් නෑ නෙ!? - සමන් දෙවියන්ට පිං සිද්ධ වේවා!" මා දෙ අත් ලය මත තබා ඉහල අහස දෙස බලාගෙනම පවසනු මට අද වාගේ මතකය.


"අපි ප්‍රවේසමෙන් කළුතරට ආවා!" 
ආදරණීයන් වෙත ආරංචිය මුදා හරිමින්ම ලොරි පොඩ්ඩා සොයා විෂ්වගේ ගෙදර දෙසට මා පිටත් වුනෙමි.

"දිව ගිලෙන පිපාසෙට නොමැත දිය ගඟක් තුල
සිරුර දැවෙමින් තිබුණි සිසිළ නැත      ගං දියට
ඉවුර මත පිපුණු එක් මලකි අන් ගසක්       මත
සිතින් මල නෙලා විත් පුදමි එය          කළුතරට "


උප ග්‍රන්ථය
මෙම චාරිකාව තුලදී අප බහුල වශයෙන් පක්ශීන් දුටුවෙමු. 
එම සතුන්ගේ නමාවලිය පහත දක්වා ඇත. 
මින් අති බහුතරය දුටුවේ රත්නපුරත් ඉහල නරගලත් අතරදීය. 
මාහට නම් මේ සියල්ලෝම උඩයන කුරුල්ලන් පමණි.
 මේ පිළිඹඳව යම් ගැටළුවක් වෙතොත් පසිඳු අමරසිංහ ගෙන් විමසන්න. 
මේ තියෙන්නේ උන්නැහැගෙම අත් අකුරු නිසා නෑ! බෑ කියන්නට ඉඩක් නොමැත! 
ස්තූතියි!





Monday, November 25, 2019

156. කළු ගඟදිගේ . . . . . . 15


ඔරිජිනල්ම ගංගාරාමය . . !

ඒ වන විට අප යුගලය සිටියේ ගංගාවේ වංගුවක් අභියසය. ඉදිරිය පෙනුනේ මීටර කිහිපයක් පමණි. 

අප සිටි තැනට ඉහලින්  චෛත්‍යයක් හෙවත් ස්තූපයක් පෙනුණි. අප චෛත්‍යය දෙස බලා ගෙනම ඉදිරියට යාත්‍රා කලෙමු. මෙතෙක් අපගේ දෙසවනට ඈතින් ඇසුණු හෝ හෝව හෙවත් හඬ ඉමහත් නුදුරේම ඇසුනි. 

"මොකක්ද ඒ . . . . . ?" කවුරු කාගෙන් ඇසුවාදැයි මතක නැත.

"ඇල්ලක් වත්ද . . . . . . ?"

කියා කට ගන්නට නොහැකි වුණි. වංගුව අවසානයේ  එකවරම දිස් වූයේ මෙතෙක් අත් නොවිඳි තරමේ ඇල්ලකි!

අප බොහෝවිට  ගමන් කරණ්නේ  ගංගාවේ මැදින් නොව තරමක් එක් පසෙකට වන්නටය. මෙයට ප්‍රධාන හේතුව වන්නේ  දැඩි හිරු රෂ්මිය පවතින වේලාවේදී ගංගාවේ ඉවුරු මත පිහිටි විසල් වෘක්ෂ ගං දිය මත සළකුණු කරණ සෙවනැල්ලට මුවාවී ගමන් කිරීමට තරමක නොව බොහෝ නැඹුරුවක් අප තුල ඇති බැවිණි. 

ගඟේ එක් ඉවුර ආසන්නයෙන් අප ගමන් ගන්නා විට; ඉදිරියේ එම පසට හැරෙණ නැම්මක් වුවහොත් ඉදිරිය පෙනෙන්නේ ඉතා අල්ප වශයෙනි. මෙහිදී සිදුවූයේ වම් ඉවුර ආසන්නයේ ගමන් කිරීම මෙන්ම වමට හැරුණු නැම්මක හෙවත් වංගුවක් පැවතීමය. 

මේකත් දිවිය ලොකේ ඉඳන් ගත්තු එකක් . . !

ගූගල් සිතියම් වලින් බාගත කෙරුණු ඉහත ගුවන් සිතුවමේ දැක්වෙන්නේද; ගූගල් අනුග්‍රහයෙන් ලබා ගත් පහත දැක්වෙන ඡායා රූපයේද දැක්වෙන්නේ  නියං කාලයකදී ගඟේ ජල මට්ටම බොහෝ සෙයින් පහත වැටුණු කාලයකදී  ගබඩා  කරගත් සටහන් දෙකකි.

එදින සාමාන්‍යය දිනයකටත්  වඩා ගඟේ ජල මට්ටම බොහෝ සෙයින්    ඉහල ගොස් තිබුණි. එනිසාම පහත දැක්වෙන රූපයේ දැක්වෙන සෙයින් අහිංසක ලෙස පවතින කුඩා ඇල්ල එදින යක්ෂා වේශ වී තිබුණි.

මේක ගූගල් එකෙන් බාගත්තු එකක්. හිතාගන්නවත් බෑ මේ එතනද කියා. 

රත්නපුර සිට ගෙවා ආ කිලෝමීටර 50 කට ආසන්න දුර තුල ගංඟාව මෙතරම් අකීකරු වූ ස්ථානයක් තිබුනා දැයි සැක සහිතය. එය මහත්සේ රළු වී ඇත. 

මෙවන් ඇල්ලක් ගැන අප අන්දෝ සංසාරයක් දැන නොසිටියෙමු. කැඳ මාමා හෝ වෙනයම් කෙනෙකු මේ පිළිබඳව  ආසාවට වත් අපට කියා නොතිබුණි.
සැමදා වාගේම අප අළුත් ගංඟාවක  චාරිකාවක යෙදීමට පෙර තෙශාන්ත අප සියල්ලන් හටම පෙර දෙතුන් වතාවක් ගඟ දිගේ ගමනේ යෙදේ - ඒ ගූගල් මැප්ස් අනුසාරයෙනි. කළු ගඟ දිගේ මේ අප කරමින් සිටින චාරිකාවට ප්‍රථමද ඔහු එම කටයුත්ත නොපිරිහෙලා ඉටු කොට ඒ පිළිබඳව මා දැනුවත් කලේය.

ඔහුගේ දත්ත වලට අනුව නාරගල ඇල්ලෙන් පසුව කළුතරට යන තෙක් හමුවන ඇල්ලක් නොමැත! කළු ගඟේ අවසන් ඇල්ල වන්නේ නාරගල ඇල්ලයි.

එය එසේ සිදු වූයේ කෙසේද?

චන්ද්‍රිකා තාක්ෂණය මගින් ලබා ගත් ගූගල් සිතියම නිරීක්ෂණය කිරීමේදී ගංඟාවක පවතින ඇල්ලක් සුදු පෙන නංවමින් ගලා යනු දක්නට ලැබේ. මෙමගින් එය ඇල්ලක් බව නිගමනය කල හැකි වන්නේය. එහෙත් මෙම ඇල්ලේ එනම් දේවමුල්ල ශ්‍රී ගංඟාරාමය අසල ඇල්ලේ චන්ද්‍රිකා ඡායා රූපය තුල එවන් පෙන නංවමින් ගලානා ස්වභාවයක් නොදිස් වේ. 

එහෙත් මුළු ගඟාවම කුඩා කපොල්ලක් අතුරිණ් ගලා බසිනා ආකාරය දුටු වනම එය ජලය විදින නැසින්නක් නො එසේනම් ජෙට් ඒකක් සේ මහත් වේගයෙන් ජලය පිටවන සොරොව්වක් බව තෙශාන්ත විසින් හඳුනාගත  යුතුව තිබුණි.කුමන හෙතුවක් නිසා හෝ එය එසේ නොවී තිබුනි. 

අපට හැරෙණ්නට  ඉඩක් නොමැත. අපගේ යාත්‍රා ජල කඳට නතුව වේගයෙන් ඇදී යන්නට විය. 

ඇල්ල පිහිටියේ ගඟේ නැම්මකය. 

එය පදින්නන්හට තවත් අසීරු අවස්ථාවකට මං පෙත් විවර කරයි. මන්ද ඇල්ලේදී ජලයේ ගමන් මාර්ගය වෙනස්  වනවා මෙන්ම නැම්මේදී නො එසේනම් වංගුවේදී වඩාත් වෙනස් ලෙස ජල ධාරාවේ  හැසිරීමයි. එසේම මෙම තත්වය නිසාම ඇල්ල තරණය සඳහා අපට අවශ්‍ය ස්ථානයක් තෝරාගැනීමට ඇති ඉඩකඩ මුළුමණින්ම පාහේ ඇහිරී යයි.

අප ඇල්ල අසලට එන විට ගඟාව අයිනේ වූ ගල් තලාව මත සුදු ඇඳුමින් සැරසුණු දහම් පාසැල් ශිෂ්‍යයන් හත් අට දෙනෙක්ද කුඩා සාමනේරයන වහන්සේලා දෙතුන් දෙනමක්ද වැඩ සිටියහ. 
දහම් පාසලේ විවේක කාලයේදී ගඟ අසලට පැමිණ විවේකයට විනෝදයක් එක්කර ගැනීමට පැමිණි පිරිසක් ලෙස මා ඔවුන් හඳුනා ගතිමි.
මෙම හාමුදුරුවරු මෙම පන්සලේම අය විය යුතුය. මේ ලමුන්ද මේ අවටම පිරිසක් වියයුතුය. ඔවුන් මේ ගඟ පිළිබඳව මනා වැටහීමක්, දැනීමක්, අවබෝධයක් තිබිය යුතුමය.
ඇල්ල තරණය කල හැකි මාර්ගයක් පිළිබඳව සිතා ගත නොහැක.

ඇල්ල වෙතට වේගයෙන් ඇදෙන කයාකයේ සිට මා හාමුදුරුවන් වහන්සේලා ඇමතීමි.

"හාමුදුරුවනේ කොතනින්ද යන්න පුළුවන්?"

" - - - - - - - - - - - - - - - - - - - - - - - - - - - "

" හාමුදුරුවනේ කොතනින්ද යන්න පුළුවන්?"

" - - - - - - - - - - - - - - - - - - - - - - - - - - - "

හාමුදුරුවන් වහන්සේලා ගෙන් කිසිදු ප්‍රතිචාරයක් ලැබුනේ නැත!

සිද්ධිය මෙසේ වෙද්දී තෙශාන්ත මුල්කිරිගල හා පසිඳු අමරසිංහ රැගත් කයාකය  ගඟේ  මැදින් ඇල්ලට අවතීර්ණ කොට හමාරය.

මමත් සුදාත් පැදවූ කයාකය ගඟේ වම් ඉවුරට කිට්ටුවෙන් ඇල්ල දෙසට ඇදී යමින්ය. එම ඇදී යන වේගය සමග ඉදිරියටම යනවා විනා වෙන කලයුතු දෙයක් හෝ ගත යුතු අන් මගක් හෝ  නොවිනි. 

අපගේ විමසීම නිසා හෝ වෙන යම් හේතුවක් නිසා හෝ; ගඟ දිගේ ඇල්ලට ගලා එන යාත්‍රා දෙක දෙස ඇසිපිය නොහෙලා බලා සිටිනවා හැර; එතැන් සිටි හාමුදුරුවන් වහන්සේලා හට හෝ කොලු ගැටවුන් හට කරණ්නට කියන්නට දෙයක් තිබුනු බවක් පෙනෙන්නට නොතිබුනි.

කියන්නට දෙයක් වුනි නම් "ඒ අර බලහං හතර දෙනෙක් මැරෙණ්න එනවා!' කියන එක පමණි.

ඇල්ලේ මැද භාගය දෙසින් අවතීර්ණවූ තෙශාලා වේගයෙන් ඇල්ල තුලට ඇදී ගියේය.

මා හට ඇල්ල පිළිබඳව කිසිදු අධ්‍යනයක යෙදෙන්නට අවස්ථාවක් නොවීය. ඇල්ලක් තරණයට පෙර එය කියවා ගත  යුතු.

බාධක පවතින ස්ථාන, ඒවා මග හැර ගමන් කල යුතු මාර්ගය, දිය වැලේ වේගය, පැදිය යුතු තැන හා නොපැදිය යුතු තැන, කයාකය පෙරලීමට හැකි ස්තානය හෝ කලාපය වැනි සියල්ලම නැතත් මින් අංග කිහිපයක් වත් ස්නා‍යු පද්ධතියට ඇතුළු කරගත යුතුවේ හෙවත් ස්කෑන් කරගත යුතු වේ!

එවිට ඇල්ලට පිළිපන් වහාම කයාකයේ හැසිරීම හොඳින් තේරුම් ගනිමින් තරණය කරගත හැකිවේ.

වංගුවකින් මතුව ආ විගස මුහුන දුන් ඇල්ල කියවනවා තබා හිතන්නටවත් කාලයක් අපට ඉතිරි නොකලේය.

මීට වසර 10කට පමන පෙර මා සතුව Nissan Patrol 160 කොටයක් හෙවත් Short Wheel Base රථයක් තිබුනි. එහි නොම්මරය වූයේ 32 ශ්‍රී 0865 ය. මෙය මාවෙත විකුණූ; එවකට පොලිස් ගරාජයේ සේවය කල පොලිස් පරීක්ෂක ගාමිණී විජේසුන්දර මහතා පැවසූ පරිදි එය අක්මීමන පොලීසියට අනුයුක්තව පැවති රථයය. 

දිනක් මා කඩවතින් හවස 5.13 ට පිටත් වී පොළොන්නරුව බලා ඉගිල්ලුනෙමි. පවුලෙ  ඉතිරි සාමාජිකයින් තිදෙනා සමග පියාඹා ගිය මා; හබරණ පසුකොට වනාන්තරය මැද; මාර්ගයේ දකුණු පස  පිහිටා ඇති පුල්ලෙයාර් දේවාලය අසල නවතන තෙක් කිසිදු තැනෙක නැවත්වූයේ නැත.

දේවාලයට සිරිත් පරිදි පඬුරක් දමා නැවත SD 33 - ඝන සෙන්ටි මීටර 3300 ක ධාරිතාවකින් යුත් ඩීසල් එන්ජිමේ  විනාඩියකට වට ගාන උපරිමට නංවමින් පිටත් වුනෙමි. 

එතැන් සිට ඇති කුඩා අනුක්‍රමණය ඔස්සේ එන්න එන්නම වේගවත් වූ රථය දෙවැනි ගියරයටද මා යොමු කලෙමි. 
වම්පස ඉදිරියේ තරමක විසල් ගසක් හා දකුණට වංගුවකි. කන්ද මුදුනට එනවිට රථයේ ගියර පෙට්ටියේ දැති රෝද සැකසුම වඩාත් වේගවත් තෙවැනි ගියර වේග අනුපාතයට සකස් කරමින්ම මා; මාගේ පවුලේ සාමාජිකයින් වෙත පැවසුවේ "කොහොමද වංගුව ගන්න කොට පාර මැද්දෙ අලියෙක්  වත් හිටියෝතින් . . .!?" කියාය. කියා කට ගන්නට බැරි විය.

පිළිගන්න ! 

හරියටම මහ පාර මැද විසල් තනි අලියෙක් අපදෙසට මුහුණ පා සිටගෙනය!

මෙම Nissan රථයට ජෙට් එකක් සේ ඉගිල යා හැකි වුවද නවතා ගැනීම තරමක දුර්වල අඩියක පවතුණි.

කලයුතු අන්  යමක් නොවීය ඇක්සලරේටරය අඩියටම පාගා අලියාත්; මාර්ගය හා  මහ වනාන්තරයත් වෙන් වන කාණුවත් අතරිණ්; අලියාට ගෑවී නොගෑවී විද්දෙමි.

නැවතත් මේ කයිවාරුව පිළිගන්න යැයි ඔබට පැවසීමට මට සිදුවේ. එදින මා Nissan Patrol 160 පොළොන්නරුවේ ලේක් විව් හෝටලය ඉදිරියේ නවතන විට වේලාව රාත්‍රී 8.13 ලෙස සඳහන්ව පැවතුනි.

එය මාගේ රියැදුරු ජීවිතයේ වාර්ථාගත හොඳම කාල වාර්ථාවන්ගෙන් එකකි. පැය තුනක් ඇතුලත් මා කඩවත සිට පොළොන්නරුව දක්වා පදවා තිබුණි. 

මේ වන විට 32 ශ්‍රී 0865 නොම්මරය පැළඳ සිටින්නේ ‍Y60 Long Wheel Base වාහනයක්ය!


මේ 2002 - 2003 කාලයෙදී එම අද්විතීය රථය වස්ගමුව මහ වනය තුලදී.

පිටුපස "පතියා" හෙවත් දිමුතු තිසුන් පතිරාජ (සේවා උපදේශක  -යුනයිටඩ් මෝටර්ස්)  
පහත කහ පැහැති ටී ෂර්ට් එකකින් සැරසී වසික (කැන්ගරු දෙශය)
 ඉතිරිය=දියණිය ! 
කාලය මැවු වෙනසක අරුමේ!

මෙදින  වංගුවෙන් මෑත්වීම සමගම අකීකරු ඇල්ලකට අනපේක්ෂිතව මුහුණ දීමට සිදුවීමත් ඒ හා සමානය. එදා මුහුණ දුන්නේ නොදැමුණු හස්තියෙකු හටය. මෙදා හස්තියකු වුව ගසා ගෙන යාහැකි ජල කඳකටය!

කයාකයේ ඉදිරියෙන් සිටින්නේ පිහිණීමට බැරි සුදාය. සුදා මේ ගමන යනවා කියා දන්නේ ඔහුගේ ප්‍රේමය පමනි!
අම්මලා තාත්තලා ඇතුළු ගෙදර උදවිය දන්නා දෙයක් නොමැත!

ප්‍රේමය පවා; සුදාගෙ මොළේ මේතරම් නහර ගැට ගැහී ඇති බවක් හෝ මේ ගමනේ ඇති නොම්මර එකේ ලාලිත්‍යය පිළිබඳව දැන සිටියා යැයි සිතිය නොහැක.

අප සමග ගං ඉවුරේ නවාතැන් ගත් සමහර අවස්ථාවලදී ගෙදර උදවියට අමතන විටදී ඔහු රඟපෑවේ මහ පාරේ ඉන්න ලෙසින් වාගේ මට මතකය! ( සුදා මම වැරදිද? වැරදි නං හිතේ තියාගෙන ඉන්නෙ නැතිව කියහං!)

මේ සියල්ලම අද මෙනෙහි කරණ විට විනෝද ජනක කථාන්දර වූවාට ඇල්ල අභියසදි  සිතට මොනතරම් වද දුන් කාරණාවක් වුනිද?

 සුදා මා හට තවත් එක් ගමන් සගයෙකු වූවාට;  ඇයට මහත්වූ ප්‍රේමයකි! ඔහුගේ අම්මාට තාත්තාට; තම ජීවිතයේ අවසන් කාලයේදී බලා කියාගන්නා ලොකු පුතාය. මිතුරණ් අතර හොඳ සහෘදයෙකි. 

ඇල්ලට තවත් එක් දියේ ගිලී පසුව පාවෙන වස්තුවක් පමණි. 

මා පිළිබඳව, මා ලියන දේ පිළිබඳව විශ්වාසය තබා පැමිණි නාඹර තරුණයා අපි තිදෙන කවුරුණ් දැයි කිසිදිනෙක මීට පෙර අධ්‍යයනයක යෙදී තබා පියවි ඇසින් දැක බලා හෝ නොමැත. 

ඔහු ඔහුගේ ජීවිතය; ඔහුගේ සිරුර වටා දැවටී ගත් ජීවිතාරක්ෂක කබායට හා මාගේ පලපුරුද්ද මත ලංසු තබා ඇත.

ඇත්තෙන්ම මහවැළියේ පරසිදු කිරි අම්මා ඇල්ල අභියස දී වත් මෙවන් චකිතයක් සිතට ගලා ආ වගක් මතකයට නොයේ.

හාමුදුරුවන් හා ළමුන් දෑස් අයා බලා සිටිමින්ය. ඔවුන්ගේ මුහුනේ කිසිදු ඉරියව්වක් නොමැතිව වියළී ගිය සේයාවකි. සියල්ල අයා ගත් මුවෙන් යුතුව දෑස් දල්වා බලා සිටිමින්ය.

කයාකය වේගයෙන් ඇදී ගොස් දිය මතු පිටට තරමක්  යටින් පිහිටි ගලක් මත ගැටී නතර විය.  එසේ නතර වූ කයාකය සෙමෙන් සෙමෙන් ගං දිය මත හරස් වෙමිනි. ඉදිරිපස ගල මත ගැටී නතර වූ පසු කයාකයේ පසු පස සෙමෙන් ඉදිරි පස පසු කරමින් භ්‍රමණය වීම සාමාන්‍ය තත්වයකි. ඒ ගල හා ගැටී නතර වූ ලක්ෂය වටා ජලකඳෙන් ඇති කරවන බල ඝූර්ණය හේතු කොටගෙනය. 

මෙහි ඇති වඩාත්ම භයානක තත්වය වන්නේ වේගයෙන් ගලන දිය වැලට, දිය පහරට, ඇල්ලට ලම්භකව නො එසේනම් හරස් අතට මුහුණදෙන කයාකය එකවරම පෙරළී යාමයි. 

මෙය සර්ෆින් වලදීද මා අත් දැක ඇත! සර්ෆ් බෝඩ් එක හෙවත් ලෑල්ල රැල්ලට  හරස් වූ සැනින් එය පෙරළීයාමට පටන් ගනී. එම පෙරළීමට යෙදෙන බලය හා රල මගින් වෙරළ දෙසට  වේගයෙන් ගමන් කරණ රළ  පහරේ බලයත් යන කාරනා කළමණාකරණය කිරීම "සර්ෆින්" වේ. (කියන්න කණගාටුය! ජයග්‍රාහී දෙවන වතාවටද මා සර්ෆින් කරණ්නට ගොස් දක්ෂලෙස පසු බැසීය!!)

අප කයාකය සමග හිරවූ තැනට දකුණෙන් වේගයෙන් ගලනා ජලකඳය! ඉන් ඔබ්බේ වූයේ  විසෲථ ලෙස දඟලන; අවුල්ව ගිය දිය රැළිවලින් ගහන අක්රමවත් ගං වියමනය!

කයාකය කරකැවෙන්නේ හෙවත් භ්‍රමනය වන්නේ මා වේගවත් ජල කඳට  යොමුවන පරිද්දෙන්ය.  තවත් මොහොතකදී මා රැඳි කයාකයේ පසුපස ජල කඳ විසින් නතු කර ගැනීමත් සමග කයාකය පෙරළීයාමට නියමිතය. පෙරළී යන කයාකය සුදාව, මාව හෝ අප දෙදෙනාම දිය කඳට යටපත් කරගෙන හිසට උඩින් ගමන් අරඹනු ඇත.  ඒ සමගම වේගයෙන් දිය යටින් ඇදී යන අප දිය යට පිහිටි ගල් වල දිය යට රැඳි අකුල් වල ගස් වල ගැටෙනු ඇත.

කයාකය ගල මත බොහෝ සෙයින්  කරකැවීමත් සමගම ඇල වෙන්නට පටන් ගනිමින් විය.
මේ මොහොතේ කල යුතුව ඇති හොඳම  උත්සාහය වන්නේ කයාකය පෙරලීයාමට ප්‍රථිවිරෝධීව කටයුතු කිරීමය. 

හබලක් ගැසීමට වේලාවක් නැත. කයාකය ගල මත හරස් වී ඇති අයුරිණ් ගඟ ගලන දිශාව අපගේ දකුණු පසින්ය. අප දියබත් වනවා නම් ඒ දකුණු පසට ඇද වැටීමෙන්ය. කයාකය ටිකෙන් ටික ඇලවන්නේද දකුණු පසටය.

මම දකුණු අතින් හබල අල්ලාගෙන ම වම් අතින් කයාකයේ වම්පස දාරෙයෙන් අල්ලා ගත්තෙමි. සුදාද එසේම කයාකය මත වමට බර වී; වම්පස දාරය අල්ලාගත්වනම සිටී. කයාකය දකුණට බර වත්ම අප කයාකය මත වමට බරවී නොසෙල්වී සිටිමින් විමු.

"කොල්ලෝ බය වෙන්න එපා! වැටුනත් හබල අත අරිණ්න එපා!! කේස් එකක් උනාට බය වෙන්න එපා!!!" 
(සුදා මම එහෙම කිව්වා නේද?)
මම මාගේ අවසාන විධානය, අවවාදය, ඉල්ලීම, දිරිය; කෑගසා ලබාදුනිමි!


තවත් තත්පර ගනනාවකදී ගල මතින් මිදුණු කයාකය පසු පස පලමුව දියට අවතීර්න වී මුළුමණින්ම ගල් මාට්ටුවෙන් මිදුනි! ඒ සමගම කයාකය පෙරකී අක්‍රමවත් ජල වියරුවට  කයාකය පසු පසට ගමන් කරමින් අවතීර්ණවිය.

"උඹ නිකා හිටාං . . !"

මා සෙමෙන් කයාකය හරවා ගැනීමට සූදානම් විය. එක වර දියවැල ට හරස් වුවහොත් එය පෙරලී යනු ඇත. මා සීරුවට කයාකය හරවා ගතිමි. එතෙක් පසු පසට ගමන් ගත් අප දෙදෙන ඉදිරියට හබල් ගසන්නට පටන් ගත්තෙමු.

ඒ වන විට තෙශාන්ත හා පසිඳු අවදානම් කලාපයෙන් ඉවතට ගොස් තිබුනි. අපද ඊළඟ මොහොතේ නිසල දියට අවතීර්ණ වුනෙමු.

එය ඉතා අනර්ඝ ගනයේ  නරක ආදර්ශයකි. අප මුල සිට ගඟේ වම්පසින් ගමන් ගත්තේ නම් මෙම අවදානම බොහෝ සෙයින් අඩුව යන්නට තිබුනි. මන්ද ගඟ වක්‍රයක ගමන් ගත් බැවින්  ඇල්ල හමුවීමට ප්‍රථම සාපේක්ෂව වඩාත් වැඩි දුරක් ගමන් ගැනීමට තිබුනු ඉඩ කඩ තුල වඩාත් පෙර සූදානමකින් යුතුව ඇල්ලට මුහුණ දීමට ඉඩ කඩක් තිබුණි.

ගංගාරාමය  අසල ඇල්ල අතිශය අවදානම් සහගත එකක් විය කියා ලියන්නට හැකිය. ඇල්ලේ ස්වභාවය, ගඟේ වක්‍රා කාර ගමන් පථය, පෙර සූදානමක් නොමැති බව මීට ප්‍රධාන හේතූන් වේ.

ඒ කෙසේ වෙතත් අප එය ජය ගතිමු. අක්‍රමවත් ජල තලය වෙතට පිලිපන් යාත්‍රාව බීමත් රියැදුරකු පදවන පුද්ගලික බස් රියක් සේ ඒ මේ අතට විසි වෙමින් ගමන් කරන විනාඩියකටත් අඩු කාල මාත්‍රාවෙන් ලැබෙන ආශ්වාදය දෙවැනි වන්නෙ නිවෙසක ආලින්දයක සෝපාවක දෙපා උඩින් තබා දෑස් පියා ගත කරණ නිමේශයකටය. එය වින්දනීය කාල පරතරයකි. එය නැවත මතක් කල නොහැක. මට තබා අප සියල්ලන්හටම එකට එක්වී හෝ එම ආශ්වාදය මෙනෙහි කල නොහැක. එයම තමා එහි චමත්කාරය වන්නේ!

මොකද නිකං මල පැනලා වගේ . . ?

"තවත් හෝරාවක පමන කාලයකට පසු අප නරතුපාන පාලම පසු කරමින් විය!" මේ වගන්තියෙන් කියැවෙන්නේ පාලම මතින් කල ගමනක් නොව පාලමට යටින් කල ගමනක් පිළිබඳවය. 

ගොඩින් නොවේ දියෙන් එන්න . . ! 
නරතුපාන පාලම් රාජයා



මද ප්ලේනටි විරාමයක් . . !




පුංචි පුංචි විවේක . . . !


මෙම ස්ථානයට අප ගොඩ බැස්සේ ගංගාව අසල පසෙක දමා තිබුණු පැරණි වායු සම්පීඩකයක් හෙවත් එයා කොම්ප්‍රෙසර් එකක් දක්නට ලැබුනු නිසාය. අපට වැදගත් වූයේ එම යන්ත්‍රයට වඩා ඒය සවිකොට තිබුණු ට්‍රේලරයය. අප එතැනට ගොඩවූ සැණින් අපව ආදරයෙන් සාදරයෙන් යුතුව පිළිගත්; එහිවූ පිරිසෙන් ගැලවී ඒමට සෑහෙන වෙහෙසක් දැරීමට සිදුවිය. සිද්ධිය වඩාත් භයානක තත්වයකට පත්වූයේ ඒ අතර සිටි එක් අයෙකු ඉර මුදුන් සමයට මධුවිත තරමක් යහමින් සප්පායම් වෙලා තිබූ නිසාය! 

බීවාම බොහෝ මිනිසුන්ගේ හිත හොඳවේ. බොන්න බොන්න හිත වඩ වඩාත් හොඳවී අවට සිටින්න වුන්හට වඩ වඩාත් කරදරයක් බවට පත්වේ!

කාලය ඒවන විට දහවල් 12.00 ත් 1.00 ත් අතර වන්නට ඇතැසි මට සිතේ. දැන් අප ආහාර ලබා ගැනීමේ මාර්ගයක් සොයා ගත යුතුවේ. ආහාර මාර්ගය උපතින්ම තිබුනාට ආහාර ලබා ගැනීමේ මාර්ගය අප විසින් අවස්ථානුකූලව සොයා බලා ගත යුතුවේ.

අප මෙම ත්‍යාගශීලී පිරිසගෙන් "අපිට දවල්ට බත් ටිකක් කන්න තැනක් මේ හරියේ නැද්ද?" කියා අසා කට වරද්දා ගත්තෙමු. 
ඒය කතරගම, මුන්නෙශ්වරම ගිහින් කට වරද්දා ගත්තාට වඩා බොහෝ සෙයින් භයානක එකක් විය. 

අප එසේ ඇසූ සැණින් අපට භෝජන සංග්‍රයක් පැවැත්වීමට ඔවුනට අවශ්‍යවිය. අප ඉන් මිදුනේ "හරි හරි මොනවා හරි කන්නනේ  ඕනෑ වෙන්නේ. අපි බුලත් විටක්  කන්නම්!" කියා ඔවුන් සමග විටක් සප්පායම් වී ගඟට බැස්සෙමු.

ඔවුන්ගේ මග පෙන්වීමට අනුව තවත් කිලෝමීටර 2 ක් - 3ක් ඇතුලත ගල්පාත හංදිය නුදුරෙණ් අපට ගොදුරු සොයාගත හැකිවනු ඇත.

බුලත් විටෙන් සෑහී . . . . !

මමත් පසිඳුත් ගල්පාත හංදිය අසල තොටුපොලක් අසලට ගාල කල කයාක බලා කියාගෙන නැවතුණු අතර තෙශා සුදා සමගින් දිවා ආහාරය සඳහා යමක් සොයාගෙන ඒමට පිටත් විය.

මෙම ගමට දාලා තියෙන "ගල්පාත" කියන නම මොනතරම් ගැලපෙනවාද . ?

එක හැලියේ බත් කන්නේ - එක සෙවනේ නිදියන්නේ
අයියා මල්ලී වාගේ - අයියා මල්ලී . . . //




මෙහෙමත් කල්යාද රඹුටං ගස් යට . . . . ?

තවත් පැයක හමාරක කාලය ගත වෙද්දී සුදාත් තෙශාත් බත් ගෙඩි හතරක් සමග පැය ගණ්නාවක් තළු මැරිය හැකි "කථාන්දරයක්" ඔතා ගෙන ආවෝය. 

ගලපාත අප නැවැත්වූ ස්ථානයේ ගංගාවේ වම් පසට විසල් කෝණයකින් හැරෙමින් ගමන් ගත් ස්ථානයකි. එනිසාම අප ගොඩ බැසගත් දකුණු ඉවුර බොහෝ ලෙසින් ඛාදනය වී තිබුණු අතර එයින් යම් පමනක හෝ ගැලවීමක් අපේක්ෂාවෙන් විසල් ගල් කුට්ටි ගඟ අයිනේ ගොඩ ගසා තිබුණි. මේ නිසාම ඉවුර මතට එනම් ගංගාවට ඉතාමත් ආසන්නයෙන් ගමන් ගත් මාර්ගයට ගොඩවීම සැළකිය යුතු කෙළියකි! 

 විසල් ගල් කුළු වලට නගිමින් අතපය හතර බේරා ගනිමින් ඉවුරට නැගිය යුතු විය. 

එම මාර්ගය අඩි 12 ක 15ක පළලකින් යුක්තවූ පටු මාරගයකි. අප මාර්ගය අසල පිහිටි රඹුටන් ගසක සෙවනයට; පාර අයිනේ තනකොළ ගොල්ලේ; බත් හතර බිම එලාගෙන කන්නට විය.

මහා සැළකියයුතු රසයකින් හෝ ගුණයකින් සමන්විත නොවූවත්; පොලිතීන් කොළය හා පත්තර කඩාදාසිය හැරෙණ්නට අන් සියල්ලට අප සාධාරණයක් ඉෂ්ඨ සිද්ධ කලෙමු. 
එම සාධාරණය හා ඒ හා අත්වැල් බැඳගත් කුසලය බත උයපු බෙදපු ඔතපු විකුණපු බරපැන දරපු විශේෂයෙන් කිසිදු කන්කෙඳිරියකින් තොරව ගෙනැවිත් දෝතින් පිළිගන්වපු සෑම සියළු දෙන හට නොබෙදී නොවිසිරී  පැතිරේවා!



"හ්ම්! ඉක්මනට පිටත්වෙමු! හවස් වෙන්න කලින් කළුතරට යන්න!" 

ගං දෑල දෙපසම
කැලෑ මල් පිපි ඕසෙට

කොමල කළු ගඟ
සිඹිමි ඔබ ගෙන දෑතට

හද ඉතින් ඉවසන්න
බාරවෙන්නම් මම - කළුතරට

23. ගඟක් දිගේ ගිය ගමනක්

"ගඟක් දිගේ ගිය ගමනක්" කියන්නේ ගඟක් වගේම දිග කථාවක්. මෝබි ඩික් වෙළුම් තුන අමෙරිකනු ලේඛක හර්මන් මෙල්විල් ගේ ධවල තල්මසාගේ...